ວັນທີ 12 ພະຈິກນີ້ຢູ່ຫ້ອງວ່າການສູນກາງພັກກອມມູນິດຫວຽດນາມນະຄອນຫຼວງຮ່າໂນ້ຍສສ ຫວຽດນາມ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນໄດ້ພົບປະເຈລະຈາກັບທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມໂດຍສອງຝ່າຍໄດ້ຕີລາຄາສູງຕໍ່ຜົນສຳເລັດແຫ່ງການພັດທະນາຂອງແຕ່ລະປະເທດ ທັງເປັນເອກະພາບກັນເຫັນດີສືບທອດ,ປົກປັກຮັກສາແລະເຊີດຊູມິດຕະພາບທີ່ເປັນມູນເຊື້ອລະຫວ່າງຈີນ-ຫວຽດນາມໃຫ້ມີປະສິດທິຜົນ,ຍຶດໝັ້ນປະຕິບັດນະໂຍບາຍເປັນມິດຕໍ່ກັນ,ພັດທະນາການຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ນັບມື້ນັບດີຂຶ້ນ ເພື່ອນຳເອົາຜົນປະໂຫຍດຕົວຈິງມາໃຫ້ສອງປະເທດແລະປະຊາຊົນສອງຊາດໃຫ້ຫຼາຍຂຶ້ນຕື່ມ.
ທ່າມກາງການບັນເລງສຽງເພງຊາດຈີນ-ຫວຽດນາມ,ສຽງປືນສັນລະເສີນ 21 ສຽງ, ເຍົາວະຊົນຢືນແກວ່ງທຸງຊາດສອງປະເທດ, ກອງດຸລິຍາງກ່າວສະດຸດດີເປັນພາສາຫວຽດນາມດ້ວຍສຽງທີ່ມີພະລັງວ່າ "ຂໍອວຍພອນໃຫ້ທ່ານເລຂາທິການໃຫຍ່ຈົ່ງມີສຸຂະພາບເຂັ້ມແຂງ", ທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມໄດ້ຈັດພິທີຕ້ອນຮັບທ່ານສີຈິ້ນຜິງຢ່າງສົມກຽດແລະຍິ່ງໃຫຍ່. ທ່ານຫງວຽນຟູຈອງຢືນຢັນວ່າ:
"ພວກຂ້າພະເຈົ້າມີຄວາມປິຕິຊົມຊື່ນທັງຊົມເຊີຍກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນທີ່ປະສົບຜົນສຳເລັດຢ່າງຈົບງາມ,ຊົມເຊີຍທ່ານສີຈິ້ນຜິງໄດ້ຮັບເລືອກຕັ້ງເປັນເລຂາທິການໃຫຍ່ສູນກາງພັກກອມມູນິດຈີນອີກສະໄໝໜຶ່ງແລະໄດ້ຮັບມອບໝາຍເປັນແກນນຳຂອງພັກ.ພວກຂ້າພະເຈົ້າຕີຍາຄາສູງຕໍ່ສະຫາຍສີຈິ້ນຜິງທີ່ໄດ້ເຂົ້າຮ່ວມກອງປະຊຸມອາເປັກແລະຢ້ຽມຢາມຫວຽດນາມທາງລັດຖະກິດ ເຊິ່ງຫວຽດນາມເປັນປະເທດທຳອິດທີ່ສະຫາຍສີຈິ້ນຜິງເດີນທາງຢ້ຽມຢາມຕ່າງປະເທດຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ ເຊິ່ງເປັນການສ່ອງແສງໃຫ້ເຫັນຢ່າງເຕັມສ່ວນວ່າ:ພັກ-ລັດຈີນກໍຄືສະຫາຍສີຈິ້ນຜິງເອງທີ່ໃຫ້ຄວາມສຳຄັນຕໍ່ການປັບປຸງແລະສົ່ງເສີມສາຍພົວພັນຫວຽດນາມ-ຈີນ. ພັກ-ລັດແລະປະຊາຊົນຫວຽດນາມໃຫ້ຄວາມສຳຄັນເປັນພິເສດຕໍ່ການຢ້ຽມຢາມຫວຽດນາມຂອງສະຫາຍສີຈິ້ນຜິງເທື່ອນີ້ໂດຍຖືເປັນນິມິດໝາຍທີ່ສຳຄັນ ແລະເປັນການເປີດໄລຍະໃໝ່ແຫ່ງການພົວພັນສອງພັກ-ສອງລັດ."
ທ່ານສີຈິ້ນຜິງສະແດງຄວາມຊົມເຊີຍຕໍ່ຜົນສຳເລັດອັນຍິ່ງໃຫຍ່ທີ່ຫວຽດນາມຍາດມາໄດ້ໃນການກໍ່ສ້າງດ້ານຕ່າງໆໃນໄລຍະການປະຕິບັດນະໂຍບາຍປ່ຽນແປງໃໝ່ແລະເປີດປະຕູສູ່ພາຍນອກເປັນເວລາ 30 ກວ່າປີຜ່ານມາ, ທ່ານກ່າວວ່າ:
"ຂ້າພະເຈົ້າດີໃຈເປັນຢ່າງຍິ່ງທີ່ຢ້ຽມຢາມຫວຽດນາມທາງລັດຖະກິດຕາມຄຳເຊີນຂອງສະຫາຍເລຂາທິການໃຫຍ່ຫງວຽນຟູຈອງແລະສະຫາຍປະທານເຈິນດາຍກວາງ. ຂ້າພະເຈົ້າມາຢ້ຽມຢາມຫວຽດນາມອີກຄັ້ງໃໝ່ໃນຮອບ 2 ປີຜ່ານມາ ແລະໄດ້ຮູ້ສຶກເຖິງມິດຕະພາບອັນເລິກເຊິ່ງຈາກພັກ-ລັດແລະປະຊາຊົນຫວຽດນາມ, ຂໍສະແດງຄວາມຂອບໃຈຢ່າງຈິງໃຈຕໍ່ຫວຽດນາມທີ່ໃຫ້ການຕ້ອນຮັບຢ່າງອົບອຸ່ນແລະມີມິດໄມຕີ. ຕະຫຼອດໄລຍະ 30 ກວ່າປີທີ່ຫວຽດນາມປະຕິບັດນະໂຍບາຍປ່ຽນແປງໃໝ່ແລະເປີດປະຕູສູ່ພາຍນອກມານີ້,ພັກກອມມູນິດຫວຽດນາມໄດ້ນຳພາປະຊາຊົນຫວຽດນາມຜ່ານຜ່າຄວາມຫຍຸ້ງຍາກຕ່າງໆ,ບຸກໜ້າບືນຕົວແລະຄົ້ນຄວ້າເສັ້ນທາງພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນຢ່າງບໍ່ລົດລະໂດຍສາມາດຍາດໄດ້ຜົນສຳເລັດຢ່າງໃຫຍ່ຫຼວງໃນການກໍ່ສ້າງດ້ານຕ່າງໆ, ພວກຂ້າພະເຈົ້າຂໍສະແດງຄວາມຊົມເຊີຍຢ່າງສຸດໃຈ. "
ໂອກາດພົບປະເຈລະຈາກັນ, ທ່ານສີຈິ້ນຜິງແລະທ່ານຫງວຽນຟູຈອງໄດ້ບັນລຸຄວາມເປັນເອກະພາບລົງເລິກສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມໃນສະພາບການໃໝ່ໂດຍເປັນເອກະພາບກັນວ່າ ຈີນ-ຫວຽດນາມຄວນຖອດຖອນບົດຮຽນນຳກັນ, ພັດທະນາຮ່ວມກັນ, ເຮັດໃຫ້ພາລະກິດສ້າງສາສັງຄົມນິຍົມຂອງແຕ່ລະປະເທດມີຊີວິດຊີວາຫຼາຍຂຶ້ນ, ສົ່ງເສີມສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມໃຫ້ສືບຕໍ່ຂະຫຍາຍຕົວໄປໜ້າຢ່າງປອດໃສແລະໝັ້ນທ່ຽງ ເພື່ອປະກອບສ່ວນຢ່າງຕັ້ງໜ້າເຂົ້າໃນການສົ່ງເສີມສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນ.
ຫຼັງພົບປະເຈລະຈາ, ຜູ້ນຳສອງປະເທດຍັງໄດ້ຮ່ວມກັນເປັນສັກຂີພິຍານໃນພິທີລົງນາມ ບົດບັນທຶກການຮ່ວມມືວ່າດ້ວຍຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ"ແລະ "ສອງແລວທາງເສດຖະກິດແລະໜຶ່ງວົງເສດຖະກິດ" ກໍຄືເອກະສານຮ່ວມມືໃນຂົງເຂດຕ່າງໆເປັນຕົ້ນ ການເພີ່ມຂີດຄວາມສາມາດການຜະລິດ, ພະລັງງານ, ເຂດຮ່ວມມືເສດຖະກິດຂ້າມຊາດ, ການຄ້າເອເລັກໂຕຣນິກ,ຊັບພະຍາກອນມະນຸດ,ເສດຖະກິດການຄ້າ,ການທະນາຄານ, ວັດທະນະທຳ, ສາທາລະນະສຸກ,ສື່ມວນຊົນ,ວິທະຍາສາດສັງຄົມ,ການປ້ອງກັນຊາຍແດນແລະອື່ນໆ.
ໃນຕອນຄ່ຳວັນດຽວກັນ, ທ່ານສີຈິ້ນຜິງຍັງໄດ້ເຂົ້າຮ່ວມງານລ້ຽງຕ້ອນຮັບທີ່ທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູດຫວຽດນາມແລະທ່ານເຈິນດາຍກວາງ ປະທານປະເທດຫວຽດນາມຮ່ວມກັນຈັດຂຶ້ນຢ່າງສົມກຽດ ແລະໂອກາດປາໄສໃນງານລ້ຽງດັ່ງກ່າວ, ທ່ານສີຈິ້ນຜິງໄດ້ກ່າວເນັ້ນອີກເທື່ອໜຶ່ງກ່ຽວກັບທິດທາງສ້າງຄວາມກ້າວໜ້າຕໍ່ສາຍພົວພັນລະຫວ່າງສອງປະເທດໃນໄລຍະໃໝ່.
