ວັນທີ 11 ພະຈິກນີ້ຢູ່ທີ່ດານັງປະເທດຫວຽດນາມ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານດູເຕີເຕ ປະທານາທິບໍດີຟິລິບປິນ.
ທ່ານສີຈິ້ນຜີງຊີ້ອອກວ່າ, ນັບແຕ່ທ່ານປະທານາທິບໍດີດູເຕີເຕຢ້ຽມຢາມຈີນໃນເດືອນຕຸລາປີຜ່ານມາເປັນຕົ້ນມາ, ສາຍພົວພັນຈີນກັບຟິລິບປິນໄດ້ເປີດໜ້າໃໝ່, ສອງຝ່າຍດຳເນີນການຮ່ວມມືກັນຢ່າງຕັ້ງໜ້າ, ສາຍພົວພັນສອງປະເທດຂະຫຍາຍຕົວຢ່າງປອດໃສ ແລະໝັ້ນທ່ຽງ ເຊິ່ງໄດ້ສ້າງຜົນປະໂຫຍດອັນແທ້ຈິງໃຫ້ແກ່ປະຊາຊົນສອງຊາດ ແລະກໍໄດ້ເປັນການປະກອບສ່ວນອັນສຳຄັນເຂົ້າໃນສັນຕິພາບ ແລະສະຖຽນລະພາບຂອງພາກພື້ນ. ມິດຕະພາບຖານບ້ານໃກ້ເຮືອນຄຽງເປັນທິດທາງອັນຖືກຕ້ອງທີ່ຕ້ອງຍຶດໝັ້ນໃນການຂະຫຍາຍສາຍພົວພັນຈີນກັບຟິລິບປິນ. ຈີນຍິນດີຮ່ວມກັບຟິລິບປິນ, ສືບຕໍ່ກຳແໜ້ນສາຍພົວພັນສອງປະເທດໃນຈາກຄວາມສູງຍຸດທະສາດ ແລະ ມູມແງ່ຍາວໄກ, ເພີ່ມຄວາມໄວ້ເນື້ອເຊື່ອໃຈທາງການເມືອງ, ປັບປຸງ ແລະລົງເລິກການຮ່ວມມືກັນ, ສ້າງຜົນງານຫຼາຍກວ່າເກົ່າເພື່ອນຳເອົາຜົນປະໂຫຍດໃຫ້ແກ່ປະຊາຊົນສອງຊາດ.
ທ່ານສີຈິ້ນຜິງກ່າວເນັ້ນວ່າ, ປັດຈຸບັນນີ້, ສາຍພົວພັນຈີນກັບປິລິບປິນພວມຢູ່ໃນຈຸດເລີ່ມໃໝ່ທາງປະຫວັດສາດ. ສອງຝ່າຍຕ້ອຮັດແໜ້ນການໄປມາຫາສູ່ກັນລະຫວ່າງການນຳຂັ້ນສູງ, ເພີ່ມຄວາມເຂົ້າໃຈ ແລະຄວາມໄວ້ເນື້ອເຊື່ອໃຈກັນ, ເພີ່ມທະວີການນຳພາດ້ານຍຸດທະສາດ, ຮັບປະກັນສາຍພົວພັນສອງປະເທດຂະຫຍາຍຕົວຕາມທິດທາງຖືກຕ້ອງຢ່າງສະເໝີຕົ້ນສະເໝີປາຍ. ໂດຍປິ່ນອ້ອມການເຊື່ອມຕໍ່ລະຫວ່າງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກັບຍຸດທະສາດພັດທະນາຂອງຟິລິບປິນ, ລົງເລິກ ແລະເປີດກວ້າງການຮ່ວມມືໃນຂົງເຂດກໍ່ສ້າງພື້ນຖານໂຄງລ່າງ, ກະສິກຳ, ການລົງທຶນ ແລະອື່ນໆ. ຈີນຍິນດີຊ່ວຍເຫຼືອຟິລິບຟິນໃນການຫຼຸດຜ່ອນຄວາມທຸກຍາກ, ສືບຕໍ່ສະໜັບສະໜູນຄວາມພະຍາຍາມຂອງລັດຖະບານຟິລິບປິນໃນການຮັກສາຄວາມໝັ້ນຄົງຂອງປະເທດຕົນ. ຈີນຈະສືບຕໍ່ຮ່ວມກັບບັນດາປະເທດໃນອາຊຽນ ເພື່ອຮັກສາສັນຕິພາບ, ສະຖຽນລະພາບ, ການພັດທະນາ ແລະຄວາມຈະເລີນຮຸ່ງເຮືອງຂອງທະເລຈີນໃຕ້.
ທ່ານດູເຕີເຕກ່າວວ່າ, ສາຍພົວພັນຟິລິບປິນຈີນມີຄວາມສຳຄັນຫຼາຍ, ຟິລິບປິນຖືຈີນເປັນເພື່ອນມິດຈິງໃຈ ແລະຂອບໃຈຈີນທີ່ຊ່ວຍເຫຼືອຟິລິບປິນໃນການສ້າງສາເສດຖະກິດ, ການຕໍ່ຕ້ານລັດທິກໍ່ການຮ້າຍ, ການຮັກສາຄວາມໝັ້ນຄົງ ແລະອື່ນໆ. ຟິລິບປິນພະຍາຍາມຊຸກຍູ້ການຮ່ວມມືໃນຂົງເຂດຕ່າງໆລະຫວ່າງສອງປະເທດໃຫ້ກ້າວໄປໜ້າ ແລະຍິນດີຮ່ວມກັບຈີນ ປະຕິບັດຕາມຄວາມເຫັນເປັນເອກະພາບກັນທີ່ສອງຝ່າຍຕົກລົງກັນ, ແກ້ໄຂບັນຫາທາງທເລຢ່າງເໝາະສົມໂດຍຜ່ານຊ່ອງທາງສອງຝ່າຍ.
