ເມື່ອບໍ່ດົນມານີ້, ຈີນໄດ້ເປີດເຜີຍຕົວເລກດາວທຽມທົດລອງວິທະຍາສາດການຕິດຕາມວັດແທກກາກບອນດີອ໋ອກຊິດໂລກຂອງຕົນຢ່າງເປັນທາງການ ເພື່ອໃຫ້ປະເທດຕ່າງໆຊົມໃຊ້ຮ່ວມກັນ ເຊິ່ງການເປີດເຜີຍດັ່ງກ່າວກໍສະແດງໃຫ້ເຫັນວ່າ ຈີນເປັນປະເທດທີ 3 ທີ່ສາມາດສະໜອງຕົວເລກວັດແທກກາກບອນດີອ໋ອກຊິດຜ່ານດາວທຽມ ຖັດຈາກອາເມລິກາ ແລະ ຍີ່ປຸ່ນ.
ດາວທຽມຕິດຕາມວັດແທກກາກບອນດີອ໋ອກຊິດທີ່ຈີນຄົ້ນຄວ້າຜະລິດເອງ ໄດ້ຖືກສົ່ງຂຶ້ນສູ່ວົງໂຄຈອນຢ່າງປະສົບຜົນສຳເລັດຢູ່ຖານສົ່ງດາວທຽມຈ໋ຽວສວນ ເມື່ອເດືອນທັນວາປີ 2016 ແລະ ມາເຖິງປັດຈຸບັນ ກໍໄດ້ສຳເລັດວຽກງານທົດລອງຕ່າງໆຢູ່ວົງໂຄຈອນດ້ວຍຄວາມຮຽບຮ້ອຍດີ ເຊິ່ງຕົວເລກຊີ້ວັດບົດບາດຕ່າງໆຂອງດາວທຽມກໍບັນລຸຕາມຄວາມຕ້ອງການຂອງການອອກແບບ.
ບັນດາທ່ານສາມາດເຂົ້າເບິ່ງເວັບໄຊສູນອຸຕຸນິຍົມດາວທຽມແຫ່ງຊາດຈີນ ແລະ ຊອກຄົ້ນ, ດາວໂຫຼດຕົວເລກໄດ້ໂດຍບໍ່ຕ້ອງເສຍຄ່າ.
