ແພດຊ່ຽວຊານພະແນກຕາຈາກໂຮງໝໍເຊເຫີແລະໂຮງໝໍທີໜຶ່ງທີ່ຂຶ້ນກັບມະຫາວິທະຍາໄລແພດສາດຄຸນມິງແຂວງຢຸນນານຈີນກຳລັງປະຕິບັດການຜ່າຕັດຜູ້ເປັນພະຍາດແກ່ນຕາຂຸ້ນ 300 ຄົນຈາກທົ່ວປະເທດລາວໂດຍບໍ່ເກັບຄ່າ ແລະແມ່ນກິດຈະກຳການຜ່າຕັດແກ່ນຕາຂຸ້ນຮ່ວມລະຫວ່າງແພດຊ່ຽວຊານຈີນ-ລາວຢູ່ວຽງຈັນເຊິ່ງເປັນໂຄງການຮ່ວມມືລະຫວ່າງຂະແໜງການສາທາລະນະສຸກສອງປະເທດແລະເປັນເທື່ອທຳອິດທີ່ລັດຖະບານຈີນສົ່ງແພດຊ່ຽວຊານພະແນກຕາໄປປິ່ນປົວ ຜູ້ເປັນພະຍາດແກ່ນຕາຂຸ້ນຢູ່ລາວ ໂດຍບໍ່ເກັບຄ່າ.
ຕອນບ່າຍວັນທີ 8 ພະຈິກນີ້ຢູ່ໂຮງໝໍມະໂຫສົດ ນະຄອນຫຼວງວຽງຈັນ, ທ່ານນາງຈ່າງຊຸ້ນຮວາ ທ່ານໝໍຈາກພະແນກຕາຂອງໂຮງໝໍເຊເຫີປັກກິ່ງພ້ອມເພື່ອນຮ່ວມງານໄດ້ຜ່າຕັດຜູ້ເປັນພະຍາດແກ່ນຕາຂຸ້ນໂດຍທ່ານໝໍຈ່າງຊຸ້ນຮວາໄດ້ໃຊ້ເວລາ 6-7 ນາທີກໍສຳເລັດການຜ່າຕັດດັ່ງກ່າວ.
ແມ່ຕູ້ ພັດທຳມະວົງ ອາຍຸ 67 ປີຈາກແຂວງວຽງຈັນໄດ້ເຂົ້າຜ່າຕັດໃນວັນທີ 7 ພະຈິກນີ້ ແລະວັນທີ 8 ກໍໄດ້ກັບຄືນມາກວດໃນໂຮງໝໍ.
"ຕົນເອງໄດ້ຍິນຂ່າວຜ່ານທາງວິທະຍຸ, ໂທລະພາບ ວ່າເພິ່ນມີໂຄງການປົວພະຍາດ ແກ່ນຕາຂຸ້ນຢູ່ໂຮງໝໍມະໂຫສົດລະ ແມ່ກໍມາ ແມ່ດີໃຈຫຼາຍທີ່ມີໂຄງການດີໆແບບນີ້ ມັນສາມາດ ເຮັດໃຫ້ຕາດີ ແມ່ເຫັນແຈ້ງດີແລ້ວບາດນີ້, ຮູ້ສຶກວ່າດີໃຈທີ່ສຸດປານວ່າໄດ້ເກີດໃໝ່, ຕາກໍເຫັນ ແຈ້ງດີ ແລະ ລູກກໍ່ດີໃຈຫຼາຍທີ່ເຫັນແມ່ເບິ່ງໄດ້ເຫັນແຈ້ງ. ສໍາລັບໂຄງການນີ້ແມ່ນເພິ່ນຊ່ວຍ ເຫຼືອທຸກຢ່າງທັງຄ່າເດີນທາງ, ຄ່າອາຫານ ຄືເພິ່ນຊ່ວຍໝົດທຸກຢ່າງ, ແມ່ແມ່ນບໍ່ໄດ້ເສຍ ຄ່າຫຍັງ ໃຊ້ຈ່າຍຫຍັງເລີຍ. ທ່ານໝໍເພິ່ນກໍເວົ້າດີຮັບຕ້ອນພວກເຮົາເປັນຢ່າງດີ. ແມ່ດີໃຈຫຼາຍ ຈົນສະອື້ນໃນໃຈພຸ້ນ ຮູ້ສຶກດີທີ່ມີໂຄງການດີໆແບບນີ້ມາຊ່ວຍປະຊາຊົນລາວ ແລະ ກໍ່ຢາກ ໃຫ້ມີໂຄງການແບບນີ້ຕະຫຼອດໄປ."
ໃນ 3 ມື້ຜ່ານມາ, ທ່ານໝໍ 6 ທ່ານຈາກໂຮງໝໍເຊເຫີປັກກິ່ງ ແລະໂຮງໝໍທີໜຶ່ງຂຶ້ນກັບມະຫາວິທະຍາໄລແພດສາດຄຸນມິງໄດ້ສຳເລັດການຜ່າຕັດແກ່ນຕາຂຸ້ນໃຫ້ຜູ້ເປັນພະຍາດດັ່ງກ່າວນີ້ແລ້ວ 100 ຄົນ. ຂະນະທີ່ມື້ຕໍ່ໆໄປຈະປິ່ນປົວໃຫ້ອີກປະມານ 200 ຄົນ.
ທ່ານຈົ່ງຢົງ ຫົວໜ້າພະແນກຕາຂອງໂຮງໝໍເຊເຫີທີ່ເປັນຜູ້ຮັບຜິດຊອບກິດຈະກຳການຜ່າຕັດແກ່ນຕາຂຸ້ນຮ່ວມລະຫວ່າງແພດຊ່ຽວຊານຈີນ-ລາວກ່າວວ່າ: "ກິດຈະກຳນີ້ມີຈຸດພິເສດ ຄື ເປັນການຜ່າຕັດແກ່ນຕາຂຸ້ນລະດັບຊາດ. ເນື່ອງຈາກລາວເປັນປະເທດໃກ້ຄຽງທີ່ດີ, ພວກເຮົາຈຶ່ງນຳໃຊ້ອຸປະກອນ, ວັດຖຸ ແລະແກ້ວຕາທຽມທີ່ດີທີ່ສຸດຂອງຈີນເໝືອນດັ່ງຊ່ວຍເຫຼືອອາຟລິກາໃນເມື່ອກ່ອນ ແລະຈະມອບໃຫ້ລາວ ແນວໃດກໍດີຄາດວ່າໃນແຕລະປີ, ຊ່ຽວຊານຈາກແຂວງຢຸນນານຈະເຂົ້າມາຊ່ວຍເຫຼືອຜ່າຕັດຕື່ມອີກ."
ນາງຫຼີແຢ້ນ ຫົວໜ້າພະແນກຕາໂຮງໝໍທີໜຶ່ງສັງກັດມະຫາວິທະຍາໄລແພດສາດຄຸນມິງ ທີ່ເຄີຍເຂົ້າຮ່ວມກິດຈະກຳການຜ່າຕັດແກ່ນຕາຂຸ້ນຈີນ-ລາວ ຢູ່ປະເທດອື່ນໃນອາຊີຕາເວັນອອກສຽງໃຕ້ຫວັງວ່າ, ດ້ວຍຄວາມພະຍາຍາມຮ່ວມຂອງຕົນແລະໝູ່ຮ່ວມງານ ເພື່ອເຮັດໃຫ້ຄົນເຈັບແກ່ນຕາຂຸ້ນຂອງລາວໄດ້ເຫັນແສງສະຫວ່າງຄືນໃໝ່ຫຼາຍຂຶ້ນ.
"ພວກເຮົາໄດ້ຈັດກິດຈະກຳຜ່າຕັດແກ່ນຕາຂຸ້ນຈີນ-ລາວ ມາເປັນເວລາຫຼາຍປີແລ້ວ. "ໜຶ່ງແລວທາງໜຶ່ງເສັ້ນທາງ" ບໍ່ພຽງແຕ່ສ້າງຜົນປະໂຫຍດໃຫ້ແກ່ເຂດຫ່າງໄກສອກຫຼີກພາຍໃນປະເທດເທົ່ານັ້ນ, ຫາກຍັງໄດ້ສ້າງຜົນປະໂຫຍດໃຫ້ແກ່ປະເທດໃນອາຊີຕາເວັນອອກສຽງໃຕ້ຄືກັນ. ພວກເຮົາພະຍາຍາມປິ່ນປົວຄົນເຈັບໃນປະເທດລາວ ແລະເຮັດໃຫ້ຄົນເຈັບຫຼາຍຄົນໄດ້ເຫັນແສງສະຫວ່າງ ເຊິ່ງນີ້ກໍຄືຄວາມປາຖະໜາຂອງພວກເຮົາ."
ນີ້ແມ່ນກິດຈະກຳລະດັບປະເທດ ທີ່ເປັນການຮ່ວມມືລະຫວ່າງຄະນະກຳມະການວາງແຜນຄອບຄົວຈີນ ແລະ ກະຊວງສາທາລະນະສຸກລາວ. ນາງໄພວັນ ໄຊຍະລິດ ຮອງຫົວໜ້າພະແນກຕາໂຮງໝໍມະໂຫສົດກ່າວວ່າ, ຫວັງໃຫ້ສອງປະເທດ ຮ່ວມມືໃນລັກສະນະນີ້ຫຼາຍກວ່າເກົ່າ.
"ສປ ຈີນ ໄດ້ນໍາໂຄງການແສງສະຫວ່າງເຂົ້າມາຢູ່ລາວ ກໍຄືພໍ່ແມ່ປະຊາຊົນທີ່ເປັນພະຍາດ ແກ່ນຕາຂຸ້ນ ໂຄງການນີ້ເປັນໂຄງການທີ່ດີສໍາລັບປະຊາຊົນລາວຜູ້ທີ່ດ້ອຍໂອກາດ ທີ່ຍັງບໍ່ທັນ ເຂົ້າເຖິງການປິ່ນປົວ ຈຶ່ງເຮັດໃຫ້ໄດ້ຮັບການປິ່ນປົວ ແລະ ກໍເປັນເຕັກນິກທີ່ທັນສະໄໝເຂົ້າ ໃນການປິ່ນປົວ. ຜູ້ທີ່ເປັນພະຍາດແກ່ນຕາຂຸ້ນທຸກຄົນ ເວລາເປີດຕາອອກມາ, ທຸກຄົນແມ່ນຈະເຫັນແຈ້ງສະຫວ່າງດີ. ສໍາລັບ ທ່ານໝໍລາວກໍ່ຮູ້ສຶກພູມໃຈ ທີ່ໄດ້ບົດຮຽນອັນໃໝ່ໆ. ພວກເຮົາ ຍອມຮັບເລີຍວ່າການແພດຂອງຈີນ ປັດຈຸບັນນີ້ແມ່ນກ້າວໜ້າ ແລະ ທັນສະໄໝຫຼາຍ. ພວກເຮົາຫວັງວ່າໃນອະນາຄົດວິຊາການຂອງລາວເຮົາກໍ່ຈະໄດ້ຮັບຄວາມຮ່ວມມືຊ່ວຍເຫຼືອ ແລະ ເຮັດໃຫ້ວິຊາການທາງລາວເຮົາເຂັມແຂງ."
ຂ່າວແຈ້ງວ່າ, ປີໜ້າ, ຈະສືບຕໍ່ຈັດກິດຈະກຳການຜ່າຕັດແກ່ນຕາຂຸ້ນຈີນ-ລາວຢູ່ລາວຕື່ມອີກ.
