ວັນທີ 25 ຕຸລານີ້, ຫຼັງເປີດສາກຂອງກອງປະຊຸມປຶກສາຫາລືກ່ຽວກັບການຮ່ວມມືວິທະຍາສາດເຕັກນິກການຄ້າການລົງທຶນຈີນ-ເອີຣົບຄັ້ງທີ 12 ໄດ້ມີ 17 ອົງການເອີຣົບ ເປັນຕົ້ນ: ສະຫະພັນການຄ້າ ແລະການປະດິດສ້າງໃໝ່ເອີຣົບ ແລະອື່ນໆ ໄດ້ເຊັນສັນຍາກັບເຂດນິຄົມອຸດສາຫະກຳເຕັກນິກສູງໃໝ່ເມືອງເສີງຕູ່ ເຊິ່ງຈະເຂົ້າປະຈຳຢູ່ "ສູນຈີນ-ເອີຣົບ" ຢູ່ເຂດດັ່ງກ່າວ.
ເດືອນພຶດສະພາປີ 2017 ນີ້, "ສູນຈີນ-ເອີຣົບ" ໄດ້ເປີດບໍລິການຢ່າງເປັນທາງການ ເຊິ່ງປະກອບດ້ວຍ 6 ພາກສ່ວນ ຄື: ສູນການຄ້າເຕັກນິກຈີນ-ເອີຣົບ, ສູນຊ່ວຍເຫຼືອວິສາຫະກິດຂະໜາດກາງ ແລະນ້ອຍເອີຣົບ, ສຳນັກງານໃຫຍ່ ວິສາຫະກິດເອີຣົບ ແລະອື່ນໆ.
ກອງປະຊຸມດັ່ງກ່າວໄດ້ກາຍເປັນຂົວຕໍ່ທີ່ສຳຄັນໃນການຮ່ວມມືຮອບດ້ານລະຫວ່າງພາກຕາເວັນຕົກຈີນ ແລະເອີຣົບ. ທັງນີ້ນັບແຕ່ເດືອນມັງກອນຫາເດືອນສິງຫາປີ 2017, ມູນຄ່ານຳເຂົ້າ ແລະສົ່ງອອກລະຫວ່າງເມືອງເສີງຕູ່-ເອີຣົບເພີ່ມຂຶ້ນ 81,4% ແລະເຖິງທ້າຍເດືອນກັນຍາປີນີ້, ມີ 485 ວິສາຫະກິດເອີຣົບເຂົ້າມາລົງທຶນຢູ່ເມືອງເສີງຕູ່ດວ້ຍຍອດມູນຄ່າປະມານ 4,5 ຕື້ໂດລາ. ໃນຂະບວນການສ້າງ "ໜຶ່ງແລວທາງໜຶ່ງເສັ້ນທາງ" ນັ້ນ, ເມືອງເສີງຕູ່ໄດ້ຄ່ອຍໆກາຍເປັນເມືອງເປີດປະຕູສູ່ເອີຣົບ.