ວັນທີ 29 ຕຸລານີ້, ທ່ານ ປຣັກ ໂຊຄອນ ລັດຖະມົນຕີລັດຖະກິດທັງເປັນລັດຖະມົນຕີກະຊວງການຕ່າງປະເທດແລະການຮ່ວມມືສາກົນກຳປູເຈຍໄດ້ກ່າວເຖິງບັນຫາລະເບີດເຄມີດ້ວຍຫວັງວ່າຈະສາມາດປຶກສາຫາລືກັນແລະວາງມາດຕະການແກ້ໄຂພາຍໃຕ້ຂອບສັນຍາວ່າດ້ວຍການເກືອດຫ້າມອາວຸດເຄມີ,ຂະນະດຽວກັນກໍຂໍໃຫ້ອົງການສະຫະປະຊາຊາດສົ່ງຜູ້ຊ່ຽວຊານເຂົ້າໄປຊ່ວຍແກ້ໄຂບັນຫາດັ່ງກ່າວຢູ່ປະເທດຕົນ.
ໃນມື້ດັ່ງກ່າວ, ທ່ານ ປຣັກ ໂຊຄອນ ກ່າວໃນຂະນະທີ່ກວດກາວ່າ: ໃນຕົ້ນປີນີ້, ຢູ່ແຂວງສໄວ ຣຽງ ປະເທດຂອງຕົນໄດ້ພົບລະເບີດເຄມີທີ່ອາເມລິກາຖິ້ມໃນປາງສົງຄາມ, ແລະມາຮອດປັດຈຸບັນຍັງກະທົບຕໍ່ສຸຂະພາບຂອງປະຊາຊົນ.
ໃນກອງປະຊຸມເຈລະຈາບໍ່ເປັນທາງການຂອງລັດຖະມົນຕີປ້ອງກັນປະເທດອາເມລິກາ-ອາຊຽນທີ່ຈັດຂຶ້ນຢູ່ຟີລິບປິນໃນອາທິດຜ່ານມາ, ທ່ານ ເຕຍບັນ ລັດຖະມົນຕີກະຊວງປ້ອງກັນປະເທດກຳປູເຈຍໄດ້ຮຽກຮ້ອງໃຫ້ອາເມລິກາເພີ່ມທະວີການຮ່ວມມືກັບປະເທດຕົນແກ້ໄຂແລະທຳລາຍໝາກມິນແລະລະເບີດບໍ່ທັນແຕກຕົກຄ້າງຢູ່ກຳປູເຈຍໃນປາງສົງຄາມແຫຼມອິນດູຈີນໃນຊຸມປີ 1970 ໂດຍສະເພາະລະເບີດເຄມີ.
 |
