ຕາມຂ່າວ CRI: ພິທີປະກາດການພິມຄັ້ງທຳອິດຂອງ "ປື້ມສີຈິ້ນຜິງວ່າດ້ວຍການປົກຄອງປະເທດແລະບໍລິຫານການເມືອງ" ສະບັບພາສາລາວທີ່ຫ້ອງການຖະແຫຼງຂ່າວຂອງລັດຖະບານຈີນ, ກົມພາສາຕ່າງປະເທດແຫ່ງຊາດຈີນແລະສະຖານທູດຈີນປະຈຳລາວເປັນເຈົ້າພາບຮ່ວມໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວໃນວັນທີ 9 ພະຈິກນີ້.
ທ່ານໂກ່ວເວີ້ຍມິນ, ຮອງຫົວໜ້າຫ້ອງການຖະແຫຼງຂ່າວຂອງລັດຖະບານຈີນກ່າວໃນພິທີດັ່ງກ່າວວ່າ, "ປື້ມສີຈິ້ນຜິງວ່າດ້ວຍການປົກຄອງປະເທດແລະບໍລິຫານການເມືອງ" ແລະເຫຼັ້ມທີສອງຂອງປື້ມດັ່ງກ່າວທີ່ພິມຈຳໜ່າຍຢ່າງເປັນທາງການຫວ່າງມໍ່ໆມານີ້ໄດ້ສະແດງໃຫ້ເຫັນເນື້ອໃນອຸດົມສົມບູນຂອງແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ແມ່ນປ່ອງຢ້ຽມທີ່ສຳຄັນໃຫ້ປະຊາຄົມໂລກຊອກຮູ້ແລະເຂົ້າໃຈປະເທດຈີນໃນຍຸກປັດຈຸບັນຢ່າງຮອບດ້ານແລະພາວະວິໄສ.
ປື້ມດັ່ງກ່າວໄດ້ຮັບໂຮມຄວາມເວົ້າ, ຄຳປາໄສ, ປາຖະກະຖາ, ການຕອບຄຳຖາມ, ການຊີ້ແຈງແລະສານອວຍພອນ 79 ບົດແຕ່ວັນທີ 15 ພະຈິກປີ 2012 ຫາວັນທີ 13 ມິຖຸນາປີ 2014 ຂອງທ່ານສີຈິ້ນຜິງ. ນັບແຕ່ປຶ້ມດັ່ງກ່າວພິມຈຳໜ່າຍເມື່ອເດືອນກັນຍາປີ 2014 ເປັນຕົ້ນມາ, ໄດ້ແປເປັນ 24 ພາສາແລະ 27 ສະບັບ, ພິມຈຳໜ່າຍຫຼາຍກວ່າ 6 ລ້ານ 6 ແສນເຫຼັ້ມໃນທົ່ວໂລກ. ສ່ວນສະບັບພາສາລາວແມ່ນອົງການພິມຈຳໜ່າຍພາສາຕ່າງປະເທດແຫ່ງຊາດຈີນແລະກົມພິມຈຳໜ່າຍລາວຮ່ວມກັນແປແລະພິມຈຳໜ່າຍ.
