ວັນທີ 10 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມຜູ້ນຳອຸດສາຫະກຳການຄ້າຂອງອົງການຮ່ວມມືເສດຖະກິດອາຊີປາຊີຟິກຫຼືAPECຢູ່ເມືອງດານັງ ສສ ຫວຽດນາມແລະໄດ້ກ່າວປາໄສ, ໂດຍມີຫົວເລື່ອງວ່າ "ກຳໂອກາດປ່ຽນແປງຂອງເສດຖະກິດໂລກ, ສະແຫວງຫາການພັດທະນາທີ່ໃຫຍ່ກວ່າເກົ່າຂອງອາຊີປາຊີຟິກ." ແລະກ່າວເນັ້ນວ່າໂລກປັດຈຸບັນພວມຢູ່ຂະບວນການປະຫວັດສາດທີ່ປ່ຽນແປງຢ່າງວ່ອງໄວ, ເສດຖະກິດໂລກພວມເກີດມີການປ່ຽນແປງທີ່ເລິກເຊິ່ງກວ່າເກົ່າ. ພວກເຮົາຄວນໄປຕາມກະແສຫຼັກ, ມີຄວາມກ້າຫານຫາບແບກ, ຮ່ວມກັນສ້າງອະນາຄົດແຈ້ງສະຫວ່າງທີ່ຈະເລີນຮຸ່ງເຮືອງຂອງການພັດທະນາອາຊີອາຟີຟິກ.
ທ່ານສີຈິ້ນຜິງ ກ່າວວ່າ, ທົ່ວໂລກພວມຜະເຊີນກັບການປ່ຽນແປງເລິກເຊິ່ງດ້ານພະລັງແຮງໃນການເຕີບໂຕທາງເສດຖະກິດ, ຮູບການພັດທະນາຂອງໂລກ, ຂະບວນການເສດຖະກິດໂລກາພິວັດແລະລະບົບປັບປຸງເສດຖະກິດໂລກ. ອາຊີປາຊີຟິກແມ່ນພາກສ່ວນໃຫຍ່ທີ່ສຸດໃນເສດຖະກິດໂລກ, ກໍແມ່ນແມ່ແຮງສຳຄັນອັນໜຶ່ງທີ່ຊຸກຍູ້ໃຫ້ເສດຖະກິດໂລກເຕີບໂຕ. ພວກເຮົາຄວນວິເຄາະທ່າອຽງພັດທະນາຂອງເສດຖະກິດໂລກ, ຊອກຫາທິດທາງທີ່ຖືກຕ້ອງແລະກຳກັບກົດເກນການພັດທະນາ, ຮັບມືກັບການປ່ຽນແປງຂອງເສດຖະກິດໂລກຢ່າງກ້າຫານ.
ໜຶ່ງ, ຄວນສືບຕໍ່ຍຶດໝັ້ນສ້າງເສດຖະກິດແບບເປີດປະຕູ, ພະຍາຍາມບັນລຸຕ່າງຝ່າຍຕ່າງມີຜົນປະໂຫຍດ.
ສອງ, ສືບຕໍ່ສະແຫວງຫາການເຕີບໂຕແບບປະດິດສ້າງໃໝ່, ຂຸດຄົ້ນພະລັງໃໝ່ໃນການພັດທະນາ.
ສາມ, ສືບຕໍ່ເພີ່ມທະວີການເຊື່ອມຈອດກັນ, ບັນລຸການພັດທະນາຮ່ວມກັນ.
ສີ່, ສືບຕໍ່ເພີ່ມຄວາມກວມລວມດ້ານການພັດທະນາເສດຖະກິດ, ເຮັດໃຫ້ປະຊາຊົນສາມາດແບ່ງປັນໝາກຜົນການພັດທະນາຮ່ວມກັນ.
ທ່ານສີຈິ້ນຜິງຊີ້ໃຫ້ເຫັນວ່າ, ເດືອນຕຸລາຜ່ານມານີ້, ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນຢ່າງສຳເລັດຜົນ. ກອງປະຊຸມດັ່ງກ່າວໄດ້ວາງໂຄງການປະຕິບັດງານແລະແຜນຜັງພັດທະນາຂອງສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່. ພາຍໃຕ້ການນຳພາຂອງພັກກອມມູນິດຈີນ, ປະຊາຊົນຈີນຈະເປີດຂະບວນການພັດທະນາອັນໃໝ່. ພວກເຮົາຈະລົງເລິກຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ປະຕິບັດນະໂຍບາຍທີ່ເຮັດໃຫ້ການຄ້າແລະການລົງທຶນຫັນເປັນແບບເສລີແລະສະດວກທີ່ລະດັບສູງ, ຊຸກຍູ້ການສ້າງເຄືອຂ່າຍເຂດການຄ້າເສລີທີ່ອ່ວຍໜ້າໄປສູ່ຕໍ່ທົ່ວໂລກ.
ພວກເຮົາຈະຍືດໝັ້ນປົກປັກຮັກສາແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນດ້ວຍການພັດທະນາ ເພື່ອບັນລຸເປົ້າໝາຍຮອດປີ 2020 ຫຼຸດພົ້ນອອກຈາກຄວາມທຸກຍາກໃຫ້ປະຊາຊົນຜູ້ທຸກຍາກຢູ່ຊົນນະບົດ. ວຽກງານຫຼຸດຜ່ອນຄວາມທຸກຍາກຂອງຈີນໄດ້ຮັບຄວາມຄືບໜ້າທີ່ສຳຄັນ ເຊິ່ງໃນ 5 ປີທີ່ຜ່ານມາ, ໄດ້ປະຊາຄົນຜູ້ທຸກຍາກ 60 ລ້ານກວ່າຄົນຫຼຸດພົ້ນອອກຈາກຄວາມທຸກຍາກ, ນີ້ແມ່ນໝາກຜົນທີ່ໄດ້ມາຍາກ, ພວກເຮົາພາກພູມໃຈຕໍ່ໝາກຜົນນີ້. ການສ້າງເປັນສັງຄົມທີ່ອີ່ມໜຳສຳລານ ເຊິ່ງຈະກວມລວມປະຊາຊົນຈີນ 1 ຕື້ 300 ລ້ານຄົນ ໂດຍຈະບໍ່ໃຫ້ຄົນໜຶ່ງຫຼ້າຫຼັງກວ່າໝູ່. ເຊິ່ງນີ້ຖືເປັນຂະບວນການໃໝ່ແຫ່ງການສ້າງເປັນການພົວພັນສາກົນແບບໃໝ່ ແລະສ້າງປະຊາຄົມຮ່ວມຊາຕາກຳຂອງທົ່ວມວນມະນຸດ.ພວກເຮົາຈະຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ແລະຈະຍຶດໝັ້ນເປັນປັດໄຈສຳຄັນທີ່ສຸດໃນການຮັກສາສັນຄິພາບແລະຄວາມໝັ້ນຄົງຂອງໂລກກໍ່ຄືຂອງພາກພື້ນອາຊີປາຊີຟິກ. ພວກເຮົາຈະຍຶດຖືທັດສະນະທີ່ປຶກສາຫາລືຮ່ວມກັນ, ສ້າງສາຮ່ວມກັນ ແລະຊົມໃຊ້ຮ່ວມກັນ, ຕັ້ງໜ້າເຂົ້າຮ່ວມການປະຕິຮູບແລະສ້າງສາລະບຽບການປັບປຸງທົ່ວໂລກ, ຊຸກຍູ້ລະບຽບການການເມືອງສາກົນເດີນໄປສູ່ທິດທີ່ຍຸດຕິທຳແລະສົມເຫດສົມຜົນກວ່າເກົ່າ.
ທ່ານສີຈິ້ນຜິງກ່າວເນັ້ນວ່າ, ສັນຕິພາບ ຄວາມໝັ້ນຄົງແລະວັດຖະນາຖາວອນຂອງອາຊີປາຊີຟິກແມ່ນຂຶ້ນກັບປະຊາຊົນທົ່ວອາຊີປາຊີຟິກ, ອະນາຄົດຂອງອາຊີປາຊີຟິກຕ້ອງອີງອາໃສນຳການຮ່ວມກັນປະດິດສ້າງຂອງປະຊາຊົນອາຊີປາຊີຟິກ. ການພົວພັນໝູ່ຄູ່ທີ່ໄວ້ເນື້ອເຊື່ອໃຈເຊິ່ງກັນແລະກັນ, ໂອບເອື້ອຍອາລີ, ຮ່ວມມືກັນ ແລະໄດ້ຮັບຜົນປະໂຫຍດຮ່ວມກັນແມ່ນ ສາຍພົວພັນທາງຈິດໃຈຂອງມະຫາຄອບຄົວອາຊີປາຊີຟິກ, ເປັນການຮັບປະກັນທີ່ສຳຄັນເພື່ອໃຫ້ການຮ່ວມມືອາຊີປາຊີຟິກເຂົ້າສູ່ໂຄຈອນທີ່ຖືກຕ້ອງ. ໃຫ້ພວກເຮົາຈົ່ງຊຸກຍູ້ການຮ່ວມມືກ້າວໄປໜ້າຢ່າແທ້ຈິງ, ໃຊ້ການກະທຳຕົວຈິງ, ຮ່ວມກັນສ້າງອະນາຄົດທີ່ສວຍງາມກວ່າເກົ່າຂອງອາຊີປາຊີຟິກ.
