ວັນທີ 14 ພະຈິກນີ້ ຢູ່ສູນປະຊຸມແຫ່ງຊາດທີ່ນະຄອນຫຼວງວຽງຈັນ, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດ ປະທານປະເທດຈີນໄດ້ພົບປະກັບທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດແຫ່ງ ສປປ ລາວ.
ທ່ານ ສີຈິ້ນຜິງ ກ່າວເນັ້ນວ່າ: ຈີນແລະລາວມີລະບອບການເມືອງເຊັ່ນດຽວກັນ, ມີທັດສະນະຄະຕິແລະອຸດົມການທີ່ຄ້າຍຄືກັນ,ອະນາຄົດແລະຊາຕາກຳມີການພົວພັນກັນ,ມີຜົນປະໂຫຍດຮ່ວມຢ່າງກວ້າງຂວາງ ແລະມີຄວາມສາມາດບົ່ມຊ້ອນດ້ານການຮ່ວມມືທີ່ໃຫຍ່ຫຼວງ. ຈີນໃຫ້ຄວາມສຳຄັນໃນລະດັບສູງຕໍ່ການຂະຫຍາຍການພົວພັນກັບລາວ,ຍິນດີຮ່ວມກັບຝ່າຍລາວສືບຕໍ່ປະຕິບັດຕາມທິດທາງຄື "ຄວາມໝັ້ນຄົງອັນຍາວນານ,ມີໄມຕີຈິດມິດຕະພາບຖານບ້ານໃກ້ເຮືອນຄຽງ,ມີຄວາມໄວ້ເນື້ອເຊື່ອໃຈກັນ,ຮ່ວມມືກັນຮອບດ້ານ" ແລະ ນ້ຳໃຈ "ເປັນປະເທດໃກ້ຄຽງທີ່ດີ,ເພື່ອນມິດທີ່ດີ,ສະຫາຍທີ່ດີ,ແລະຄູ່ຮ່ວມມືທີ່ດີ",ຈັດຕັ້ງປະຕິບັດຄວາມເປັນເອກະພາບລະຫວ່າງຜູ້ນຳລະຫວ່າງສອງພັກ-ລັດຈີນແລະລາວກ່ຽວກັບການຊຸກຍູ້ການຮ່ວມມືທາງຍຸດທະສາດຮອບດ້ານລະຫວ່າງສອງປະເທດໃນຍຸກໃໝ່ໃນໄລຍະຢ້ຽມຢາມລາວຄັ້ງນີ້,ຮ່ວມກັນສ້າງປະຊາຄົມຮ່ວມຊາຕາກຳທີ່ມີຄວາມໝາຍທາງຍຸດທະສາດລະຫວ່າງສອງປະເທດ.
ທ່ານນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍຕໍ່ທ່ານ ສີຈິ້ນຜິງ ເລຂາທິການໃຫຍ່ສູນກາງພັກ ປະທານປະເທດຈີນມາຢ້ຽມຢາມລາວຄັ້ງທຳອິດຫຼັງປິດກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19. ທ່ານນາງ ປານີ ກ່າວຕື່ມວ່າ,ການຮ່ວມມືລະຫວ່າງລາວ-ຈີນໄດ້ປະກອບສ່ວນທີ່ສຳຄັນຕໍ່ການພັດທະນາຂອງປະເທດລາວ. ສະພາແຫ່ງຊາດລາວຈະພະຍາຍາມຊຸກຍູ້ການຈັດຕັ້ງປະຕິບັດຄວາມເປັນເອກະພາບທີ່ສຳຄັນແລະໝາກຜົນທີ່ຜູ້ນຳຂອງສອງພັກ-ລັດໄດ້ບັນລຸໃນໄລຍະຢ້ຽມຢາມເປັນຢ່າງດີ,ລົງເລິກການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຢ່າງຍາວນານແລະມີຄວາມໝັ້ນທ່ຽງ. ສະພາແຫ່ງຊາດລາວຈະສຸມໃສ່ເພີ່ມທະວີການແລກປ່ຽນແລະການຮ່ວມມືກັບສະພາຜູ້ແທນປະຊາຊົນແຫ່ງຊາດຈີນ.
