ນັບແຕ່ວັນທີ 2-3 ພະຈິກນີ້, ທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ,ທູດພິເສດຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເດີນທາງຢ້ຽມຢາມລາວເພື່ອແຈ້ງຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໂດຍໃນ ວັນທີ 2 ພະຈິກ, ທ່ານບຸນຍັງວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຊົ້ງທ່າວ.
ໂອກາດດັ່ງກ່າວ, ທ່ານຊົ້ງທ່າວໄດ້ສົ່ງຂໍ້ຄວາມຂອງທ່ານເລຂາທິການໃຫຍ່ສີຈິ້ນຜິງເຖິງທ່ານບຸນຍັງວໍລະຈິດໂດຍໄດ້ເນັ້ນວ່າ ຈາກການຊີ້ນຳຕາມເນື້ອໃນຈິດໃຈກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19, ພັກແລະປະຊາຊົນຈີນຈະປະກອບສ່ວນໃໝ່ເຂົ້າໃນການຊຸກຍູ້ການກໍ່ສ້າງສາຍພົວພັນສາກົນແບບໃໝ່, ການສ້າງປະຊາຄົມຮ່ວມຊາຕາກຳມວນມະນຸດໃຫ້ຫຼາຍກວ່າເກົ່າ. ແນວໃດກໍດີ, ຈີນຍິນດີຮ່ວມກັບລາວສືບຕໍ່ຍຶດໝັ້ນທິດທາງ "ໝັ້ນຄົງຍາວນານ,ມິດຕະພາບຖານບ້ານໃກ້ເຮືອນຄຽງ,ໄວ້ເນື້ອເຊື່ອໃຈກັນ,ຮ່ວມມືຮອບດ້ານ" ແລະຈິດໃຈ "ເພື່ອນບ້ານທີ່ດີ, ໝູ່ເພື່ອນທີ່ດີ, ສະຫາຍທີ່ດີແລະຄູ່ຮ່ວມມືທີ່ດີ", ສ້າງຄູ່ຮ່ວມຊາຕາກຳຈີນ-ລາວຢ່າງໝັ້ນແກ່ນ, ຊຸກຍູ້ພາລະກິດສັງຄົມນິຍົມໃຫ້ກ້າວເຂົ້າສູ່ສະພາບໃໝ່. ຂະນະດຽວກັນ, ທ່ານຊົ້ງທ່າວຍັງໄດ້ແຈ້ງເນື້ອໃນຈິດໃຈສຳຄັນຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໃຫ້ຊາບອີກດ້ວຍ.
ທ່ານບຸນຍັງວໍລະຈິດຢືນຢັນວ່າ ລາວຕີລາຄາສູງຕໍ່ຜົນສຳເລັດທີ່ຍິ່ງໃຫຍ່ຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ກໍຄືແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ທີ່ໄດ້ປະກອບສ່ວນດ້ານທິດສະດີເພື່ອພາລະກິດສັງຄົມນິຍົມຂອງໂລກ ແລະຍິນດີຖອດຖອນບົດຮຽນທິດສະດີຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນກໍຄືຜົນສຳເລັດໃໝ່ໃນການປະຕິບັດຕົວຈິງແລະການປະດິດສ້າງກໍຄືການເພີ່ມທະວີການແລກປ່ຽນແລະການຮ່ວມມືລະຫວ່າງສອງພັກເພື່ອຮ່ວມກັນສ້າງຄູ່ຮ່ວມຊາຕາກຳລາວ-ຈີນ.
