ວັນທີ 3 ພະຈິກນີ້, ກອງປະຊຸມເວທີປຶກສາຫາລືປັກກິ່ງຄັ້ງທີ 14 (2017)ໄດ້ຈັດຂຶ້ນຢູ່ຫໍຮັບແຂກເມືອງຕ້ຽວອີໄທທີ່ນະຄອນຫຼວງປັກກິ່ງ ໂດຍເຈົ້າໜ້າທີ່ລັດຖະບານ, ບຸກຄົນສຳຄັນທາງການເມືອງ ແລະຜູ້ຊ່ຽວຊານ ນັກວິຊາການທັງໝົດ 300 ກວ່າທ່ານທີ່ມາຈາກ 50 ກວ່າປະເທດ ແລະເຂດແຄວ້ນ, ເຊັ່ນ: ຈີນ, ຣັດເຊຍ, ຍີ່ປຸ່ນ, ເອຢິບ, ປາກິສະຖານ ແລະອື່ນໆເຂົ້າຮ່ວມ ເພື່ອສຸມໃສ່ປຶກສາຫາລືກ່ຽວກັບຄຸນຄ່າ ແລະລະບຽບການໃນຂະບວນການພັດທະນາ ແລະປ່ຽນແປງຂອງສັງຄົມມະນຸດ, ແລະຄົ້ນຄວ້າວິທີການໃໝ່ຂອງການແລກປ່ຽນລະຫວ່າງອະລິຍະທຳຕ່າງໆ, ທັງຊອກຫາຊ່ອງທາງການພັດທະນາ ແລະກ້າວໜ້າໃໝ່ຂອງສັງຄົມມະນຸດ.
ຫົວຂໍ້ຂອງເວທີປຶກສາຫາລືຄັ້ງນີ້ແມ່ນ "ຄວາມກົມກຽວລະຫວ່າງອະລິຍະທຳຕ່າງໆ ແລະຄວາມຈະເລີນຮຸ່ງເຮືອງພ້ອມກັນ - ຄຸນຄ່າ ແລະລະບຽບການໃນຂະບວນການປ່ຽນແປງ". ໃນໄລຍະກອງປະຊຸມທີ່ຈະດຳເນີນເປັນເວລາ 3 ມື້, ຜູ້ເຂົ້າຮ່ວມກອງປະຊຸມຈະຄົ້ນຄວ້າຫາລືກ່ຽວກັບຫົວຂໍ້ຕ່າງໆໃນ 8 ເວທີປຶກສາຫາລືຍ່ອຍ, ເຊັ່ນ: "ການຫັນປ່ຽນຮູບແບບຂອງສັງຄົມໃນວິໄສທັດປະຫວັດສາດ ແລະ ທົ່ວໂລກ", "'ໜຶ່ງແລວທາງໜຶ່ງເສັ້ນທາງ' ໃນແງ່ມູມການສືບທອດ ແລະແລກປ່ຽນ ອະລິຍະທຳ" "ກຳລັງຊຸກດັນການພັດທະນາເສດຖະກິດໃນສະພາບການທີ່ພວມເກີດການປ່ຽນແປງ" ແລະ ອື່ນໆ.
ທ່ານຫວາງເຈ່ຍຣຸ້ຍ, ຮອງປະທານສະພາປຶກສາການເມືອງປະຊາຊົນແຫ່ງຊາດຈີນໄດ້ປາໄສ ໂດຍຫວັງວ່າເວທີປຶກສາຫາລືປັກກິ່ງຈະສືບຕໍ່ຄົ້ນຄວ້າຫາລືຫົວຂໍ້ຕ່າງໆຢ່າງຮອບດ້ານ ແລະຫຼາຍລະດັບ, ສືບຕໍ່ສົ່ງເສີມທັດສະນະ "ຄວາມກົມກຽວລະຫວ່າງອະທິຍະທຳ ແລະຄວາມຈະເລີນຮຸ່ງເຮືອງຮ່ວມກັນ", ເພື່ອຊອກຫາວິທີໃໝ່ຂອງການແລກປ່ຽນລະຫວ່າງອະລິຍະທຳຕ່າງໆ, ຄົ້ນຄວ້າຊ່ອງທາງໃໝ່ສຳລັບການພັດທະນາ ກ້າວໜ້າຂອງສັງຄົມມະນຸດ, ປະກອບສ່ວນຫຼາຍກວ່າເກົ່າເຂົ້າໃນການສ້າງປະຊາຄົມຮ່ມຊາຕາກຳຂອງມວນມະນຸດ ແລະພາລະກິດສູງສົ່ງແຫ່ງສັນຕິພາບ ແລະການພັດທະນາຂອງມວນມະນຸດ.
 |
