ຕອນເຊົ້າວັນທີ 14 ພະຈິກນີ້,ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຜູ້ນຳອາຊຽນ-ຈີນ,ຍີ່ປຸ່ນ,ສເກົາຫຼີຫຼືອາຊຽນບວກ 3ຄັ້ງທີ 20 ຢູ່ສູນປະຊຸມສາກົນນະຄອນຫຼວງມະນີລາປະເທດຟີລິບປິນໂດຍທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນເປັນປະທານແລະຜູ້ນຳ 10 ປະເທດສະມາຊິກອາຊຽນພ້ອມດ້ວຍທ່ານຊິນໂຈ ອາເບະ ນາຍົກລັດຖະມົນຕີຍີ່ປຸ່ນແລະທ່ານມູນເຈອິນ ປະທານາທິບໍດີສ ເກົາຫຼີເຂົ້າຮ່ວມ.
ໂອກາດປະກອບຄຳເຫັນໃນກອງປະຊຸມດັ່ງກ່າວ, ທ່ານຫຼີເຄີສຽງຊີ້ໃຫ້ເຫັນວ່າ: ການສ້າງປະຊາຄົມເສດຖະກິດອາຊີຕາເວັນອອກເປັນເປົ້າໝາຍຍຸດທະສາດການຮ່ວມມືອາຊຽນບວກ 3 ເຊິ່ງສອດຄ່ອງກັບຜົນປະໂຫຍດຍາວນານແລະພື້ນຖານຂອງ ປະຊາຊົນໃນພາກພື້ນ. ຈີນມີຈຸດຢືນວ່າ ການສ້າງປະຊາຄົມເສດຖະກິດອາຊີຕາເວັນອອກຄວນຍຶດໝັ້ນຈຸດປະສົງໜຶ່ງ ຄືສົ່ງເສີມການເຊື່ອມໂຍງເຂົ້າເປັນໜຶ່ງດຽວຂອງເສດຖະກິດພາກພື້ນ, ບັນລຸການພັດທະນາແບບເຊື່ອມໂຍງແລະພັດທະນາຮ່ວມກັນ; ຍຶດໝັ້ນ ສອງຫຼັກການ ຄື ຍຶດໝັ້ນຖານະໃຈກາງຂອງອາຊຽນ, ຍຶດໝັ້ນ "ຮູບການອາຊຽນ"ທີ່ຫາລືເປັນເອກະພາບກັນ,ເປີດປະຕູແລະກວມລວມ, ພິຈາລະນາເຖິງ ບັນດາຝ່າຍ; ຊຸກຍູ້ "ການຮ່ວມມືໃນ 3 ລະດັບ" ຄືຖືເອົາການຮ່ວມມືອາຊຽນບວກ 3 ເປັນຊ່ອງທາງຫຼັກ, ຖືເອົາການຮ່ວມມືອາຊຽນບວກ 1 ຄືອາຊຽນ-ຈີນ, ອາຊຽນ-ຍີ່ປຸ່ນແລະອາຊຽນ-ສເກົາຫຼີ ເປັນພື້ນຖານ, ຖືເອົາການຮ່ວມມືໃນອະນຸພາກພື້ນຕ່າງໆເປັນຕົ້ນ ຈີນ-ຍີ່ປຸ່ນ-ສ ເກົາຫຼີ, ແມ່ນ້ຳລ້ານຊ້າງ-ແມ່ນ້ຳຂອງ, ເຂດເຕີບໂຕພາກຕາເວັນອອກອາຊຽນແລະອື່ນໆເປັນສຳຮອງທີ່ເປັນປະໂຫຍດເພື່ອເຮັດໃຫ້ການສ້າງປະຊາຄົມເສດຖະກິດອາຊີຕາເວັນອອກເດີນຕາມເສັ້ນທາງປອດໃສ,ໝັ້ນທ່ຽງແລະຍືນຍົງຢ່າງສະເໝີຕົ້ນສະເໝີປາຍ. ຈາກນີ້, ທ່ານຫຼີເຄີ້ສຽງຈິ່ງໄດ້ສະເໜີ 6 ຂໍ້ຄື:
ໜຶ່ງ ອອກແຮງປັບປຸງການຄ້າໃຫ້ເສລີແລະສະດວກຂຶ້ນແລະຄ່ອຍໆກ້າວໄປສູ່ຕະຫຼາດດຽວ. ສອງ, ເປີດກວ້າງການຮ່ວມມືດ້ານການເພີ່ມຂີດຄວາມສາມາດແລະການລົງທຶນ, ສ້າງຕ່ອງໂສ້ອຸດສາຫະກຳທີ່ຕ່າງຝ່າຍຕ່າງມີຜົນປະໂຫຍດ. ສາມ, ເພີ່ມທະວີການຮ່ວມມືດ້ານພື້ນຖານໂຄງລ່າງ, ສ້າງເຄືອຂ່າຍເຊື່ອມຈອດກັນ. ສີ່, ລົງເລິກການຮ່ວມມືດ້ານການທະນາຄານ, ຮັກສາຄວາມໝັ້ນທ່ຽງທາງການທະນາຄານຂອງພາກພື້ນ. ຫ້າ, ເພີ່ມທະວີການຮ່ວມມືເພື່ອພັດທະນາແບບຍືນຍົງ, ສ້າງສະພາບການພັດທະນາຂອງພາກພື້ນທີ່ສະໝ່ຳສະເໝີ,ກວມລວມແລະຕ່າງຝ່າຍຕ່າງໄດ້ຮັບຜົນປະໂຫຍດນຳກັນແລະຫົກ, ເປີດກວ້າງການແລກປ່ຽນແລະຮ່ວມມືດ້ານວັດທະນະທຳ,ເຕົ້າໂຮມຈິດສຳນຶກປະຊາຄົມ.
ບັນດາຜູ້ນຳທີ່ຮ່ວມປະຊຸມໄດ້ຕີລາຄາສູງຕໍ່ຄວາມໝາຍແລະຜົນສຳເລັດຂອງການຮ່ວມມືອາຊຽນບວກ 3 ໃນການສົ່ງເສີມການພັດທະນາເສດຖະກິດສັງຄົມຂອງພາກພື້ນ ແລະຊົມເຊີຍຂໍ້ລິເລີ່ມຂອງຈີນກ່ຽວກັບການສົ່ງເສີມການຮ່ວມມືອາຊຽນບວກ 3 ໂດຍຢືນຢັນວ່າ ຍິນດີຖືເອົາການຮ່ວມມືອາຊຽນບວກ 3 ໃນໂອກາດຄົບຮອບ 20 ປີເປັນໂອກາດທີ່ດີເພື່ອຍົກລະດັບການຮ່ວມມື,ເປີດກວ້າງການຮ່ວມມືໃນຂົງເຂດຕ່າງໆເປັນຕົ້ນ ພື້ນຖານໂຄງລ່າງ, ການຄ້າກັບການລົງທຶນ, ການທະນາຄານ, ການປະດິດສ້າງດ້ານວິທະຍາສາດເຕັກໂນໂລຊີ, ວັດທະນະທຳແລະອື່ນໆ, ສ້າງການເຊື່ອມຈອດກັນຄົບວົງຈອນ, ສົ່ງເສີມສັນຕິພາບແລະຄວາມຈະເລີນຮຸ່ງເຮືອງໃນພາກພື້ນ.
 |
