ວັນທີ 11 ພະຈິກນີ້, ກອງປະຊຸມບໍ່ເປັນທາງການຜູ້ນຳອົງການເອເປັກຄັ້ງທີ 25 ໄດ້ຈັດຂຶ້ນຢູ່ດານັງປະເທດສ.ສ ຫວຽດນາມ. ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມດັ່ງກ່າວທັງກ່າວຄຳປາໄສສຳຄັນທີ່ມີຫົວຂໍ້ວ່າ "ຮ່ວມກັນຂຽນບົດໃໝ່ແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນພາກພື້ນອາຊີປາຊີຟິກ" ໂດຍກ່າວເນັ້ນວ່າ ຝ່າຍຕ່າງໆຂອງພາກພື້ນອາຊີປາຊີຟິກຄວນຍຶດໝັ້ນຊຸກຍູ້ການປະດິດສ້າງໃໝ່ຢ່າງບໍ່ລົດລະ, ເປີດກວ້າງການເປີດປະຕູສູ່ພາຍນອກຢ່າງເດັດດ່ຽວໜ້ຽວແໜ້ນ, ຕັ້ງໜ້າປະຕິບັດການພັດທະນາແບບໂອບອ້ອມອາລີ, ເພີ່ມເນື້ອໃນຂອງສາຍພົວພັນຄູ່ຮວມໃຫ້ສົມບູນຂຶ້ນຢ່າງບໍ່ຢຸດຢັ້ງ ແລະນຳພາການພັດທະນາ ແລະຄວາມຈະເລີນຮຸ່ງເຮືອງຮອບໃໝ່ໃນທົ່ວໂລກ.
ທ່ານສີຈິ້ນຜີງກ່າວວ່າ, ພວກເຮົາຕ້ອງຮັບຮູ້ເຖິງເສດຖະກິດໂລກພວມມີການປ່ຽນແປງທີ່ສຳຄັນຢ່າງເລິກເຊິ່ງ. ຝ່າຍຕ່າງໆໃນພາກພື້ນອາຊີປາຊີຟິກຕ້ອງສອດໄປທັນກັບທ່າອ່ຽງການພັດທະນາ, ຖືເອົາການກະທຳຕົວຈິງເປັນຈຸດຢືນ, ນຳພາການພັດທະນາ ແລະຄວາມຈະເລີນຮຸ່ງເຮືອງຮອບໃໝ່ໃນທົ່ວໂລກ. ໜຶ່ງ, ຍຶດໝັ້ນຊຸກຍູ້ການປະດິດສ້າງໃໝ່ຢ່າງບໍ່ລົດລະ, ສ້າງກຳລັງຊຸກດັນການພັດທະນາທີ່ແຂງແຮງ. ສອງ, ເດັດດ່ຽວເປີດກວ້າງການເປີດປະຕູສູ່ພາຍນອກຢ່າງບໍ່ຫວັ່ນໄຫວຄອນແຄນ, ສ້າງຊ່ອງຫວ່າງພັດທະນາໃຫ້ກວ້າງຂວາງກວ່າເກົ່າ. ສາມ, ຕັ້ງໜ້າປະຕິບັດຕາມທັດສະນະການພັດທະນາແບບໂອບອ້ອມອາລີ, ເຮັດໃຫ້ປະຊາຊົນມີຄວາມຮູ້ສຶກໄດ້ຮັບຜົນປະໂຫຍດຫຼາຍຂຶ້ນ. ສີ່, ເພີ່ມເນື້ອໃນຂອງສາຍພົວພັນຄູ່ຮ່ວມໃຫ້ອຸດົມສົມບູນຂຶ້ນ ເພື່ອບັນລຸເປົ້າໝາຍຕ່າງຝ່າຍຕ່າງໄດ້ຮັບຜົນປະໂຫຍດ.
ຜູ້ນຳຂອງອົງການເສດຖະກິດຕ່າງໆກ່າວວ່າ, ປັດຈຸບັນ, ເສດຖະກິດໂລກມີທ່າອ່ຽງຟື້ນຟູຄືນໃໝ່, ແຕ່ຄວາມສ່ຽງ ແລະສິ່ງທ້າທາຍຍັງຄົງມີຢູ່. ອົງການເສດຖະກິດໃນພາກພື້ນອາຊີປາຊີຟິກຕ້ອງຊຸກຍູ້ການປະຕິຮູບໂຄງປະກອບ, ບັນລຸການເຕີບໂຕທີ່ມີລັກສະນະປະດິດສ້າງໃໝ່, ກຳແໜ້ນໂອກາດຂອງເສດຖະກິດທາງອິນເຕີເນັດ ແລະດີຈີຕອນ, ຊຳລະແກ້ໄຂສາຍພົວພັນລະຫວ່າງວິທະຍາສາດເຕັກໂນໂລຊີກັບການປະກອບອາຊີບ, ສືບຕໍ່ເສີມຂະຫຍາຍບົດບາດທີ່ເປັນກຳລັງຊຸກດັນແຫ່ງການຮ່ວມມືໃນພາກພື້ນອາຊີປາຊີຟິກ ເພື່ອນຳພາໃຫ້ເສດຖະກິດໂລກເຕີບໂຕຢ່າງຕໍ່ເນື່ອງ. ຕ້ອງຊຸກຍູ້ການເຊື່ອມຕໍ່ ແລະເຊື່ອມໂຍງເຂົ້າກັນ, ຊຸກຍູ້ຂະບວນການສ້າງສາເຂດການຄ້າເສລີອາຊີປາຊີຟິກ, ຊຸກຍູ້ເສດຖະກິດພາກພື້ນໃຫ້ເຊື່ອມໂຍງເຂົ້າກັນ. ຝ່າຍຕ່າງໆກ່າວຢ້ຳວ່າສະໜັບສະໜູນເຮັດໃຫ້ການຄ້າ ແລະການລົງທຶນມີຄວາມເສລີ ແລະ ມີຄວາມສະດວກສະບາຍກວ່າເກົ່າ, ສະໜັບສະໜູນລະບຽບການການຄ້າຫຼາຍຝ່າຍ, ຊຸກຍູ້ການພັດທະນາແບບໂອບອ້ອມອາລີ, ເຮັດໃຫ້ຝ່າຍຕ່າງໆລ້ວນແຕ່ສາມາດໄດ້ຮັບຜົນປະໂຫຍດຈາກຂະບວນການເສດຖະກິດໂລກາພິວັດ.
ກອງປະຊຸມໄດ້ເຜີຍແຜ່ "ຖະແຫຼງການກອງປະຊຸມບໍ່ເປັນທາງການຜູ້ນຳອົງການເອເປັກຄັ້ງທີ 25".
