ກ່ອນຈະຢ້ຽມຢາມ ສ.ສ ຫວຽດນາມທາງລັດຖະກິດ, ວັນທີ 9 ພະຈິກນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມນູນິດຈີນ ປະທານປະເທດຈີນໄດ້ຂຽນບົດຄວາມທີ່ພາດຫົວຂໍ້ວ່າ "ເປີດສະພາບການໃໝ່ແຫ່ງສາຍພົວພັນມິດຕະພາບຈີນ-ຫວຽດນາມ" ລົງໃນໜັງສືພິມປະຊາຊົນຫວຽດນາມ.
ບົດຄວາມຊີ້ອອກວ່າ, ຈີນແລະຫວຽດນາມໄດ້ສ້າງສາຍພົວພັນມິດຕະພາບພິເສດຖານ "ສະຫາຍແລະພີ່ນ້ອງ" ໃນການຕໍ່ສູ້ຍາດເອົາຄວາມເປັນເອກະລາດແຫ່ງຊາດແລະການປົດປ່ອຍຊົນຊາດ. ເມື່ອກ້າວເຂົ້າສູ່ໄລຍະໃໝ່, ພວກເຮົາມີຄວາມຕ້ອງການຢ່າງແຮງກ້າກວ່າທຸກໆໄລຍະທີ່ຜ່ານມາ ໃນການຈັບມື ແລະຮ່ວມກັນສະແຫວງຫາຄວາມໃຝ່ຝັນສ້າງປະເທດໃຫ້ເຂັ້ມແຂງແລະເຮັດໃຫ້ປະຊາຊົນຮັ່ງມີຂຶ້ນ. ປັດຈຸບັນ, ສະຖານະການສາກົນແລະພາກພື້ນປ່ຽນແປງເລື້ອຍໆ, ສອງພັກ ແລະສອງລັດຈີນແລະຫວຽດນາມປະເຊີນໜ້າກັບບັນຫາໃໝ່ແລະສິ່ງທ້າທາຍໃໝ່ທີ່ຄືກັນ. ຂ້າພະເຈົ້າຫວັງວ່າ, ຈາກການຢ້ຽມຢາມຄັ້ງນີ້, ຈະໄດ້ລົງເລິກແລກປ່ຽນຄວາມເຫັນກັບຜູ້ນຳ ແລະ ເພື່ອນມິດວົງການຕ່າງໆຂອງຫວຽດນາມ, ຮ່ວມກັນຂຸດຄົ້ນຄວາມສາມາດບົ່ມຊ້ອນໃນການຮ່ວມມື, ເພີ່ມພູນຄູນສ້າງມິດຕະພາບ, ລົງເລິກໄມຕີຈິດມິດຕະພາບພິເສດລະຫວ່າງສອງປະເທດ ແລະຈັບມືກັນສ້າງສະພາບການໃໝ່ແຫ່ງສາຍພົວພັນຈີນ-ຫວຽດນາມ.
ບົດຄວາມຊີ້ໃຫ້ເຫັນຕື່ມວ່າ, ຈີນສະໜັບສະໜູນຫວຽດນາມເປັນເຈົ້າພາບຈັດກອງປະຊຸມບໍ່ເປັນທາງການຜູ້ນຳອາເປັກຄັ້ງທີ 25 ທັງຍິນດີຮ່ວມກັບຫວຽດນາມແລະສະມາຊິກອື່ນໆ ປຶກສາຫາລືກັນດ້ວຍຄວາມເປັນຈິງ ກ່ຽວກັບການລົງເລິກຂະບວນການເຊື່ອມໂຍງເຂົ້າກັນທາງເສດຖະກິດພາກພື້ນ, ສ້າງເຂດການຄ້າເສລີອາຊີປາຊີຟິກ ແລະອື່ນໆ ເພື່ອໃຫ້ໄດ້ຮັບຜົນສຳເລັດທີ່ດີ ແລະເພື່ອເປັນການປະກອບສ່ວນອັນຕັ້ງໜ້າຕໍ່ການຊຸກຍູ້ການພັດທະນາແລະຄວາມຈະເລີນຮຸ່ງເຮືອງຮ່ວມກັນຂອງພາກພື້ນອາຊີປາຊີຟິກ.
 |
