ສະຫາຍສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ໄດ້ພົບປະກັບສະຫາຍບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ອີກຄັ້ງໜຶ່ງ ຢູ່ໂຮງແຮມທີ່ເປັນບ່ອນພັກໃນນະຄອນຫຼວງວຽງຈັນ ໃນວັນທີ 14 ພະຈິກນີ້.
ໂອກາດດັ່ງກ່າວ, ສະຫາຍສີຈິ້ນຜິງ ໄດ້ຂອບໃຈຕໍ່ຝ່າຍລາວທີ່ໃຫ້ການຕ້ອນຮັບຢ່າງອົບອຸ່ນ ແລະເຕັມໄປດ້ວຍຄວາມຮັກແພງ ແລະຂອບໃຈນຳສະຫາຍບຸນຍັງ ວໍລະຈິດ ທີ່ເດີນທາງມາກ່າວອຳລາເປັນພິເສດ ກ່ອນຈະສຳເລັດການຢ້ຽມຢາມຂອງຕົນຄັ້ງນີ້ ທັງເນັ້ນວ່າ: ເຖິງວ່າການຢ້ຽມຢາມຄັ້ງນີ້ເປັນໄລຍະສັ້ນ ແຕ່ກໍໄດ້ຮັບໝາກຜົນຢ່າງຫຼວງຫຼາຍ ແລະໃນໄລຍະຢ້ຽມຢາມ, ຂ້າພະເຈົ້າ ແລະ ສະຫາຍບຸນຍັງ ວໍລະຈິດ ໄດ້ເປັນເອກະພາບກັນເຫັນດີໃຫ້ສ້າງປະຊາຄົມຮ່ວມຊາຕາກຳທີ່ມີຄວາມໝາຍທາງຍຸດທະສາດລະຫວ່າງຈີນ-ລາວ, ໄດ້ກຳນົດເນື້ອໃນການຮ່ວມມືເພື່ອເພີ່ມທະວີການເຊື່ອມຈອດຍຸດທະສາດ ແລະ ອະນຸເຄາະຕໍ່ກັນ, ໄດ້ກຳນົດທິດທາງກ້າວໜ້າແຫ່ງການເສີມຂະຫຍາຍມິດຕະພາບອັນເປັນມູນເຊື້ອ ແລະ ສ້າງຜົນປະໂຫຍດໃຫ້ແກ່ຊີວິດການເປັນຢູ່ຂອງປະຊາຊົນຂັ້ນພື້ນຖານ. ການຢ້ຽມຢາມຄັ້ງນີ້ໄດ້ຮັບຜົນເຕັມເມັດເຕັມໜ່ວຍ, ສ່ວນຂ້າພະເຈົ້າກໍມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດແຫ່ງການພັດທະນາສາຍພົວພັນລະຫວ່າງສອງປະເທດ. ສອງຝ່າຍຄວນຈັດຕັ້ງປະຕິບັດຕາມຜົນການຢ້ຽມຢາມເທື່ອນີ້ໃຫ້ດີແລະຮອບດ້ານ, ກຳເນື້ອຄວາມທາງຍຸດທະສາດໃຫ້ດີ, ເຊື່ອມຈອດຍຸດທະສາດສອງປະເທດໃຫ້ດີ, ເຮັດວຽກງານທີ່ກ່ຽວພັນເຖິງຊີວິດການເປັນຢູ່ຂອງປະຊາຊົນນັ້ນໃຫ້ດີ, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃນຍຸກໃໝ່ໃຫ້ພັດທະນາດີຍິ່ງຂຶ້ນ.
ທ່ານບຸນຍັງ ວໍລະຈິດ ກ່າວວ່າ: ການຢ້ຽມຢາມລາວຄັ້ງປະຫວັດສາດຂອງສະຫາຍສີຈິ້ນຜິງ ໄດ້ຮັບຜົນເຕັມເມັດເຕັມໜ່ວຍ ແລະໄດ້ຍົກການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດທີ່ໝັ້ນຄົງຍາວນານນັ້ນຂຶ້ນສູ່ລະດັບໃໝ່ ອັນໄດ້ສະແດງໃຫ້ເຫັນເຖິງໄມຕີຈິດມິດຕະພາບອັນເປັນມູນເຊື້ອລະຫວ່າງສອງປະເທດຢ່າງເຕັມສ່ວນ. ທົ່ວພັກ ແລະ ປະຊາຊົນທົ່ວປະເທດລາວກໍຮູ້ສຶກປິຕິຊົມຊື່ນ , ມີກຳລັງໃຈ ແລະ ເຕັມໄປດ້ວຍຄວາມປາຖະໜາຕໍ່ການພັດທະນາສາຍພົວພັນລະຫວ່າງສອງປະເທດໃນອະນາຄົດ.
ຫຼັງການພົບປະ, ສະຫາຍສີຈິ້ນຜິງ ແລະ ສະຫາຍບຸນຍັງ ວໍລະຈິດ ກໍໄດ້ເປັນສັກຂີພິຍານໃນພິທີລົງນາມ "ສັນຍາວ່າດ້ວຍການເພີ່ມທະວີການຮ່ວມມືລະຫວ່າງກະຊວງການຕ່າງປະເທດສາທາລະນະລັດປະຊາຊົນຈີນ ແລະ ກະຊວງການຕ່າງປະເທດສາທາລະນະລັດປະຊາທິປະໄຕປະຊາຊົນລາວໃນສະຖານະການໃໝ່".
