ຕາມຂ່າວ CRI: ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ອັດລົງຢູ່ນະຄອນຫຼວງປັກກິ່ງ ສປ ຈີນຢ່າງຈົບງາມ. ແລະໃນໂອກາດໃຫ້ສຳພາດຕໍ່ນັກຂ່າວ CRI ຢູ່ນະຄອນຫຼວງວຽງຈັນ ສປປ ລາວໃນວັນທີ 25 ຕຸລານີ້, ທ່ານສີຄູນ ບຸນວິໄລ ປະທານໃຫຍ່ສະມາຄົມມິດຕະພາບລາວ-ຈີນກ່າວວ່າ, ການທີ່ກອງປະຊຸມດັ່ງກ່າວໄດ້ຮັບຄວາມສົນໃຈຈາກທົ່ວໂລກ, ກໍຍ້ອນວ່າຈີນໄດ້ເສີມຂະຫຍາຍບົດບາດສຳຄັນຕໍ່ການພັດທະນາຂອງໂລກ, ແລະປັດຈຸບັນ, ປະເທດລາວກໍພວມແບ່ງປັນຜົນປະໂຫຍດຈາກການພັດທະນາຂອງຈີນ. ຕໍ່ໄປເຊີນຮັບຟັງການລາຍງານລະອຽດຂອງນັກຂ່າວ.
ທ່ານສີຄູນ ບຸນວິໄລ ໄດ້ສຸມກຳລັງເພື່ອຊຸກຍູ້ການຮ່ວມມືໄມຕີຈິດມິດຕະພາບລະຫວ່າງລາວ-ຈີນເປັນໄລຍະຍາວ, ທ່ານໄດ້ພິມປຶ້ມ 4 ຫົວທີ່ບັນທຶກການໄປມາຫາສູ່ກັນດ້ວຍນ້ຳໃຈມິດຕະພາບລະຫວ່າງສອງປະເທດເຊັ່ນ: "ຜົນງານການຮ່ວມມືລາວ-ຈີນ" "ມິດຕະພາບລາວຈີນໝັ້ນຍືນ" ແລະອື່ນໆ, ທ່ານຮູ້ຈີນຢ່າງເລິກເຊິ່ງ. ໂດຍທ່ານໄດ້ກ່າວວ່າ, ໃນ 5 ປີຜ່ານມາ, ຜົນງານທີ່ຈີນໄດ້ຮັບສາມາດເຫັນໄດ້ແລະຮູ້ສຶກໄດ້, ດັ່ງເສດຖະກິດຈີນໄດ້ເຕີບໂຕກວມອັດຕາການເຕີບໂຕຂອງເສດຖະກິດໂລກ 30% ຂຶ້ນໄປ, ຈາກນີ້ຍັງເຮັດໃຫ້ປະເທດຕ່າງໆໃນໂລກເອົາໃຈໃສ່ສູງຕໍ່ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 , ແລະສົນໃຈຕໍ່ທິດທາງການພັດທະນາຂອງຈີນໃນອະນາຄົດ. ທ່ານກ່າວວ່າ: "ໃນກອງປະຊຸມໄດ້ມີບົດລາຍງານການເມືອງເຊິ່ງໄດ້ວາງທິດທາງພັດທະນາເສດຖະກິດ-ສັງຄົມ ແລະ ຄິດວ່າການເຕີບໂຕຂອງເສດຖະກິດຈີນຈະສົ່ງຜົນສະທ້ອນຕໍ່ຫລາຍປະເທດໃນໂລກ,ເຮັດໃຫ້ປະເທດຕ່າງໆໄດ້ຮັບຜົນປະໂຫຍດຫລືວ່າໄດ້ຮັບຜົນອານິສົງຈາກນະໂຍບາຍເສດຖະກິດແລະການຂະຫຍາຍໂຕເສດຖະກິດຂອງຈີນ, ນີ້ມີຜົນສະທ້ອນດີຕໍ່ໂລກ."
ທ່ານ ສີຄູນ ບຸນວິໄລ ກ່າວວ່າ: ການເມືອງຂອງຈີນມີສະຖຽນລະພາບ, ສັງຄົມມີຄວາມກົມກຽວກັນ, ຜົນສຳເລັດທີ່ຈີນໄດ້ຮັບໃນຂົງເຂດຕ່າງໆທີ່ເປັນໜ້າຍ້ອງຍໍຊົມເຊີຍຈາກຊາວໂລກ. ນອກນີ້, ທ່ານຍັງໄດ້ກ່າວເຖິງຜົນສຳເລັດທີ່ຈີນໄດ້ຮັບໃນການຫຼຸດຜ່ອນຄວາມທຸກຍາກທີ່ເຮັດໃຫ້ຕົນຮູ້ສຶກປະທັບໃຈກວ່າໝູ່. ທ່ານກ່າວວ່າ:
"ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ສະເລ່ຍແລ້ວ ຢູ່ຈີນ ແຕ່ລະ 3 ວິນາທີໃດ ກໍ່ມີຄົນໜຶ່ງກ້າວກ່າຍເສັ້ນທຸກຍາກ, ນີ້ບໍ່ແມ່ນເລື່ອງງ່າຍ,ຖືວ່າເປັນຜົນງານເດັ່ນທີ່ໜ້າປະທັບໃຈ, ຈີນຍັງວາງແຜນຮອດປີ 2020 ຈະລົບລ້າງຄວາມທຸກຍາກໃນຈຳນວນເຫລືອ 24 ລ້ານຄົນ, ເຊິ່ງເປັນຜົນງານທີ່ທົ່ວໂລກຍອມຮັບໂດຍສະເພາະປະເທດລາວຍັງມີຄົນທຸກຍາກບ້ານທຸກຍາກ ແລະ ຕ້ອງໄດ້ສຶກສາແລະຖອດຖອນບົດຮຽນນຳປະເທດຈີນ."
ທ່ານ ສີຄູນ ບຸນວິໄລ ຍັງໄດ້ຕີລາຄາສູງຕໍໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ຈີນສະເໜີ ໂດຍທ່ານກ່າວວ່າ: ຜູ້ນຳລາວພວມຊຸກຍູ້ຍຸດທະສາດການພັດທະນາປະເທດຕົນຈາກປະເທດທີ່ບໍ່ມີທາງອອກສູ່ທະເລເປັນປະເທດໃຈກາງບໍລິການທາງຜ່ານໃຫ້ເຊື່ອມຕໍ່ກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ໃຫ້ມີປະສິດທິຜົນຢ່າງແທ້ຈິງ. ທ່ານກ່າວວ່າ:"ໂດຍສະເພາະລາວກໍ່ຈະໄດ້ຮັບຜົນປະໂຫຍດເຊັ່ນ: ເສັ້ນທາງລົດໄຟຄວາມໄວສູງ, ໃນແຖວນີ້ແມ່ນ ສປປ ລາວ ບຸກທະລຸກ່ອນໜູ່, ນອກນັ້ນ, ຍັງຈະມີທາງດ່ວນ ແລະ ອື່ນໆ ປະຈຸບັນມີທາງບົກມີເສັ້ນທາງເຊື່ອມໂຍງຄຸນໝິງ, ບາງກອກ ແລະ ສິງກະໂປ. ລາວໄດ້ຮັບຜົນປະໂຫຍດທາງກົງແລະທາງອ້ອມ ເຮັດໃຫ້ລາວສາມາດເຊື່ອມຈອດກັບພູມີພາກແລະອອກສູ່ທະເລໄດ້, ນີ້ມີຄວາມສຳຄັນໃນການພັດທະນານຳຜົນປະໂຫຍດຢ່າງໃຫຍ່ຫຼວງມາສູ່ການພັດທະນາຂອງລາວເຮົາ. ນະໂຍບາຍນີ້ບໍ່ພຽງແຕ່ລາວເທົ່ານັ້ນຕອບສະໜອງ, ທົ່ວໂລກກໍ່ຕອບສະໜອງແລະຈະໄດ້ຮັບຜົນປະໂຫຍດ."
ທ່ານ ສີຄູນ ບຸນວິໄລ ກ່າວວ່າ: ທັດສະນະຄະຕິແຫ່ງການພັດທະນາຂອງລາວແລະຈີນມີຄວາມຄ້າຍຄືກັນ, ແມ່ນຄູ່ຮ່ວມຊະຕາກຳທີ່ມີຄວາມໝາຍທາງຍຸດທະສາດ, ເປົ້າໝາຍແຫ່ງການພັດທະນາທີ່ສະເໜີໃນກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ກໍຈະນຳເອົາຜົນປະໂຫຍດມາໃຫ້ປະເທດລາວເຊັ່ນກັນ. ທ່ານກ່າວວ່າ:
"ຜ່ານມາເຫັນໄດ້ວ່າ, ຜົນອານິສົງຈາກນະໂຍບາຍກໍຄືການພັດທະນາຂອງຈີນ ໄດ້ປະກອບສ່ວນຢ່າງຫຼວງຫຼາຍໃນການພັດທະນາຂອງ ສປປ ລາວ, ເປັນຕົ້ນໂຄງການກໍ່ສ້າງພື້ນຖານໂຄງລ່າງ, ຖະໜົນຫົນທາງ ແລະ ອື່ນໆ. ພວກເຮົາຕ້ອງຮັບເອົາການພັດທະນາຂອງຈີນ ນີ້ມີຜົນດີຕໍ່ພວກເຮົາເອງ."
