ວັນທີ 13 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດຈີນ-ອາຊຽນ ຫຼື ອາຊຽນ+1 ຄັ້ງທີ 20 ຢູ່ສູນປະຊຸມສາກົນຟິລິບປິນ ໂດຍມີຜູ້ນຳ 10 ປະເທດໃນອາຊຽນເຂົ້າຮ່ວມ ແລະທ່ານຫຼີເຄີ້ສຽງກັບທ່ານດູເຕີເຕ ປະທານາທິບໍດີຟິລິບປິນເປັນປະທານຮ່ວມ.
ທ່ານຫຼີເຄີ້ສຽງກ່າວປາໄສວ່າ, ປີນີ້ພໍດີແມ່ນວັນສ້າງຕັ້ງອາຊຽນຄົບຮອບ 50 ປີ, ຈີນຮູ້ສຶກດີໃຈຕໍ່ການພັດທະນາກ້າວໜ້າຂອງອາຊຽນ ແລະ ມີຄວາມໝັ້ນໃຈເຕັມປ່ຽມຕໍ່ອະນາຄົດຂອງອາຊຽນ. ຈີນຍຶດໝັ້ນສະໜັບສະໜູນການສ້າງປະຊາຄົມອາຊຽນ, ສະໜັບສະໜູນຖານະໃຈກາງຂອງອາຊຽນໃນການຮ່ວມມືພາກພື້ນ, ສະໜັບສະໜູນໃຫ້ອາຊຽນເສີມຂະຫຍາຍບົດບາດໃຫຍ່ຫຼວງກວ່າເກົ່າໃນວຽກງານພາກພື້ນ ແລະສາກົນ, ຖືເອົາອາຊຽນເປັນທິດທາງບຸລິມະສິດໃນວຽກງານການຕ່າງປະເທດອ້ອມຂ້າງຂອງຈີນ, ຍຶດໝັ້ນເປັນບ້ານໃກ້ທີ່ດີ, ເພື່ອນມິດທີ່ດີ ແລະຄູ່ຮ່ວມທີ່ດີ ທີ່ຮ່ວມສຸກຮ່ວມທຸກ ແລະ ຕ່າງຊ່ວຍຊູຍູ້ໜູນກັນກັບອາຊຽນ, ຮ່ວມມືກັນສ້າງປະຊາຄົມຮ່ວມຊາຕາກຳທີ່ມີວິໄສທັດເຊື່ອມຈອດກັນ, ຈະເລີນຮຸ່ງເຮືອງຮ່ວມກັນ, ຊົມໃຊ້ຮ່ວມກັນ ແລະຮັບໜ້າທີ່ຮ່ວມກັນ.
ທ່ານຫຼີເຄີ້ສຽງໄດ້ວາງຂໍ້ສະເໜີ 5 ຂໍ້ ເພື່ອຊຸກຍູ້ສາຍພົວພັນຈີນ-ອາຊຽນໃຫ້ກ້າວຂຶ້ນສູ່ລະດັບໃໝ່ໃນອະນາຄົດ ຄື:
ໜຶ່ງ, ຮ່ວມກັນວາງວິໄສທັດຂະຫຍາຍສາຍພົວພັນຈີນ-ອາຊຽນ, ສ້າງຂອບຮ່ວມມືໃໝ່ ທີ່ຖືເອົາ 3 ເສົາຄ້ຳ ຄື ການເມືອງແລະຄວາມໝັ້ນຄົງ, ເສດຖະກິດ ແລະ ການແລກປ່ຽນວັດທະນະທຳເປັນສາຍຫຼັກ ແລະ ການຮ່ວມມືໃນຫຼາຍຂົງເຂດເປັນສິ່ງຄ້ຳປະກັນ.
ສອງ, ຍຶດຖືຫຼັກການຮ່ວມກັນປຶກສາ, ຮ່ວມກັນສ້າງສາ ແລະຊົມໃຊ້ຮ່ວມກັນ, ເພີ່ມທະວີການເຊື່ອມຈອດຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກັບ "ແຜນລວມເຊື່ອມຈອດອາຊຽນ 2025", ລົງເລິກການຮ່ວມມືຮອບດ້ານໃນຂົງເຂດເສດຖະກິດການຄ້າ, ການທະນາຄານ, ພື້ນຖານໂຄງລ່າງ, ລະບຽບການ, ບຸກຄະລາກອນ ແລະອື່ນໆ.
ສາມ, ເພີ່ມທະວີການຮ່ວມມືໃນທາງການເມືອງແລະຄວາມໝັ້ນຄົງລະຫວ່າງສອງຝ່າຍຢ່າງໜັກແໜ້ນ, ເພີ່ມທະວີການຮ່ວມມືໃນຂົງເຂດຄວາມໝັ້ນຄົງແບບໃໝ່ ເຊັ່ນ: ຕຸລາການແລະການໂຈມຕີອາຊະຍາກຳຂ້າມຊາດ, ການຕ້ານການກໍ່ການຮ້າຍ, ຄວາມປອດໄພທາງອິນເຕີເນັດ ແລະອື່ນໆ.
ສີ່, ຮັດແໜ້ນສາຍພົວພັນຮ່ວມມືທາງເສດຖະກິດການຄ້າ. ຫວັງວ່າບັນດາປະເທດໃນອາຊຽນຈະໃຫ້ສັດຕະຍາບັນອະນຸສັນຍາການຍົກລະດັບເຂດການຄ້າເສລີຈີນ-ອາຊຽນໂດຍໄວ ເພື່ອສ້າງຜົນປະໂຫຍດໃຫ້ແກ່ທັງສອງຝ່າຍໂດຍໄວ. ຕັ້ງໜ້າຊຸກຍູ້ການເຈລະຈາສັນຍາສາຍພົວພັນຄູ່ເສດຖະກິດຮອບດ້ານຂອງພາກພື້ນ ຫຼື RCEP ເພື່ອສ້າງພື້ນຖານໃຫ້ແກ່ການສ້າງປະຊາຄົມເສດຖະກິດອາຊີຕາເວັນອອກ.
ຫ້າ, ຍົກລະດັບການແລກປ່ຽນແລະຮ່ວມມືດ້ານວັດທະນະທຳໃຫ້ສູງຂຶ້ນເລື້ອຍໆ. ໃນສາມປີຕໍ່ໜ້າ ລັດຖະບານຈີນຈະສະໜອງກວ່າ 2 ໝື່ນທຶນການສຶກສາໃຫ້ 10 ປະເທດອາຊຽນ. ຈີນລິເລີ່ມໃຫ້ປະຕິບັດ "ແຜນການພັດທະນາຜູ້ມີຄວາມຮູ້ຄວາມສາມາດຈີນ-ອາຊຽນ", ປີ 2018 ຈະຮັບເອົາ 3 ພັນຄົນຈາກບັນດາປະເທດໃນອາຊຽນເຂົ້າມາສຶກສາອົບຮົມຢູ່ຈີນ, ເພີ່ມທະວີການຮ່ວມມືສ້າງຄວາມສາມາດໃນຂົງເຂດເສດຖະກິດການຄ້າ, ກະສິກຳ, ວິທະຍາສາດເຕັກໂນໂລຊີ, ການສຶກສາ, ວັດທະນະທຳ, ສາທາລະນະສຸກ, ການຄຸ້ມຄອງສາທາລະນະ, ຄົມມະນາຄົມຂົນສົ່ງ ແລະອື່ນໆ. ຈີນສະແດງຄວາມຊົມເຊີຍຕໍ່ການກຳນົດປີໜ້າເປັນ "ປີປະດິດສ້າງໃໝ່ຈີນ-ອາຊຽນ", ໃນ 5 ປີຂ້າງໜ້ານີ້ຈະຈັດວາງໃຫ້ນັກວິທະຍາສາດໜຸ່ມອາຊຽນ 500 ເທື່ອຄົນມາດຳເນີນການຄົ້ນຄວ້າວິທະຍາສາດເປັນໄລຍະສັ້ນຢູ່ຈີນ, ອົບຮົມບຸກຄະລາກອນເຕັກນິກວິທະຍາສາດແລະບໍລິຫານອາຊຽນ 1200 ເທື່ອຄົນ, ສ້າງແລະເປີດນຳໃຊ້ຫ້ອງທົດລອງຮ່ວມ 10 ແຫ່ງ ເພື່ອຊີ້ນຳນຳພາການຮ່ວມມືດ້ານປະດິດສ້າງໃໝ່ຮອບດ້ານດ້ວຍການປະດິດສ້າງໃໝ່ດ້ານວິທະຍາສາດເຕັກໂນໂລຊີ.
ທ່ານຫຼີເຄີ້ສຽງກ່າວເນັ້ນວ່າ, ຈີນສະເໜີໃຫ້ກອງປະຊຸມຄັ້ງນີ້ປະກາດເລີ່ມປຶກສາຫາລືເນື້ອໃນລະອຽດຂອງ "ກົດແຫ່ງການປະພຶດຢູ່ທະເລຈີນໃຕ້" ຢ່າງເປັນທາງການ.
ຜູ້ນຳບັນດາປະເທດອາຊຽນທີ່ຮ່ວມປະຊຸມກ່າວວ່າ, ສາຍພົວພັນຈີນ-ອາຊຽນໄດ້ຮັກສາທ່ວງທ່າຂະຫຍາຍຕົວທີ່ແຂງແຮງ, ໜັກແໜ້ນ ແລະຕ່າງຝ່າຍຕ່າງມີຜົນປະໂຫຍດ ແລະກາຍເປັນໜຶ່ງໃນສາຍພົວພັນຄູ່ຮ່ວມທີ່ມີຄວາມໝາຍແທ້ຈິງຂອງອາຊຽນ. ເຊື່ອໝັ້ນວ່າ ກອງປະຊຸມຄັ້ງນີ້ຈະຊີ້ແຈ້ງທິດທາງຂະຫຍາຍສາຍພົວພັນລະຫວ່າງສອງຝ່າຍຕື່ມອີກ. ອາຊຽນຕັ້ງໜ້າຕີລາຄາຕໍ່ສອງຝ່າຍເລີ່ມປຶກສາຫາລືເນື້ອໃນລະອຽດຂອງ "ກົດແຫ່ງການປະພຶດຢູ່ທະເລຈີນໃຕ້" ຢ່າງເປັນທາງການ ເຊິ່ງໄດ້ສ່ອງແສງໃຫ້ເຫັນທ່ວງທ່າທີ່ດີຢູ່ທະເລຈີນໃຕ້ໃນປັດຈຸບັນ ແລະ ຄວາມເຫັນເປັນເອກະພາບລະຫວ່າງສອງຝ່າຍທີ່ພະຍາຍາມປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ກອງປະຊຸມໄດ້ຮັບຮອງ "ຖະແຫຼງການຮ່ວມຈີນ-ອາຊຽນ ກ່ຽວກັບການລົງເລິກການຮ່ວມມືດ້ານການເຊື່ອມຈອດພື້ນຖານໂຄງລ່າງຕື່ມອີກ", "ຖະແຫຼງການຮ່ວມຈີນ-ອາຊຽນ ກ່ຽວກັບການເພີ່ມທະວີການຮ່ວມມືຕ້ານການສໍ້ລາດບັງຫຼວງຢ່າງມີປະສິດທິຜົນຮອບດ້ານ", "ຖະແຫຼງການຮ່ວມຈີນ-ອາຊຽນກ່ຽວກັບການຮ່ວມມືດ້ານການທ່ອງທ່ຽວ", "ຖະແຫຼງການວ່າດ້ວຍການອະນຸລັກສິ່ງແວດລ້ອມຕາມຊາຍຝັ່ງທະເລ ແລະ ສິ່ງແວດລ້ອມທາງທະເລຢູ່ທະເລຈີນໃຕ້ໃນ 10 ປີຂ້າງໜ້າ" ເປັນຕົ້ນ.
 |
