ວັນທີ 27 ຕຸລານີ້, ກະຊວງການຕ່າງປະເທດອາເມລິກາໄດ້ວາງຄຳເຫັນຊີ້ນຳກ່ຽວກັບການຂວ້ຳບາດຣັດເຊຍ, ພ້ອມທັງປະກາດບັນຊີລາຍຊື່ສະບັບໜຶ່ງທີ່ລວມທັງ 39 ຄົນ ແລະອົງການຈັດຕັ້ງຂອງຣັດເຊຍທີ່ກ່ຽວພັນເຖິງຂົງເຂດປ້ອງກັນປະເທດ ແລະຂ່າວລັບ. ອາເມລິກາຈະເພີ່ມມາດຕະການຂວ້ຳບາດຕໍ່ຣັດເຊຍໂດຍອີງໃສ່ຄຳເຫັນຊີ້ນຳດັ່ງກ່າວ.
ເຈົ້າໜ້າທີ່ຜູ້ໜຶ່ງຂອງກະຊວງການຕ່າງປະເທດອາເມລິກາໃຫ້ສຳພາດຕໍ່ສື່ມວນຊົນວ່າ, ຄຳເຫັນຊີ້ນຳ ແລະບັນຊີລາຍຊື່ດັ່ງກ່າວແມ່ນຖືກວາງອອກບົນພື້ນຖານຜົນການປະເມີນຈາກພາກສ່ວນຕ່າງໆຂອງລັດຖະບານອາເມລິກາ, ເຊິ່ງຈຸດປະສົງຂອງການຂວ້ຳບາດແມ່ນເພື່ອຕອບໂຕ້ "ການກະທຳຮ້າຍ"ຂອງຣັດເຊຍໃນວິກິດການພາກຕາເວັນອອກຂອງອຸຍແກຼນ, ການໂຈມຕີທາງອິນເຕີເນັດ ແລະອື່ນໆ.
ເຈົ້າໜ້າທີ່ຜູ້ນີ້ກ່າວຕື່ມວ່າ, ບຸກຄົນ ແລະອົງການຈັດຕັ້ງໃນບັນຊີລາຍຊື່ດັ່ງກ່າວຈະບໍ່ແມ່ນເປົ້າໝາຍທີ່ຈະຖືກຂວ້ຳບາດໃນທີ່ສຸດ, ຊັບສິນຂອງເຂົາເຈົ້າກໍບໍ່ໄດ້ຖືກອາຍັດໄວ້, ຫາກແມ່ນຍ້ອນວ່າເຂົາເຈົ້າມີສ່ວນກ່ຽວພັນເຖິງການກະທຳທີ່ຈະຖືກຂວ້ຳບາດ ໂດຍໄດ້ລະບຸໄວ້ໃນຄຳເຫັນຊີ້ນຳ. ໃນຕໍ່ໜ້ານີ້, ອາດຈະມີບໍລິສັດ ແລະອົງການຈັດຕັ້ງທີ່ຫຼາຍກວ່າເກົ່າຂອງຣັດເຊຍ ຖືກຈັດເຂົ້າໃນບັນຊີລາຍຊື່ດັ່ງກ່າວ.