ກ່ອນທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນຈະເດີນທາງໄປນະຄອນດານັງປະເທດຫວຽດນາມເພື່ອເຂົ້າຮ່ວມກອງປະຊຸມບໍ່ເປັນທາງການຜູ້ນຳອົງການເອເປັກຄັ້ງທີ 25 ແລະຢ້ຽມຢາມຫວຽດນາມທາງລັດຖະກິດນັ້ນ, ທ່ານຫົງສ້ຽວຢຸງ ເອກອັກຄະລັດຖະທູດຈີນປະຈຳຫວຽດນາມໃຫ້ສຳພາດຕໍ່ນັກຂ່າວວ່າ, ນີ້ແມ່ນຜູ້ນຳຈີນທີ່ເຂົ້າຮ່ວມກອງປະຊຸມສາກົນຫຼາຍຝ່າຍແລະຢ້ຽມຢາມຕ່າງປະເທດເປັນຄັ້ງທຳອິດຫຼັງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ອັດລົງດ້ວຍຜົນສຳເລັດ, ແມ່ນການ ເປີດສາກວຽກງານການຕ່າງປະເທດໃນຖານະປະເທດໃຫຍ່ທີ່ມີສີສັນພິເສດຂອງຈີນ, ຈະສະແດງໃຫ້ເຫັນເຖິງເນື້ອໃນອັນອຸດົມສົມບູນຂອງວຽກງານການຕ່າງປະເທດໃນຖານະປະເທດໃຫຍ່ທີ່ມີສີສັນພິເສດຂອງຈີນໃນຍຸກໃໝ່ຕໍ່ທົ່ວໂລກ.
ທ່ານຫົງສ້ຽວຢຸງກ່າວວ່າ, ໃນໄລຍະປະຊຸມຢູ່ນະຄອນດານັງ, ທ່ານສີຈິ້ນຜິງ ປະທານປະເທດຈີນຈະເຂົ້າຮ່ວມກອງປະຊຸມສຸດຍອດຜູ້ນຳອຸດສາຫະກຳການຄ້າ APEC ແລະປາໄສ, ສະແດງຈຸດຢືນແລະແຜນພັດທະນາຂອງປະເທດຈີນ.
ເມື່ອກ່າວເຖິງການຈະຢ້ຽມຢາມຫວຽດນາມທາງລັດຖະກິດຂອງທ່ານສີຈິ້ນຜິງໃນຄັ້ງນີ້, ທ່ານຫົງສ້ຽວຢຸງກ່າວວ່າ, ທ່ານສີຈິ້ນຜິງຈະພົບປະເຈລະຈາກັບທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມລວມທັງຜູ້ນຳພັກແລະລັດຫວຽດນາມທ່ານອື່ນໆ, ທັງຈະແລກປ່ຽນຄວາມເຫັນຢ່າງເລິກເຊິ່ງກ່ຽວກັບການລົງເລິກແລກປ່ຽນຍຸດທະສາດລະຫວ່າງພັກແລະລັດສອງປະເທດ, ເພີ່ມທະວີການແລກປ່ຽນບົດຮຽນການຄຸ້ມຄອງພັກແລະລັດ, ຊຸກຍູ້ຍຸດທະສາດພັດທະນາທີ່ສຳຄັນເພື່ອການເຊື່ອມຈອດກັນ, ເປີດກວ້າງການຮ່ວມມືໃຫ້ຕິດແທດຕົວຈິງ, ກໍຄືການເປີດກວ້າງການແລກປ່ຽນດ້ານວັດທະນະທຳແລະບັນຫາພາກພື້ນແລະສາກົນທີ່ສອງຝ່າຍສົນໃຈ.
