ໂດຍຕອບສະໜອງຕາມຄຳເຊີນຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ສປປ ລາວ, ສະຫາຍສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ ສປ ຈີນຈະຢ້ຽມຢາມ ສປປ ລາວທາງລັດຖະກິດແຕ່ວັນທີ 13-14 ພະຈິກນີ້ ເຊິ່ງຈະເປັນການຢ້ຽມຢາມ ສປປ ລາວຂອງການນຳສູງສຸດຂອງພັກລັດຈີນໃນຮອບ 11 ປີແລະໃນໂອກາດວດັ່ງກ່າວ. ວັນທີ 7 ພະຈິກນີ້ ທ່ານວາງເວີນທ່ຽນ ເອກອັກຄະລັດຖະທູດຈີນປະຈຳ ສປປ ລາວໄດ້ໃຫ້ສຳພາດຕໍ່ນັກຂ່າວຈີນແລະຕ່າງປະເທດຢູ່ນະຄອນຫຼວງວຽງຈັນ ໂດຍກ່າວວ່າ, ການຢ້ຽມຢາມຄັ້ງນີ້ສະແດງໃຫ້ເຫັນວ່າ, ພັກແລະລັດຖະບານຈີນໃຫ້ຄວາມສຳຄັນສູງຕໍ່ການເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວ, ສອງປະເທດຈະສືບຕໍ່ສ້າງປະຊາຄົມຮ່ວມຊາຕາກຳຈີນ-ລາວທີ່ໝັ້ນແກ່ນທີ່ສຸດ. ຕໍ່ໄປ ເຊີນທ່ານຟັງລາຍລະອຽດບົດສຳພາດຂ່າວ.
ປະເທດລາວແມ່ນປະເທດໜຶ່ງໃນການຢ້ຽມຢາມຕ່າງປະເທດຄັ້ງທຳອິດຂອງສະຫາຍສີຈິ້ນຜິງຫຼັງຈາກສຳເລັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ. ທ່ານເອກອັກຄະລັດຖະທູດ ວາງເວີນທ່ຽນເຫັນວ່າ, ການຢ້ຽມຢາມຄັ້ງນີ້ມີຄວາມໝາຍສຳຄັນຍິ່ງຕໍ່ສອງພັກ ສອງລັດແລະປະຊາຊົນສອງປະເທດຈີນ-ລາວ. ທ່ານກ່າວວ່າ:
ໜຶ່ງໄດ້ສະແດງໃຫ້ເຫັນວ່າ ພັກແລະລັດຖະບານຈີນໃຫ້ຄວາມສຳຄັນ ສູງຕໍ່ການເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວ. ຫຼັງຈາກປິດກອງປະຊຸມໃຫຍ່ຜູ້ແທນທົ່ວປະເທດຄັ່ງທີ 19 ຂອງພັກກອມມູນິດຈີນຢ່າງມີໄຊ, ສະຫາຍສີຈິ້ນຜິງ ເລຂາທິການໃຫຍູ່ສູນກາງພັກກອມມູນິດຈີນ ປະທານປະເທດ ສປ ຈີນກໍມາຢ້ຽມຢາມລາວ ສະແດງໃຫ້ເຫັນເຖິງຈຸດນີ້ຢ່າງເຕັມສ່ວນ; ສອງສະແດງໃຫ້ເຫັນວ່າຈີນສະໜັບສະໜູນພັກແລະລັດຖະບານລາວຢ່າງເດັດດ່ຽວ. ຈີນ ແລະລາວລ້ວນແຕ່ແມ່ນປະເທດສັງຄົມນິຍົມ, ມີອຸດົມການຄືກັນ ແລະເສັ້ນທາງພັດທະນາຄ້າຍຄືກັນ,. ການຢ້ຽມຢາມຂອງສະຫາຍສີຈິ້ນຜິງໃນຄັ້ງນີ້ຢືນຢັນໃຫ້ເຫັນແລ້ວວ່າ ຈີນຍິນດີສືບຕໍ່ສະໜັບສະໜູນພັກ ແລະລັດຖະບານລາວ, ສືບຕໍ່ສະໜັບສະໜູນພາລະກິດປ່ຽນແປງໃໝ່ ແລະການສ້າງສັງຄົມນິຍົມຂອງພັກປະຊາຊົນປະຕິວັດລາວຢ່າງເດັດດ່ຽວ, ສືບຕໍ່ສະໜັບສະໜູນລາວ ໃນການຊອກຄົ້ນເສັ້ນທາງພັດທະນາທີ່ສອດຄ່ອງກັບສະພາບຂອງຊາດຕົນເອງ.
ໃນບົດລາຍງານຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ສະຫາຍເລຂາທິການໃຫຍ່ສີຈິ້ນຜິງໄດ້ຍົກໃຫ້ເຫັນແຜນການດ້ານຄວາມຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນໃນຍຸກໃໝ່ ໂດຍຊີ້ອອກວ່າ ການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນຄືຈະຊຸກຍູ້ການສ້າງສາຍພົວພັນສາກົນແບບໃໝ່, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ທ່ານວາງເວີນທ່ຽນກ່າວວ່າ, ຜ່ານຈາກການຢ້ຽມຢາມຄັ້ງນີ້, ສອງຝ່າຍຈະຮ່ວມກັນວາງແຜນອັນຍິ່ງໃຫຍ່ເພື່ອໃຫ້ສາຍພົວພັນລະຫວ່າງສອງພັກແລະສອງລັດຂະຫຍາຍຕົວໃນຍຸກໃໝ່, ກຳນົດຈຸດສຳຄັນຂອງທິດທາງການຮ່ວມມືໃນອະນາຄົດ, ເພື່ອໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານທີ່ຕ່າງໄວ້ເນື້ອເຊື່ອໃຈກັນ, ຊ່ວຍເຫຼືອກັນ ແລະຕ່າງຝ່າຍຕ່ງມີຜົນປະໂຫຍດນັ້ນມີເນື້ອໃນອຸດົມສົມບູນ ແລະຂະຫຍາຍຕົວຕໍ່ໄປ.
ທ່ານວາງເວີນທ່ຽນກ່າວວ່າ: "ພາຍໃຕ້ສະຖານະການໃໝ່ຂອງຍຸກໃໝ່, ຈີນຈະສືບຕໍ່ຍຶດໝັ້ນທິດທາງ "ໝັ້ນຄົງຍາວນານ, ມີມິດຕະພາບຖານບ້ານໃກ້ເຮືອນຄຽງ, ໄວ້ເນື້ອເຊື່ອໃຈກັນ ແລະຮ່ວມມືຮອບດ້ານ "ແລະທິດນຳ "4 ດີ"ເປັນການຊີ້ນຳ, ລົງເລິກການພົວພັນຄູ່ຮ່ວມມືຍຸດທະສາດຮອບດ້ານກັບລາວ, ສືບຕໍ່ສ້າງປະຊາຄົມຮ່ວມຊາຕາກຳທີ່ໝັ້ນແກ່ນທີ່ສຸດ ແລະມີຄວາມໝາຍຍຸດທະສາດລະຫວ່າງຈີນ-ລາວ."
ເຊັ່ນດຽວກັນກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ, ລັດຖະບານລາວໄດ້ວາງຍຸດທະສາດແຫ່ງຊາດທີ່ຫັນຈາກປະເທດທີ່ບໍ່ມີທາງອອກສູ່ທະເລກາຍເປັນປະເທດທີ່ເຊື່ອມຕໍ່ອະນຸພາກພື້ນ. ໃນໄລຍະຈັດເວທີປຶກສາຫາລືສຸດຍອດກ່ຽວກັບການຮ່ວມມືສາກົນ ໜຶ່ງແລວທາງໜຶ່ງເສັ້ນທາງໃນເດືອນພຶດສະພາປີນີ້, ສະຫາຍປະທານສີຈິ້ນຜິງ ແລະສະຫາຍປະທານບຸນຍັງ ວໍລະຈິດໄດ້ເປັນເອກະພາບກ່ຽວກັບການຮ່ວມກັນຊຸກຍູ້ການສ້າງ ໜຶ່ງແລວທາງໜຶ່ງເສັ້ນທາງ. ເຊິ່ງລັດຖະບານສອງປະເທດໄດ້ເຊັນແຜນການຮ່ວມມືສອງຝ່າຍ ໜຶ່ງແລວທາງໜຶ່ງເສັ້ນທາງ, ຫຼັກການຊີ້ນຳການລະດົມທຶນ ໜຶ່ງແລວທາງໜຶ່ງເສັ້ນທາງ ແລະເອກະສານອື່ນໆ.
ທ່ານກ່າວວ່າ: ຈີນແລະລາວເພີ່ມທະວີການຮ່ວມມືດ້ານພື້ນຖານໂຄງລ່າງເພື່ອເຊື່ອມຈອດກັນ, ມີຜົນດີຕໍ່ການແກ້ໄຂບັນຫາລະບົບຄົມມະນາຄົມທີ່ຫຍຸ້ງຍາກຕໍ່ການພັດທະນາເສດຖະກິດຂອງລາວ, ຫຼຸດຕົ້ນທຶນການຈໍລະຈອນສິນຄ້າໃຫ້ໜ້ອຍລົງ, ເພື່ອສ້າງປະເທດລາວໃຫ້ເປັນທາງຜ່ານທາງບຸກຄະລາກອນ ແລະສິນຄ້າຂອງແຫຼມອິນດູຈີນ, ໃນທີ່ສຸດກໍບັນລຸຍຸດທະສາດການຫັນຈາກປະເທດທີ່ບໍ່ມີທາງອອກສູ່ທະເລກາຍເປັນປະເທດທີ່ເຊື່ອມຕໍ່ອະນຸພາກພື້ນຂອງລາວ, ແລ້ວດຶງດູດໃຫ້ທຶນຮອນ ເຕັກນິກກ້າວໜ້າ ແລະຊັບພະຍາກອນມະນຸດເຂົ້າສູ່ປະເທດລາວຫຼາຍກວ່າເກົ່າ. ທາງລົດໄຟຈີນ-ລາວກໍແມ່ນໂຄງການສັນຍະລັກທີ່ເຮັດໃຫ້ຍຸດທະສາດພັດທະນາຂອງສອງປະເທດເຊື່ອມຈອດກັນ, ສະນັ້ນຈຶ່ງມີຄວາມໝາຍ ແລະມີບົດບາດສຳຄັນທີ່ສຸດ. ທາງລົດໄຟຈີນ-ລາວຈະກາຍເປັນສາຍເລືອດທີ່ເຊື່ອມຕໍ່ກັບການຮ່ວມມືດ້ານເສດຖະກິດການຄ້າຈີນ-ລາວ, ຍົກລະດັບການໄປມາຫາສູ່ກັນລະຫວ່າງບຸກຄະລາກອນ ແລະການຈໍລະຈອນສິນຄ້າຂອງສອງປະເທດໃຫ້ເປັນຮູບປະທຳ, ຊຸກຍູ້ຂະແໜງການຕ່າງໆພັດທະນາໄປພ້ອມກັນ. ຂ້າພະເຈົ້າເຫັນວ່າ, ການສ້າງທາງລົດໄຟຈີນ-ລາວໃຫ້ສຳເລັດແລະເປີດບໍລິການຈະສາມາດນຳເອົາຄວາມສະດວກສະບາຍໃນການສ້າງແລວທາງເສດຖະກິດຈີນ-ລາວ.
ທ່ານວາງເວີນທ່ຽນຍັງກ່າວຕື່ມວ່າ, ປັດຈຸບັນ ລະບົບອຸດສາຫະກຳຂອງລາວຍັງບໍ່ຄົບຖ້ວນສົມບູນປານໃດ, ຜະລິດຕະພັນຈຳນວນຫຼາຍຍັງອີງໃສ່ການນຳເຂົ້າ, ສະນັ້ນ ການທີ່ສອງຝ່າຍຮ່ວມມືກັນທາງດ້ານຄວາມສາມາດການຜະລິດໃນຂົງເຂດໄຟຟ້ານ້ຳຕົກ, ພະລັງງານໄຟຟ້າ, ໂທລະຄົມມະນາຄົມ, ກົນຈັກວິສະວະກຳແລະຂົງເຂດອື່ນໆເປັນຜົນດີຕໍ່ການເຮັດໃຫ້ສອງປະເທດບັນລຸການຍົກລະດັບຂະແໜງການອຸດສາຫະກຳໄດ້.
ໃນໂອກາດທີ່ ສປປ ລາວກຳນົດປີ 2018 ເປັນປີທ່ອງທ່ຽວລາວ, ທ່ານເອກອັກຄະລັດຖະທູດ ວາງເວີນທຽນກ່າວວ່າ, ຈີນຈະຕັ້ງໜ້າປະສານສົມທົບກັບລາວເພື່ອຊຸກຍູ້ການປະຕິບັດຂໍ້ຕົກລົງດັ່ງກ່າວເພື່ອເປັນຜົນດີຕໍ່ການຊຸກຍູ້ການພັດທະນາເສດຖະກິດ, ການສ້າງວຽກເຮັດງານທຳ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ທ່ານກ່າວໃນສຸດທ້າຍວ່າ: ໜຶ່ງແມ່ນອີງຕາມຄວາມເປັນເອກພາບກັນຂອງການນຳສອງປະເທດ, ແລ້ວຈະຊ່ວຍເຫຼືອລາວເລັ່ງລັດວາງແຜນພັດທະນາການທ່ອງທ່ຽວລາວ; ສອງແມ່ນເລັ່ງລັດຊ່ວຍປະເທດລາວສ້າງສະຖາບັນອົບຮົມການທ່ອງທ່ຽວ, ເພື່ອອົບຮົມຜູ້ມີຄວາມຮູ້ຄວາມສາມາດດ້ານການທ່ອງທ່ຽວໃຫ້ຫຼາຍ. ພວກເຮົາຍັງຈະເສີມຂະຫຍາຍຊັບພະຍາກອນຂອງມະຫາວິທະຍາໄລຊູໂຈ່ວ ແລະສະຖາບັນຂົງຈື້ຢູ່ລາວ, ຈັດຊຸດອົບຮົມວິຊາການການທ່ອງທ່ຽວໃຫ້ປະເທດລາວ; ສາມ ຈະເພີ່ມທະວີການແລກປ່ຽນແລະຖອດຖອນບົດຮຽນນຳກັນ, ຕັ້ງໜ້າຊຸກຍູ້ໃຫ້ຂະແໜງການທ່ອງທ່ຽວຂອງສອງປະເທດມີການແລກປ່ຽນກັນ, ເພື່ອແບ່ງປັນບົດຮຽນໃນການສ້າງເຂດທ່ອງທ່ຽວລະດັບໜຶ່ງຂອງຈີນ; ສີ່ ຈະສະໜັບສະໜູນລາວດຳເນີນການໂຄສະນາການ ທ່ອງທ່ຽວ ລາວໃຫ້ແກ່ນັກທ່ອງທ່ຽວຈີນ.
ທ່ານວາງເວີນທ່ຽນຍັງກ່າວວ່າ, ຖ້າວ່າປີໜ້າ ລາວມີແຜນຈັດກິດຈະກຳໂຄສະນາການທ່ອງທ່ຽວລາວຢູ່ຈີນ, ສະຖານທູດຈີນປະຈຳລາວຈະສະໜັບສະໜູນແລະຊ່ວຍເຫຼືອຢ່າງແຂງແຮງ.
