ວັນທີ 27 ຕຸລານີ້, ຢູ່ທີ່ສຳນັກງານໃຫຍ່ທີ່ນະຄອນຫຼວງປາຣີ, ອົງການອຸຍເນັສໂກສະຫະປະຊາຊາດໄດ້ມອບ "ຫຼຽນວິທະຍາສາດອະວະກາດ" ທີ່ປະກວດເປັນຄັ້ງທຳອິດນັ້ນໃຫ້ແກ່ນັກບິນອະວະກາດ 4 ທ່ານ ເຊິ່ງລວມທັງ ທ່ານຢາງລີ້ເວີຍ ນັກບິນອະວະກາດຈີນ, ເພື່ອຍ້ອງຍໍຊົມເຊີຍການປະກອບສ່ວນທີ່ພົ້ນເດັ່ນຂອງເຂົາເຈົ້າໃນການຊຸກຍູ້ການພັດທະນາວິທະຍາສາດອະວະກາດ.
ໃນພິທີດັ່ງກ່າວ, ທ່ານນາງອີຣີນາ ໂບໂກວາ, ຜູ້ອຳນວຍການໃຫຍ່ອົງການອຸຍເນັສໂກໄດ້ສະແດງຄວາມຊົມເຊີຍຢ່າງສູງຕໍ່ຄວາມກ້າຫານ ແລະຄວາມພະຍາຍາມຂອງຜູ້ໄດ້ຮັບຫຼຽນລາງວັນທຸກທ່ານໃນການຊຸກຍູ້ພາລະກິດຂອງມວນມະນຸດໃນການຄົ້ນຄວ້າອະວະກາດ ໂດຍກ່າວວ່າ, ວິທະຍາສາດເປັນກຳລັງແຮງທີ່ຊຸກຍູ້ມະນຸດບັນລຸວາລະການພັດທະນາແບບຍືນຍົງປີ 2030, ຫວັງວ່າທຸກທ່ານຜູ້ໄດ້ຮັບຫຼຽນລາງວັນຈົ່ງສືບຕໍ່ກ້າວໄປໜ້າຢ່າງກ້າຫານບົນເສັ້ນທາງຄົ້ນຄວ້າວິທະຍາສາດຂອງຕົນ, ຊ່ວຍເຫຼືອ ແລະສົ່ງເສີມຊາວໜຸ່ມຢ່າງຫຼວງຫຼາຍສົນໃຈວິທະຍາສາດ, ທັງຜັນຂະຫຍາຍທັດສະນະ "ເສີມສ້າງສັນຕິພາບ" ຂອງອົງການອຸຍເນັສໂກໄປສູ່ປະຊາຊົນທົ່ວໂລກ.
ທ່ານຢາງລີ້ເວີຍກ່າວວ່າ, ເດືອນຕຸລາປີ 2003, ການບິນອະວະກາດບັນທຸກມະນຸດຄັ້ງທຳອິດຂອງຈີນໄດ້ປະສົບຜົນສຳເລັດຢ່າງຈົບງາມ, ເຊິ່ງໄດ້ເປີດສະພາບການໃໝ່ຂອງພາລະກິດການບິນອະວະກາດບັນທຸກມະນຸດຂອງຈີນ, ກໍໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດຄົ້ນຄວ້າໂລກທີ່ຍັງບໍ່ທັນຮັບຮູ້ຂອງມວນມະນຸດ, ໃນໜ້າທີ່ການບິນອະວະກາດດັ່ງກ່າວ, ລັດຖະບານຈີນໄດ້ຮ່ວມມືກັບອົງການສະຫະປະຊາຊາດ ໂດຍໄດ້ບັນທຸກທຸງອົງການສະຫະປະຊາຊາດ, ເຊິ່ງສະແດງໃຫ້ເຫັນຄວາມປາຖະໜາອັນດີງາມຂອງປະຊາຊົນຈີນທີ່ນຳໃຊ້ອະວະກາດໂດຍສັນຕິ ແລະສ້າງຜົນປະໂຫຍດໃຫ້ແກ່ມວນມະນຸດ, ພ້ອມດ້ວຍສະໜັບສະໜູນຕໍ່ວັດຖຸປະສົງ ແລະຫຼັກການຂອງອົງການສະຫະປະຊາຊາດ. ໃນອະນາຄົດ, ຈີນຍິນດີຮ່ວມກັບປະເທດ ແລະເຂດແຄວ້ນຕ່າງໆທີ່ອອກແຮງນຳໃຊ້ອະວະກາດຊັ້ນນອກໂດຍ ສັນຕິ, ຮ່ວມກັນທຳການປະກອບສ່ວນອັນໃໝ່ເຂົ້າໃນການຊຸກຍູ້ຄວາມກ້າວໜ້າດ້ານວິທະຍາສາດເຕັກໂນໂລຊີຂອງມວນມະນຸດ, ພ້ອມທັງຊຸກຍູ້ສັນຕິພາບ ແລະການພັດທະນາຂອງໂລກ.