ຕອນຄ່ຳວັນທີ 12 ພະຈິກນີ້, ອາຊຽນໄດ້ຈັດພິທີສະຫຼອງວັນຄົບຮອບ 50 ປີການສ້າງຕັ້ງອາຊຽນ ຢູ່ນະຄອນຫຼວງມະນີລາ ປະເທດຟິລິບປິນ ໂດຍຜູ້ນຳບັນດາປະເທດອາຊຽນ ແລະ ຜູ້ນຳປະເທດ ແລະ ເຂດແຄວ້ນທີ່ເປັນຄູ່ສົນທະນາຂອງອາຊຽນ ທີ່ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 31 ແລະບັນດາກອງປະຊຸມຜູ້ນຳການຮ່ວມມືອາຊີຕາເວັນອອກ ເຂົ້າຮ່ວມ.
ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ປາໄສໃນພິທີດັ່ງກ່າວວ່າ: ໃນຖານະເປັນປະເທດໝູນວຽນອາຊຽນປີ 2017 ແລະຈາກການປະຕິບັດຕາມຄຳຂວັນ "ໂອບກອດການປ່ຽນແປງໃໝ່, ເຊື່ອມໂຍງກັບໂລກ", ຟິລິບປິນສືບຕໍ່ເຮັດວຽກປະສານງານລະຫວ່າງສາມປະຊາຄົມທີ່ເປັນເສົາຄ້ຳໃຫຍ່ຂອງອາຊຽນ, ເພີ່ມທະວີການເຊື່ອມໂຍງເສດຖະກິດ, ສ້າງຄວາມຮັບຮູ້ຕໍ່ການມີຖານະຮ່ວມກັນ, ແຕ່ຂະນະດຽວກັນກໍຮັກສາຄວາມເປັນເຈົ້າຕົນເອງ ແລະ ຄວາມຫຼາກຫຼາຍຂອງແຕ່ລະປະເທດເຊັ່ນກັນ.
ທ່ານດູເຕີເຕ ກ່າວຕື່ມວ່າ: ນັບແຕ່ອາຊຽນໄດ້ຮັບການສ້າງຕັ້ງຂຶ້ນເປັນຕົ້ນມາ ກໍຖືອາຊຽນເປັນແກນນຳ ສ້າງສາຍພົວພັນກັບພາຍນອກຢ່າງມີຄວາມໝາຍແລະສ້າງສັນ. ຂະນະທີ່ຕໍ່ໜ້ານີ້, ອາຊຽນຈະສືບຕໍ່ເຊື່ອມໂຍງເຂົ້າກັບໂລກ.
ໃນກອງປະຊຸມສຸດຍອດເທື່ອນີ້, ຜູ້ນຳອາຊຽນຈະຫາລືບັນຫາຕ່າງໆໃນຂະບວນການເຊື່ອມໂຍງຂອງຕົນ ແລະ ຫຼັງສຳເລັດກອງປະຊຸມຍັງຈະຈັດກອງປະຊຸມຜູ້ນຳການຮ່ວມມືອາຊີຕາເວັນອອກຕ່າງໆ ລວມທັງກອງປະຊຸມຜູ້ນຳຈີນ-ອາຊຽນ ຫຼື 10 ບວກ 1 ຄັ້ງທີ 20, ກອງປະຊຸມຜູ້ນຳອາຊຽນ-ຈີນ, ຍີ່ປຸ່ນ, ສ.ເກົາຫຼີ ຫຼື 10 ບວກ 3 ຄັ້ງທີ 20 ແລະກອງປະຊຸມສຸດຍອດອາຊີຕາເວັນອອກຄັ້ງທີ 12 ຕື່ມອີກ.
