ຕອນບ່າຍວັນທີ 13 ພະຈິກນີ້, ກອງປະຊຸມສຸດຍອດຈີນ-ອາຊຽນ ຫຼື ອາຊຽນ+1 ຄັ້ງທີ 20 ໄດ້ຈັດຂຶ້ນຢູ່ສູນປະຊຸມສາກົນຟິລິບປິນ ໂດຍທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມ ແລະ ກ່າວປາໄສ.
ທ່ານຫຼີເຄີ້ສຽງກ່າວວ່າ, ໃນບັນດາສາຍພົວພັນຄູ່ເຈລະຈາຂອງອາຊຽນ, ສາຍພົວພັນຈີນ-ອາຊຽນເປັນສາຍພົວພັນທີ່ມີຊີວິດຊີວາ ແລະ ມີເນື້ອໃນທີ່ອຸດົມສົມບູນທີ່ສຸດ ເຊິ່ງເປັນຄວາມເຫັນທີ່ເປັນເອກະພາບກັນຂອງບັນດາປະເທດໃນອາຊຽນ. ຈີນໄດ້ເຂົ້າເປັນປະເທດພາຄີ "ສົນທິສັນຍາໄມຕີຈິດແລະການຮ່ວມມືໃນພາກພື້ນອາຊີຕາເວັນອອກສຽງໃຕ້" ກ່ອນໝູ່, ໄດ້ສ້າງສາຍພົວພັນຄູ່ຍຸດທະສາດກັບອາຊຽນກ່ອນໝູ່ ແລະເລີ່ມຂະບວນການເຈລະຈາເຂດການຄ້າເສລີກັບອາຊຽນກ່ອນໝູ່. ພວກເຮົາຕ້ອງກຳທິດທາງໃຫຍ່ແຫ່ງມິດຕະພາບຖານບ້ານໃກ້ເຮືອນຄຽງ ແລະແກ້ໄຂຄວາມຂັດແຍ້ງກັນທີ່ອ່ອນໄຫວຢ່າງເໝາະສົມ ໂດຍຜ່ານວິທີທາງສົນທະນາແລະປຶກສາຫາລືກັນ ເພື່ອເຮັດໃຫ້ສາຍພົວພັນລະຫວ່າງສອງຝ່າຍກ້າວໄປໜ້າຕາມໂຄຈອນຖືກຕ້ອງຢ່າງສະເໝີຕົ້ນສະເໝີປາຍ.
ທ່ານຫຼີເຄີ້ສຽງກ່າວເນັ້ນວ່າ, ໂດຍອວ່າຍໜ້າສູ່ອະນາຄົດ, ຈີນຍິນດີດີຮ່ວມກັບປະເທດໃນອາຊຽນເດີນຕາມກະແສຂອງຍຸກສະໄໝແຫ່ງສັນຕິພາບແລະການພັດທະນາ ແລະເຕົ້າໂຮມສະຕິປັນຍາແລະກຳລັງວັງຊາຂອງປະຊາຊົນ 2 ຕື້ຄົນໃນພາກພື້ນນີ້ ເພື່ອຊຸກຍູ້ໃຫ້ສາຍພົວພັນສອງຝ່າຍກ້າວຂຶ້ນສູ່ລະດັບໃໝ່. ຈີນສະເໜີໃຫ້ວາງ "ວິໄສທັດສາຍພົວພັນຄູ່ຍຸດທະສາດຈີນ-ອາຊຽນ 2030" ຍົກລະດັບຂອບການຮ່ວມມື 2 + 7 ຂຶ້ນເປັນ ຂອບການຮ່ວມມື 3 + X, ສ້າງຂອບການຮ່ວມມືໃໝ່ ທີ່ຖືເອົາ 3 ເສົາຄ້ຳ ຄື ການເມືອງແລະຄວາມໝັ້ນຄົງ, ເສດຖະກິດ ແລະການແລກປ່ຽນວັດທະນະທຳເປັນສາຍຫຼັກ ແລະການຮ່ວມມືໃນຫຼາຍຂົງເຂດເປັນສິ່ງຄ້ຳປະກັນ, ເພີ່ມຕື່ມເນື້ອໃນລັກສະນະທົ່ວໂລກຫຼາຍກວ່າເກົ່າເຂົ້າໃສ່ການຮ່ວມມືຈີນ-ອາຊຽນ ແລະສ້າງເປັນແບບຢ່າງໃໝ່ແຫ່ງການຮ່ວມມືໃຕ້-ໃຕ້.
 |
