ວັນທີ 3 ພະຈິກນີ້, ທ່ານນາງລິວຢຽນຕຸ່ງ ຮອງນາຍົກລັດຖະມົນຕີຈີນໄດ້ປາໄສໃນພິທີເປີດກອງປະຊຸມສະຫະພາບວິທະຍຸອາຊີປາຊີຟິກຄັ້ງທີ 54 ທີ່ຈັດຂຶ້ນຢູ່ເມືອງເສິງຕູ່ແຂວງເສສວນ ສປ ຈີນໂດຍເນັ້ນວ່າ ສື່ມວນຊົນບັນດາປະເທດຄວນກ້າແບກຫາບໜ້າທີ່ຮັບຜິດຊອບທາງສັງຄົມ,ເພີ່ມທະວີການເຊື່ອມສານດ້ານຈິດໃຈແລະຄວາມເຂົ້າໃຈກັນລະຫວ່າງປະຊາຊົນ, ຮັດແໜ້ນສາຍພົວພັນແບບໃໝ່ລະຫວ່າງຊາດແລະມິດຕະພາບລະຫວ່າງປະຊາຊົນເພື່ອປະກອບສ່ວນໃໝ່ເຂົ້າໃນການສ້າງປະຊາຄົມຮ່ວມຊາຕາກຳມວນມະນຸດ, ຊຸກຍູ້ການຄຸ້ມຄອງທົ່ວໂລກຮ່ວມແລະສົ່ງເສີມສັນຕິພາບແລະຄວາມຈະເລີນຮຸ່ງເຮືອງຂອງໂລກ.
ໂອກາດພົບປະກັບຜູ້ຮັບຜິດຊອບຂອງອົງການຈັດຕັ້ງສາກົນຕ່າງໆເປັນຕົ້ນສະຫະພາບວິທະຍຸອາຊີປາຊີຟິກ,ສະຫະພາບວິທະຍຸປະເທດອາຣັບ,ສະຫະພາບວິທະຍຸອາຟຣິກກາ, ສະຫະພາບວິທະຍຸເອີຣົບແລະອື່ນໆ, ທ່ານນາງລິວຢຽນຕຸ່ງຊີ້ໃຫ້ເຫັນວ່າ: ການພັດທະນາຂອງຈີນແຍກອອກຈາກໂລກບໍ່ໄດ້, ຄວາມຈະເລີນຮຸ່ງເຮືອງຂອງໂລກກໍຕ້ອງການຈີນເຊັ່ນດຽວກັນ. ສື່ມວນຊົນບັນດາປະເທດແລະອົງການຈັດຕັ້ງສາກົນຄວນຍຶດໝັ້ນທັດນະນະຄະຕິປຶກສາຮ່ວມ, ກໍ່ສ້າງຮ່ວມແລະແບ່ງປັນຮ່ວມເພື່ອເສີມຂະຫຍາຍບົດບາດທີ່ເປັນເວທີແລະຂົວຕໍ່ໃຫ້ມີປະສິດທິຜົນຫຼາຍຂຶ້ນ.
ທ່ານນາງລິວຢຽນຕຸ່ງມີຂໍ້ລິເລີ່ມວ່າ ສື່ມວນຊົນບັນດາປະເທດຄວນນຳສະເໜີຂໍ້ມູນຂ່າວສານທີ່ແທ້ຈິງ,ຖືກຕ້ອງ,ຮອບດ້ານແລະນອກຕົວເພື່ອສົ່ງສຽງຍຸກສະໄໝທີ່ພັດທະນາໂດຍສັນຕິ, ເຕົ້າໂຮມກຳລັງທຸກຝ່າຍເພື່ອຮ່ວມກັນບັນລຸຄວາມຝັນໃຫ້ເປັນຄວາມຈິງ, ຂະຫຍາຍການຮ່ວມມືລະຫວ່າງສື່ມວນຊົນໃຫ້ກວ້າງອອກແລະເລິກເຊິ່ງຍິ່ງຂຶ້ນ, ສົ່ງເສີມການແລກປ່ຽນແລະຖອດຖອນບົດຮຽນເຊິ່ງກັນແລະກັນລະຫວ່າງອະລິຍະທຳຕ່າງໆເພື່ອປະກອບສ່ວນເຂົ້າໃນການສ້າງໂລກໃຫ້ມີສັນຕິພາບຖາວອນ, ໝັ້ນຄົງທົ່ວໄປ,ຈະເລີນຮຸ່ງເຮືອງຮ່ວມກັນ, ເປີດປະຕູ,ກວມລວມ,ສະອາດແລະສວຍງາມໃຫ້ຫຼາຍກວ່າເກົ່າ.
ກອງປະຊຸມໃຫຍ່ຄັ້ງນີ້ມີຫົວຂໍ້ວ່າ ສື່ມວນຊົນໃນຍຸກປ່ຽນແປງໃໝ່ ເຊິ່ງມີຜູ້ຕາງໜ້າ 600 ກວ່າທ່ານມາຈາກ 60 ກວ່າປະເທດແລະເຂດແຄວ້ນພ້ອມດ້ວຍອົງການຈັດຕັ້ງສາກົນ 9 ແຫ່ງເຂົ້າຮ່ວມ.