ຕາມຂ່າວCRI: ໃນຫຼາຍມື້ຜ່ານມາ,ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ໄດ້ດຶງດູດຄວາມສົນໃຈຈາກບຸກຄົນວົງການຕ່າງໆໃນອາຊຽນມາໂດຍຕະຫຼອດ ເຊິ່ງບຸກຄົນເຫຼົ່ານີ້ກ່າວໃນຂະນະທີ່ໃຫ້ສຳພາດຕໍ່ນັກຂ່າວ CRI ວ່າ: ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ໄດ້ກຳນົດເວລາໃນການສ້າງສັງຄົມອີ່ໜຳສຳລານຢ່າງຮອບດ້ານໃຫ້ສຳເລັດແລະການສ້າງປະເທດສັງຄົມນິຍົມແບບທັນສະໄໝຂອງຈີນ, ການພັດທະນາຂອງຈີນຈະນຳເອົາໂອກາດໃໝ່ມາໃຫ້ແກ່ອາຊຽນ.
ທ່ານນາງ ມາບອຍລິງ ຜູ້ບໍລິຫານຂັ້ນສູງສັນຊາດຫວຽດນາມ ຮອງຜູ້ອຳນວຍການໃຫຍ່ພະແນກການທະນາຄານຂອງທະນາຄານຈີນສາຂາໂຮ່ຈິມິງປະເທດຫວຽດນາມກ່າວວ່າ: ທ່ານເລຂາທິການໃຫຍ່ ສີຈິ້ນຜິງ ກ່າວລາຍງານໃນກອງປະຊຸມວ່າຈີນຈະຮັກສາການໄຂປະຕູທາງເສດຖະກິດຕໍ່ພາຍນອກ ເຊິ່ງຈາກນີ້ຈະນຳເອົາໂອກາດໃໝ່ມາໃຫ້ແກ່ການພັດທະນາເສດຖະກິດຂອງຫວຽດນາມ ແລະກໍໝາຍຄວາມວ່າ: ຈີນຈະຮັບເອົາວິສາຫະກິດທຶນຕ່າງປະເທດໃຫ້ຫຼາຍກວ່າເກົ່າ ທັງຈະມີວິສາຫະກິດຈີນໄປລົງທຶນຢູ່ຫວຽດນາມຫຼາຍກວ່າເກົ່າ ໂດຍສະເພາະວິສາຫະກິດຂະແໜງການວິທະຍາສາດເຕັກໂນໂລຊີ. ທ່ານກ່າວຕື່ມວ່າ: ການທີ່ຈີນໄດ້ປາບປາມການສໍ້ລາດບັງຫຼວງຢ່າງແຂງແຮງໄດ້ປັບປຸງສະພາບແວດລ້ອມການລົງທຶນຂອງຈີນໃຫ້ດີຂຶ້ນແລະມີຄວາມໂປ່ງໃສ ທັງໄດ້ເພີ່ມຄວາມໝັ້ນໃຈໃຫ້ແກ່ບັນດານັກລົງທຶນ.
ທ່ານນາງ ສວາຍ ນັກຣີ ຮອງຫົວໜ້າຝ່າຍບຸກຄະລາກອນຂອງຫ້ອງການຄະນະລັດຖະບານກຳປູເຈຍທີ່ເຄີຍຮຽນຢູ່ຈີນເຫັນວ່າ: ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19 ມີຄວາມໝາຍສຳຄັນ,ບົດລາຍງານຂອງກອງປະຊຸມລະບຸວ່າ: ຈີນຈະສ້າງຕັ້ງຄະນະກຳມະການຕິດຕາມກວດກາລະດັບຊາດ,ແຂວງ,ນະຄອນແລະເມືອງ,ພ້ອມທັງຈະສ້າງລະບົບລາດຕາເວນກວດກາໃນຄະນະພັກຂອງເມືອງແລະນະຄອນ ເພື່ອປັບປຸງກົນໄກການຕໍ່ຕ້ານການສໍ້ລາດບັງຫຼວງໃຫ້ສົມບູນຂຶ້ນຕື່ມອີກ. ມາດຕະການເຫຼົ່ານີ້ເປັນສິ່ງທີ່ຕ້ອງຖອດຖອນບົດຮຽນນຳ.
ທ່ານ ຢາໄຈຄອຍ ຜູ້ຊ່ວຍລັດຖະມົນຕີກະຊວງໂຄສະນາປະເທດມຽນມາທີ່ນຳພາຄະນະນັກຂ່າວເຂົ້າຮ່ວມການລາຍງານຂ່າວກອງປະຊຸມກ່າວຕໍ່ນັກຂ່າວ CRI ວ່າ: ກ່ຽວກັບບົດລາຍງານຂອງກອງປະຊຸມຄັ້ງນີ້ ສິ່ງທີ່ຕົນສົນໃຈຫຼາຍກວ່າໝູ່ແມ່ນແຜນການພັດທະນາໃນອະນາຄົດຂອງຈີນ.
 |
