ວັນທີ 3 ພະຈິກນີ້, ທ່ານຫງວຽນຟູຈອງ, ເລຂາທິການໃຫຍ່ສູນກາງພັກກອມມູນິດຫວຽດນາມ, ແລະທ່ານຫງວຽນຊວນຟຸກ, ນາຍົກລັດຖະມົນຕີຫວຽດນາມຕ່າງໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຫວາງອີ້, ລັດຖະມົນຕີກະຊວງການຕ່າງປະເທດຈີນ.
ທ່ານຫງວຽນຟູຈອງ ແລະ ທ່ານຫງວຽນຊວນຟຸກ ໄດ້ສະແດງຄວາມຊົມເຊີຍຢ່າງສຸດໃຈຕໍ່ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ຮັບຜົນສຳເລັດຢ່າງຈົບງາມ, ແລະຊົມເຊີຍແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ໄດ້ຖືກກຳນົດປັນແນວຄິດຊີ້ນຳນຳພາຂອງພັກກອມມູນິດຈີນ, ໂດຍກ່າວວ່າ ຫວຽດນາມຈະຮ່ຳຮຽນ ແລະຊາບຊຶມໃຈກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ຖອດຖອນບົດຮຽນທີ່ດີ ແລະໄດ້ຮັບຜົນສຳເລັດມາແລ້ວເພື່ອຊຸກຍູ້ພັດທະນາພາລະກິດສັງຄົມນິຍົມຂອງຕົນ. ຫວຽດນາມໃຫ້ຄວາມສຳຄັນສູງຕໍ່ທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນຈະໄປເຂົ້າຮ່ວມກອງປະຊຸມທີ່ບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີປາຊີຟິກຢູ່ຫວຽດນາມ, ທັງຢ້ຽມຢາມຫວຽດນາມທາງລັດຖະກິດ, ຫວຽດນາມຈະສຸມທຸກຄວາມພະຍາຍາມ ແລະກະກຽມຢ່າງຕັ້ງໜ້າ ເພື່ອຮັບປະກັນການຢ້ຽມຢາມຂອງທ່ານສີຈິ້ນຜິງຄັ້ງນີ້ໃຫ້ໄດ້ຮັບຜົນສຳເລັດຢ່າງຈົບງາມ.
ທ່ານຫວາງອີ້ສະແດງຄວາມຂອບໃຈຕໍ່ຝ່າຍຫວຽດນາມທີ່ສົນໃຈໃນລະດັບສູງ ແລະຊົມເຊີຍຢ່າງສຸດໃຈຕໍ່ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ຈາກນັ້ນກໍໄດ້ແຈ້ງຈິດໃຈຫຼັກຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໃຫ້ຊາບ, ທັງກ່າວວ່າ ທ່ານສີຈິ້ນຜິງໄປຢ້ຽມຢາມຫວຽດນາມ ເຊິ່ງເປັນປະເທດທຳອິດທີ່ທ່ານອອກເດີນທາງຢ້ຽມຢາມຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ເຊິ່ງສະແດງໃຫ້ເຫັນວ່າ ຈີນໃຫ້ຄວາມສຳຄັນສູງຕໍ່ສາຍພົວພັນຈີນ-ຫວຽດນາມ. ຫວັງວ່າການຢ້ຽມຢາມຄັ້ງນີ້ຈະແລກປ່ຽນດ້ານຍຸດທະສາດ, ເສີມສ້າງຄວາມໄວ້ເນື້ອເຊື່ອໃຈທາງການເມືອງ, ອອກແບບ ແລະ ວາງແຜນລວມເພື່ອຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບຫວຽດນາມ, ຊຸກຍູ້ສາຍພົວພັນລະຫວ່າງສອງພັກສອງລັດໃຫ້ຂຶ້ນສູ່ລະດັບສູງກວ່າເກົ່າ.
 |
