ຢູ່ກອງປະຊຸມສຸດຍອດອາຊີຕາເວັນອອກຄັ້ງທີ 12 ທີ່ຈັດຂຶ້ນຢູ່ນະຄອນຫຼວງມະນີລາ ປະເທດຟີລິບປິນໃນຕອນບ່າຍວັນທີ 14 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນກ່າວເນັ້ນວ່າ ທະເລຈີນໃຕ້ທີ່ມີຄວາມສະຫງົບເປັນຄວາມສຸກຂອງບັນດາປະເທດ, ຫາກເກີດມີຄວາມປັ່ນປ່ວນຢູ່ທະເລຈີນໃຕ້ກໍຈະບໍ່ເປັນຜົນດີຕໍ່ທຸກຝ່າຍ. ຈີນເປັນປະເທດໃຫຍ່ທີ່ສຸດທີ່ຢູ່ແຄມຝັ່ງທະເລຈີນໃຕ້ແລະເປັນປະເທດຕົ້ນຕໍໃນການນຳໃຊ້ທາງເດີນເຮືອຢູ່ທະເລຈີນໃຕ້, ຈາກນີ້, ຈິ່ງມີຄວາມຫວັງແຮງກວ່າປະເທດຕ່າງໆເພື່ອໃຫ້ທະເລຈີນໃຕ້ມີສັນຕິພາບ,ສະຖຽນລະພາບແລະມີຄວາມເສລີໃນການເດີນເຮືອ, ຈາກນີ້,ຈີນຈະເດັດດ່ຽວປົກປັກຮັກສາເສລີພາບແຫ່ງການເດີນເຮືອແລະການບິນຢູ່ທະເລຈີນໃຕ້.
ທ່ານຫຼີເຄີ້ສຽງຊີ້ໃຫ້ເຫັນວ່າ: ຈາກຄວາມພະຍາຍາມຮ່ວມຂອງຈີນແລະບັນດາປະເທດອາຊຽນ, ສະຖານະການຢູ່ທະເລຈີນໃຕ້ໄດ້ມີທ່ວງທ່າໝັ້ນທ່ຽງຂຶ້ນຢ່າງຈະແຈ້ງແລະມີທ່າອ່ຽງຂະຫຍາຍຕົວໄປທາງທີ່ດີ, ບັນດາຝ່າຍທີ່ກ່ຽວຂ້ອງໄດ້ກັບຄືນສູ່ເສັ້ນທາງທີ່ຖືກຕ້ອງແຫ່ງການແກ້ໄຂຄວາມຂັດແຍ້ງດ້ວຍການປຶກສາຫາລືແລະເຈລະຈາກັນ, ການພົວພັນລະຫວ່າງປະເທດໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ. ມື້ວານນີ້, ຂ້າພະເຈົ້າໄດ້ຮ່ວມກັບຜູ້ນຳປະເທດອາຊຽນປະກາດເລີ່ມຕົ້ນການຫາລືເນື້ອໃນລະອຽດຂອງກົດແຫ່ງການປະພຶດຢູ່ທະເລຈີນໃຕ້ໃນຂັ້ນຕໍ່ໄປ, ເຊິ່ງສ່ອງແສງໃຫ້ເຫັນຢ່າງເຕັມສ່ວນເຖິງຄວາມມຸ້ງຫວັງຮ່ວມຂອງປະເທດໃນພາກພື້ນໃນການແກ້ໄຂຄວາມຂັດແຍ້ງຢ່າງເໝາະສົມດ້ວຍການປຶກສາຫາລືກັນ, ປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້ ທັງໄດ້ສ່ອງແສງໃຫ້ເຫັນວ່າ ປະເທດໃນພາກພື້ນມີຄວາມໝັ້ນໃຈ,ມີສະຕິປັນຍາແລະຄວາມສາມາດໃນການແກ້ໄຂບັນຫາທະເລຈີນໃຕ້ໃຫ້ດີ, ເຮັດໃຫ້ທະເລຈີນໃຕ້ກາຍເປັນທະເລແຫ່ງສັນຕິພາບ, ທະເລແຫ່ງມິດຕະພາບແລະທະເລແຫ່ງການຮ່ວມມື.