ຕອນບ່າຍວັນທີ 12 ພະຈິກນີ້, ໂດຍຕອບສະໜອງຕາມຄຳເຊີນຂອງທ່ານໂຣດຣີໂກ ດຸເຕິຣແຕ ປະທານາທິບໍດີຟິລິປິນ ເຊິ່ງເປັນປະເທດປະທານໝູນວຽນອາຊຽນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງໄປນະຄອນຫຼວງມະນິລາ ເພື່ອເຂົ້າຮ່ວມກອງປະຊຸມຜູ້ນຳຈີນ-ອາຊຽນ (10+1) ເທື່ອທີ 20, ກອງປະຊຸມຜູ້ນຳອາຊຽນກັບຈີນ, ຍີ່ບຸ່ນ, ສ.ເກົາຫຼີ (10+3) ເທື່ອທີ 20 ແລະກອງປະຊຸມສຸດຍອດອາຊີຕາເວັນອອກຄັ້ງທີ 12 ທີ່ຈັດຂຶ້ນແຕ່ວັນທີ 12 ຫາວັນທີ 14 ພະຈິກນີ້ ແລະຈາກນັ້ນຈະຢ້ຽມຢາມຟິລິປິນຢ່າງເປັນທາງການ.
ທ່ານຫຼີເຄີ້ສຽງກ່າວວ່າ: ປີນີ້ເປັນປີຄົບຮອບ 50 ປີໃນການສ້າງຕັ້ງອາຊຽນ ແລະ 20 ປີແຫ່ງການຮ່ວມມື 10+3. ປັດຈຸບັນ, ພວກເຮົາສາມາດຮັກສາຄວາມໝັ້ນຄົງ, ການຮ່ວມມື ແລະການພັດທະນາ ທັງຮັກສາຈັງຫວະການເຕີບໂຕຂອງເສດຖະກິດໂລກ ເຊິ່ງເປັນກຳລັງທີ່ໝັ້ນຄົງຂອງໂລກພາຍໃຕ້ສະພາບການທີ່ສະຫຼັບສັບຊ້ອນ. ຈີນຍິນດີວາງແຜນການພັດທະນາໃນຈຸດເລີ່ມຕົ້ນໃໝ່ຂອງອາຊຽນ ເພື່ອສ້າງປະຊາຄົມຮ່ວມຊາຕາກຳ ແລະມີຜົນປະໂຫຍດຮ່ວມກັນຍິ່ງໆຂຶ້ນ.
ທ່ານກ່າວຕື່ມວ່າ: ປັດຈຸບັນ, ສາຍພົວພັນຈີນ-ຟິລິປິນໄດ້ຮັບການພັດທະນາຢ່າງໝັ້ນທ່ຽງ ເຊິ່ງສອດຄ່ອງກັບຜົນປະໂຫຍດ ແລະຄວາມຫວັງຂອງປະຊາຊົນສອງຊາດ. ຂ້າພະເຈົ້າຍິນດີແລກປ່ຽນຄຳຄິດເຫັນກັບຜູ້ນຳຟິລິປິນໃນການປັບປຸງສາຍພົວພັນໄມຕີຈິດມິດຕະພາບໃຫ້ດີຂຶ້ນກວ່າເກົ່າຕື່ມອີກ, ລົງເລິກການຮ່ວມມື ແລະປັບປຸງໃນຖານະເປັນບ້ານໃກ້ເຮືອນຄຽງທີ່ດີໃນໄລຍະຍາວ.