ວັນທີ 3 ພະຈິກນີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານບິວ ເກັສ, ຜູ້ອຳນວຍການໃຫຍ່ບໍລິສັດພະລັງງານເທຣາ ທັງເປັນຜູ້ປະດິດສ້າງບໍລິສັດມິກໂຣຊອບຂອງອາເມລິກາຢູ່ທຳນຽບຈົ່ງນານໄຫທີ່ນະຄອນຫຼວງປັກກິ່ງ.
ທ່ານຫຼີເຄີ້ສຽງກ່າວວ່າ, ຈີນ ແລະອາເມລິກາໄດ້ຮ່ວມມືເປັນຢ່າງດີໃນຂົງເຂດຄົ້ນຄວ້າພັດທະນາເຕັກໂນໂລຊີໄຟຟ້ານິວເຄຼຍລຸ້ນໃໝ່, ວິສາຫະກິດສອງປະເທດໄດ້ສ້າງບໍລິສັດຮ່ວມທຶນ ໂດຍຖືຮຸ້ນຝ່າຍລະ 50%, ແລະເປັນເຈົ້າຂອງສິດຊັບສິນທາງປັນຍາຮ່ວມກັນ. ນີ້ເປັນຜົນງານທີ່ມີລັກສະນະສ້າງສັນຂອງການຮ່ວມມືໃນຂົງເຂດໄຮເທັກລະຫວ່າງສອງປະເທດ, ເປັນການຮ່ວມມືບົນພື້ນຖານແຫ່ງຄວາມສະໝັກໃຈ, ເຊິ່ງສະແດງໃຫ້ເຫັນວ່າທັງສອງຝ່າຍມີທ່າທີເປີດປະຕູ. ອາເມລິກາມີເຕັກໂນໂລຊີທີ່ນຳໜ້າໃນປັດຈຸບັນ, ຈີນມີກຳລັງບົ່ມຊ້ອນດ້ານສະຕິປັນຍາ, ເຊື່ອວ່າຈະເປັນການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ທ່ານບິວ ເກັສກ່າວວ່າ, ພະລັງງານນິວເຄຼຍລຸ້ນໃໝ່ມີຄວາມສຳຄັນເປັນພິເສດຕໍ່ການພັດທະນາເຕັກໂນໂລຊີພະລັງງານຂອງມວນມະນຸດໃນອະນາຄົດ, ຕ້ອງຮັບປະກັນໃຫ້ການສະໜອງພະລັງງານມີຄວາມສະອາດ, ປອດໄພ ແລະໄວ້ວາງໃຈໄດ້. ພວກເຮົາທະນຸຖະໜອມທີ່ສຸດຕໍ່ການຮ່ວມມືກັບວິສາຫະກິດຈີນໃນຂົງເຂດທີ່ກ່ຽວຂ້ອງ, ໃຫ້ຄວາມສຳຄັນສູງ ແລະຫວັງວ່າຈະນຳໃຊ້ທ່າແຮງດ້ານຊັບພະຍາກອນມະນຸດຂອງຈີນໃຫ້ດີຢ່າງເຕັມສ່ວນ, ຍິນດີຖືທ່າທີເປີດປະຕູຕໍ່ໄປ, ເພື່ອເຮັດໃຫ້ວິໄສທັດແຫ່ງການຮ່ວມມືກາຍເປັນຄວາມຈິງທີ່ດີງາມ.
