ວັນທີ 10 ພະຈິກນີ້, ທ່ານສີຈິ້ນຜິງ ປະທານປະເທດ ສປ ຈີນ ໄດ້ເຂົ້າຮ່ວມ ກອງປະຊຸມສົນທະນາລະຫວ່າງຜູ້ນຳອົງການຮ່ວມມືອາຊີປາຊີຟິກແລະອາຊຽນຢູ່ເມືອງດານັງ ສສ ຫວຽດນາມ.
ບັນດາຜູ້ນຳໄດ້ຫາລືກັນໂດຍປິ່ນອ້ອມຫົວຂໍ້ທີ່ວ່າ ຮ່ວມມືກັນຊອກຄົ້ນພະລັງພັດທະນາອັນໃໝ່, ສ້າງອາຊີປາຊີຟິກທີ່ເຊື່ອມຈອດກັນຢ່າງຮອບດ້ານແລະເປັນອັນໜຶ່ງອັນດຽວກັນ.
ທ່ານສີຈິ້ນຜິງ ໄດ້ມີຂໍ້ສະເໜີຫຼາຍຂໍ້ຄືດັ່ງນີ້:
ໜຶ່ງ: ຊຸກຍູ້ໃຫ້ເສດຖະກິດພາກພື້ນເປັນອັນໜຶ່ງອັນດຽວັນ. ຈີນເດັດດ່ຽວສະໜັບສະໜູນອາຊຽນມີບົດບາດເປັນແກນກາງໃນການເຈລະຈາສັນຍາການພົວພັນຄູ່ເສດຖະກິດຮອບດ້ານໃນພາກພື້ນ, ຍິນດີຮ່ວມກັບບັນດາສະມາຊິກຂອງອາຊຽນຊຸກຍູ້ໃຫ້ການເຈລະຈາສຳເລັດລົງໂດຍໄວ.
ສອງ:ຮ່ວມກັນຊຸກຍູ້ການສ້າງສາແບບເຊື່ອມຈອດກັນ. ອົງການຮ່ວມມືເສດຖະກິດອາຊີປາຊີຟິກແລະອາຊຽນຄວນນຳໃຊ້ມາດຕະການທີ່ແຂງແຮງກວ່າເກົ່າໃນຂົງເຂດການສ້າງສາພື້ນຖານໂຄງລ່າງ, ການວາງນະໂຍບາຍແລະການໄປມາຫາສູ່ກັນດ້ານບຸກຄະລາກອນ, ເພື່ອສ້າງເຄືອຂ່າຍເຊື່ອມຈອດກັນທີ່ມີຂອບເຂດກວ້າງຂວາງກວ່າເກົ່າແລະມີລະດັບສູງກວ່າເກົ່າ.
ສາມ: ຮ່ວມກັນຊຸກຍູ້ການພັດທະນາແບບໂອບເອື້ອຍອາລີ ແລະຍືນຍົງ. ພວກເຮົາຕ້ອງເອົາຍຸດທະສາດພັດທະນາຕົນເອງຕິດພັນກັບວາລະການພັດທະນາແບບຍືນຍົງໃນປີ 2030 ຂອງສະຫະປະຊາຊາດ, ເພີ່ມທະວີການຮ່ວມມືໃນຂົງເຂດຫຼຸດຜ່ອນຄວາມທຸກຍາກ, ຮັບມືກັບການປ່ຽນແປງຂອງດິນຟ້າອາກາດ, ແລະການຮ່ວມືດ້ານແມ່ຍິງເປັນຕົ້ນ, ຊ່ວຍເຫຼືອຍບັນດາສະມາຊິກທີ່ພວມພັດທະນານັ້ນດຳເນີນການກໍ່ສ້າງຄວາມສາມາດ, ຫຼຸດຄວາມຜິດໂຕນກົນໃນດ້ານການພັດທະນາ.
ທ່ານສີຈິ້ນຜິງກ່າວເນັ້ນວ່າ, ຈີນຈະເດັດດ່ຽວພັດທະນາມິດຕະພາບແລະການຮ່ວມມືກັບອາຊຽນ, ເດັດດ່ຽວສະໜັບສະໜູນການສ້າງເປັນປະຊາຄົມອາຊຽນ, ເດັດດ່ຽວສະໜັບສະໜູນຖານະໃຈກາງຂອງອາຊຽນໃນການຮ່ວມມືພາກພື້ນ, ແລະຈະຊຸກຍູ້ໃຫ້ຂໍ້ລິເລີ່ມ ໜຶ່ງແລວທາງ ໜຶ່ງເສັ້ນທາງ ເຊື່ອມຈອດກັບຍຸດທະສາດພັດທະນາຂອງອາຊຽນ, ສ້າງການພົວພັນຄູ່ຮ່ວມຍຸດທະສາດຈີນ-ອາຊຽນທີ່ມີລະດັບສູງກວ່າເກົ່າ, ແລະກ້າວໄປສູ່ປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ເພື່ອເພີ່ມພະລັງຊີວິດຊີວາອັນໃໝ່ໃຫ້ແກ່ພາກພື້ນອາຊີປາຊີຟິກໃນການບັນລຸການພັດທະນາແລະຈະເລີນຮຸ່ງເຮືອງຮ່ວມກັນ.
 |
