ວັນທີ 14 ພະຈິກນີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານທອງລຸນ ສີສຸລິດ ນາຍົກລັດຖະມົນຕີລາວຢູ່ສູນປະຊຸມແຫ່ງຊາດນະຄອນຫຼວງວຽງຈັນ.
ທ່ານສີຈິ້ນຜິງຊີ້ໃຫ້ເຫັນວ່າ: ຈີນ-ລາວເປັນປະເທດເພື່ອນບ້ານໃກ້ຄຽງທີ່ມີພູຜາແມ່ນ້ຳຕິດຈອດກັນ, ມິດຕະພາບທີ່ເປັນມູນເຊື້ອລະຫວ່າງປະຊາຊົນສອງປະເທດມີປະຫວັດສາດອັນຍາວນານ. ຂ້າພະເຈົ້າແລະທ່ານເລຂາທິການໃຫຍ່,ປະທານປະເທດບຸນຍັງວໍລະຈິດເປັນເອກະພາບກັນວ່າ ການທີ່ປັບປຸງແລະເສີມຂະຫຍາຍສາຍພົວພັນຈີນ-ລາວໃນສະພາບການໃໝ່ນັ້ນຄວນສຸມໃສ່ການສ້າງຄູ່ຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດ. ການຮ່ວມມືຈີນ-ລາວມີຄວາມຊ່ວຍຊູຍູ້ໜູນກັນຫຼາຍ ແລະສອງຝ່າຍຄວນຊຸກຍູ້ການກໍ່ສ້າງແລວທາງເສດຖະກິດຈີນ-ລາວຢ່າງໜັກແໜ້ນ, ຮັບປະກັນການກໍ່ສ້າງທາງລົດໄຟຈີນ-ລາວໃຫ້ດຳເນີນໄປດ້ວຍດີ, ເປີດກວ້າງແລະລົງເລິກການຮ່ວມມືໃນຂົງເຂດຕ່າງໆເປັນຕົ້ນ ພະລັງງານ,ຊັບພະຍາກອນ, ພະລັງໄຟຟ້າ,ການທະນາຄານແລະອື່ນໆ, ເພີ່ມທະວີການຮ່ວມມືໃນຂົງເຂດຕ່າງໆທີ່ມີສ່ວນກ່ຽວຂ້ອງກັບຊີວິດການເປັນຢູ່ຂອງປະຊາຊົນເປັນຕົ້ນ ການສຶກສາ, ສາທາລະນະສຸກ,ການລຶບລ້າງຄວາມທຸກຍາກແລະອື່ນໆ. ຈີນສະໜັບສະໜູນລາວເປັນປະເທດປະທານຮ່ວມຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ 2018 ໃຫ້ປະສົບຜົນສຳເລັດທີ່ດີ.
ທ່ານທອງລຸນ ສີສຸລິດຊົມເຊີຍສະຫາຍສີຈິ້ນຜິງໄດ້ຮັບເລືອກຕັ້ງເປັນເລຂາທິການໃຫຍ່ຄະນະກຳມະການສູນກາງພັກກອມມູນິດຈີນອີກສະໄໝໜຶ່ງ ໂດຍເຊື່ອໝັ້ນວ່າພາຍໃຕ້ການນຳພາຈາກສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນໃຈກາງ, ປະຊາຊົນຈີນຈະສາມາດຍາດເອົາໄຊຊະນະໃໝ່ຢ່າງຕໍ່ເນື່ອງບົນເສັ້ນທາງໃໝ່ແຫ່ງການບັນລຸເປົ້າໝາຍຍຸດທະສາດທີ່ຍິ່ງໃຫຍ່ ເຊິ່ງຈະເປັນກຳລັງໃຈຢ່າງໃຫຍ່ຫຼວງໃຫ້ແກ່ພາລະກິດສັງຄົມນິຍົມຂອງລາວ. ລາວຍິນດີຮ່ວມກັບຈີນຜັນຂະຫຍາຍໝາກຜົນແຫ່ງການຢ້ຽມຢາມຂອງສະຫາຍໃນຄັ້ງນີ້, ລົງເລິກການແລກປ່ຽນແລະຮ່ວມມືໃນຂົງເຂດຕ່າງໆລະຫວ່າງລາວ-ຈີນເພື່ອສ້າງຄູ່ຮ່ວມຊາຕາກຳອັນໝັ້ນແກ່ນລະຫວ່າງສອງປະເທດ.
