ຕອນຄ່ຳວັນທີ 27 ຕຸລານີ້, ທ່ານມາຣິອາໂນ ຮາໂຈອິ ນາຍົກລັດຖະມົນຕີແອສປາຍກ່າວປາໄສທາງໂທລະພາບ, ໂດຍໄດ້ປະກາດປົດຕຳແໜ່ງຂອງທ່ານຄາລິສ ພຸອິກເຕເມີງ ປະທານເຂດປົກຄອງຕົນເອງກາຕາລູນາ, ຍຸບສະພາເຂດປົກຄອງຕົນເອງ, ແລະປະກາດວ່າຈະຈັດການເລືອກຕັ້ງເຂດປົກຄອງຕົນເອງໃນວັນທີ 21 ທັນວາປີນີ້.
ທ່ານຮາໂຈອີຍັງປະກາດມາດຕະການບັງຄັບອື່ນໆ, ຄືປົດຕຳແໜ່ງເຈົ້າໜ້າທີ່ທັງໝົດຂອງອົງການປົກຄອງເຂດດັ່ງກ່າວ, ປົດຕຳແໜ່ງຫົວໜ້າເຈົ້າໜ້າທີ່ຕຳຫຼວດຂອງເຂດປົກຄອງຕົນເອງ ແລະປິດສຳນັກງານຜູ້ຕາງໜ້າເຂດປົກຄອງຕົນເອງປະຈຳຕ່າງປະເທດ ແລະອື່ນໆ.
ປະເທດແລະອົງການຈັດຕັ້ງສາກົນຕົ້ນຕໍຂອງເອີລົບແລະອາເມລິກາພາກັນສະແດງທ່າທີ ໂດຍສະໜັບສະໜູນສະໜັບລັດຖະບານແອສປາຍປົກປັກຮັກສາຄວາມເປັນເອກະພາບແຫ່ງຊາດ.
ວັນທີ 27 ຕຸລານີ້, ທ່ານທາເນຍ ປະທານສະພາເອີລົບກ່າວວ່າ, ພາຍໃນສະຫະພາບເອີລົບບໍ່ມີໃຜຮັບຮອງເຫັນດີຜົນການປ່ອນບັດເອົາປະຊາມະຕິຂອງເຂດກາຕາລູນາ.
ໂຄສົກລັດຖະບານເຢຍລະມັນໄດ້ຖະແຫຼງຜ່ານເວັບໄຊລັດຖະບານແລະສື່ມວນຊົນວ່າ, ລັດຖະບານເຢຍລະມັນບໍ່ຮັບຮອງການທີ່ເຂດປົກຄອງຕົນເອງກາຕາລູນາປະກາດເປັນເອກະລາດແຕ່ຝ່າຍດຽວ. ອະທິປະໄຕແລະຜືນແຜ່ນດິນອັນຄົບຖ້ວນຂອງແອສປາຍແມ່ນລ່ວງລ້ຳບໍ່ໄດ້, ສ່ວນເຂດປົກຄອງຕົນເອງກາຕາລູນາປະກາດເປັນເອກະລາດແຕ່ຝ່າຍດຽວໄດ້ລະເມີດຫຼັກການດັ່ງກ່າວ.
ໂຄສົກນາຍົກລັດຖະມົນຕີອັງກິດກ່າວວ່າ, ອັງກິດຈະບໍ່ຮັບຮອງຄວາມເປັນເອກະລາດຂອງເຂດກາຕາລູນາ, ເພາະວ່າສານລັດຖະທຳມະນູນແອສປາຍປະກາດແລ້ວວ່າມັນເປັນການປ່ອນບັດເອົາປະຊາມະຕິທີ່ຜິດກົດໝາຍ.
ໂຄສົກລັດຖະບານອາເມລິກາກ່າວວ່າ, ເຂດກາຕາລູນາແມ່ນພາກສ່ວນໜຶ່ງທີ່ຕັດແຍກອອກບໍ່ໄດ້ຂອງແອສປາຍ, ອາເມລິກາສະໜັບສະໜູນລັດຖະບານແອສປາຍໃຊ້ມາດຕະການທີ່ຖືກຕ້ອງຕາມກົດໝາຍເພື່ອປົກປັກຮັກສາຄວາມເຂັ້ມແຂງ ແລະຄວາມເປັນເອກະພາບຂອງແອສປາຍ.
