ຕອນເຊົ້າວັນທີ 15 ພະຈິກນີ້,ຢູ່ໂຮງແຮມແຫ່ງໜຶ່ງເຊິ່ງເປັນສະຖານທີ່ທີ່ຮັບແຂກລັດຖະບານໃນນະຄອນຫຼວງມະນີລາ ປະເທດຟີລິບປິນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ແຍກ ພົບປະກັບທ່ານອາກີລີໂນ ປີເມນເຕວ ປະທານສະພາສູງ ແລະທ່ານປານຕາເລອົນ ອານວາເຣັສ ປະທານສະພາຕ່ຳປະເທດດັ່ງກ່າວ.
ທ່ານຫຼີເຄີ້ສຽງຢືນຢັນວ່າ: ການໄປມາຫາສູ່ກັນລະຫວ່າງຈີນ-ຟີລິບປິນມີປະຫວັດຍາວນານ. ນັບແຕ່ການພົວພັນລະຫວ່າງສອງປະເທດໄດ້ປັບປຸງດີຂຶ້ນແຕ່ປີຜ່ານມາເປັນຕົ້ນມາ, ກໍໄດ້ມີທ່ວງທ່າຂະຫຍາຍຕົວໄປທາງທີ່ດີຢ່າງບໍ່ຢຸດຢັ້ງ, ການຮ່ວມມືໃນຂົງເຂດຕ່າງໆກໍໄດ້ພັດທະນາຢ່າງຕໍ່ເນື່ອງ. ການທີ່ຂ້າພະເຈົ້າຢ້ຽມຢາມຟີລິບປິນເທື່ອນີ້ກໍເພື່ອຮ່ວມກັບຟີລິບປິນປັບປຸງແລະເປີດກວ້າງທ່ວງທ່າທີ່ດີດັ່ງກ່າວລວມທັງທາວເອົາເວລາແລະໂອກາດທີ່ໄດ້ສູນເສຍໄປໃນໄລຍະຜ່ານມາກັບຄືນເພື່ອເປີດປະຫວັດສາດໜ້າໃໝ່ແຫ່ງມິດຕະພາບແລະການຮ່ວມມືຈີນ-ຟີລິບປິນບົນພື້ນຖານການເຄົາລົບນັບຖືເຊິ່ງກັນແລະກັນ ແລະສະເໝີພາບກັນ.
ທ່ານຫຼີເຄີ້ສຽງກ່າວວ່າ: ດີໃຈຫຼາຍທີ່ໄດ້ຮູ້ວ່າ ການໄປມາສູ່ກັນລະຫວ່າງຂັ້ນຕ່າງໆຂອງສອງປະເທດເຊັ່ນສະພາແລະປະຊາຊົນນັບມື້ນັບຫຼາຍຂຶ້ນ ເຊິ່ງສະແດງໃຫ້ເຫັນວ່າມິດຕະພາບຈີນ-ຟີລິບປິນເປັນຄວາມມຸ່ງຫວັງຂອງປະຊາຊົນແລະເປັນທ່າອ່ຽງທີ່ຕ້ອງເປັນໄປ. ຍິນດີຕ້ອນຮັບວົງການຕ່າງໆຂອງສອງປະເທດມີສ່ວນຮ່ວມໃນການເສີມສ້າງສາຍພົວພັນຈີນ-ຟີລິບປິນ, ສ້າງເງື່ອນໄຂທີ່ດີເພື່ອເພີ່ມຄວາມໄວ້ເນື້ອເຊື່ອໃຈກັນ,ລົງເລິກການຮ່ວມມືລະຫວ່າງສອງຝ່າຍແລະຮັດແໜ້ນນ້ຳໃຈມິດຕະພາບຍາວນານລະຫວ່າງສອງປະເທດຕື່ມອີກ.