ວັນທີ 1 ພະຈິກນີ້, ທ່ານວຣະດິເມຍ ປູຕິນ ປະທານາທິບໍດີຣັດເຊຍໄດ້ຢ້ຽມຢາມອີຣານ ແລະພົບປະກັບທ່ານຮາຊັນ ຣູຮານີ ປະທານາທິບໍດີອີຣານ ແລະທ່ານອາຢາໂຕລາ ໄຊອິດ ອາລິ ຣາເນອີ ຜູ້ນຳສູງສຸດອີຣານ. ທ່ານປູຕິນໄດ້ສະແດງຄວາມສະໜັບສະໜູນສັນຍາຮອບດ້ານກ່ຽວກັບບັນຫານິວເຄຼຍອີຣານ ແລະສອງຝ່າຍຈະສືບຕໍ່ຮ່ວມມືໃນບັນຫາຊີຣີ.
ທ່ານປູຕິນກ່າວວ່າ: ສັນຍາຮອບດ້ານບັນຫານິວເຄຼຍອີຣານມີຜົນດີຕໍ່ສັນຕິພາບ ແລະຄວາມໝັ້ນທ່ຽງຂອງສາກົນ. ອົງການພະລັງງານປະລະມານູສາກົນແມ່ນອົງການພຽງໜຶ່ງດຽວທີ່ມີສິດຢືນຢັນອີຣານໄດ້ປະຕິບັດຕາມສັນຍາຫຼືບໍ່. ທ່ານກ່າວຕື່ມວ່າ: ປະເທດຕົນບໍ່ຮັບເອົາການກະທຳຂອງບາງປະເທດທີ່ບໍ່ຮັບຮອງສັນຍານີ້ ແລະຄັດຄ້ານກິດຈະກຳຝ່າຍດຽວຕ່າງໆທີ່ປ່ຽນສັນຍາຫຼາຍຝ່າຍດັ່ງກ່າວ. ທ່ານຢັ້ງຢືນວ່າ: ຣັດເຊຍຄັດຄ້ານການເອົາບັນຫານິວເຄຼຍອີຣານພົວພັນກັບກິດຈະກຳປ້ອງກັນຊາດ ແລະວຽກງານອື່ນໆ.