ວັນທີ 9 ພະຈິກນີ້, ທ່ານ ສີຈິ້ນຜິງ ປະທານປະເທດຈີນ ໄດ້ຈັດພິທີຕ້ອນຮັບທ່ານ ໂດນັນ ທຣຳ ປະທານາທິບໍດີອາເມລິກາຢ່າງສົມກຽດຢູ່ນະຄອນຫຼວງປັກກິ່ງ ແລະໄດ້ພົບປະເຈລະຈາກັບທ່ານ ໂດຍສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບສາຍພົວພັນສອງປະເທດ ພ້ອມດ້ວຍບັນຫາສາກົນແລະພາກພື້ນທີ່ສົນໃຈຮ່ວມກັນ ທັງໄດ້ກຳນົດທິດທາງແຫ່ງການພັດທະນາສາຍພົວພັນສອງຝ່າຍໃນໄລຍະຕໍ່ໜ້າຢ່າງຈະແຈ້ງ.
ໂອກາດດັ່ງກ່າວ, ປະມຸກລັດສອງປະເທດ ໄດ້ປຶກສາຫາລືການຮ່ວມມືທາງເສດຖະກິດການຄ້າເປັນຈຸດໜັກ ໂດຍສອງຝ່າຍໄດ້ເຊັນສັນຍາການຄ້າແລະການລົງທຶນສອງຕໍ່ສອງທີ່ມີມູນຄ່າຫຼາຍກວ່າ 250 ຕື້ໂດລາ. ນອກຈາກຫົວຂໍ້ເສດຖະກິດການຄ້າແລ້ວ, ບັນຫານິວເຄລຍແຫຼມເກົາຫຼີ ກໍໄດ້ກາຍເປັນຫົວຂໍ້ຫຼັກໃນການພົບປະເຈລະຈາລະຫວ່າງປະມຸກລັດທັງສອງ. ແນວໃດກໍດີ, ສອງຝ່າຍເຫັນດີເພີ່ມທະວີການຕິດຕໍ່ພົວພັນແລະປະສານງານໃນບັນຫາສຳຄັນໃນພາກພື້ນ ກໍຄືສາກົນ ແລະຮ່ວມມືຊຸກຍູ້ການແກ້ໄຂບັນຫາຈຸດເຄັ່ງຕຶງທີ່ກ່ຽວຂ້ອງຢ່າງເໝາະສົມ.
ທ່ານ ສີຈິ້ນຜິງ ກ່າວໃນໂອກາດໃຫ້ສຳພາດຕໍ່ນັກຂ່າວຫຼັງການພົບປະວ່າ, ການພົບປະຄັ້ງນີ້ ເຕັມໄປດ້ວຍຄວາມສ້າງສັນ ແລະໄດ້ຮັບຜົນຢ່າງຫຼວງຫຼາຍ.
 |
