ຕອນບ່າຍວັນທີ 14 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 12 ທີ່ຈັດຂຶ້ນຢູ່ສູນປະຊຸມສາກົນຟິລິບປິນ ແລະກ່າວ ວ່າ: ນັບແຕ່ຈັດກອງປະຊຸມສຸດຍອດອາຊີຕາເວັນອອກຕະຫຼອດ 12 ປີຜ່ານມາ, ໄດ້ສຸມໃສ່ຊຸກຍູ້ການພັດທະນາໃນພາກພື້ນ ແລະ ຮັກສາຄວາມໝັ້ນຄົງແລະສະຖຽນລະພາບ ຈຶ່ງກາຍເປັນເວທີສົນທະນາການຮ່ວມມືທີ່ສຳຄັນທີ່ມີປະເທດໃນພາກພື້ນແລະນອກພາກພື້ນເຂົ້າຮ່ວມ. ຂະນະທີ່ບັນດາສະມາຊິກຄວນຍຶດໝັ້ນຖານະບົດບາດ "ເປັນເວທີຍຸດທະສາດທີ່ມີຜູ້ນຳນຳພາ", ຍຶດໝັ້ນຖານະໃຈກາງຂອງອາຊຽນ, ຍຶດໝັ້ນການຮ່ວມມືດ້ານການພັດທະນາເສດຖະກິດ ແລະ ການເມືອງ-ຄວາມໝັ້ນຄົງ ຄວບຄູ່ກັນ, ວາງທິດທາງໃຫ້ຖືກຕ້ອງ, ເພີ່ມທະວີການຊີ້ນຳໃນການວາງແຜນຕ່າງໆ, ປັບປຸງແລະສ້າງກົນໄກຕ່າງໆໃຫ້ສົມບູນ, ຊຸກຍູ້ກອງປະຊຸມສຸດຍອດໃຫ້ດຳເນີນຢ່າງໝັ້ນທ່ຽງແລະຂະຫຍາຍຕົວເປັນໄລຍະຍາວ. ຈາກນີ້, ຈີນສະເໜີ 6 ຂໍ້ຕໍ່ການຮ່ວມມືໃນກ້າວຕໍ່ໄປ:
ໜຶ່ງ, ເລັ່ງສ້າງການເຊື່ອມໂຍງພາກພື້ນໃຫ້ສຳເລັດ ໂດຍການຊຸກຍູ້ໃຫ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະ "ແຜນລວມການເຊື່ອມຈອດອາຊຽນ 2025" ເຊື່ອມຈອດກັນ, ເລັ່ງຜັນຂະຫຍາຍຜົນການຍົກລະດັບເຂດການຄ້າເສລີຈີນ-ອາຊຽນ, ຊຸກຍູ້ການເຈລະຈາເຂດການຄ້າເສລີຈີນ-ຍີ່ປຸ່ນ-ສ.ເກົາຫຼີ ແລະ ການເຈລະຈາສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RCEP ໃຫ້ສຳເລັດໂດຍໄວ. ສອງ, ຊຸກຍູ້ການພັດທະນາແບບຍືນຍົງ. ສາມ, ຊຸກຍູ້ການພັດທະນາສັງຄົມ. ສີ່, ຮ່ວມກັນຮັບມືກັບໄພຄຸກຄາມຄວາມໝັ້ນຄົງແບບໃໝ່. ຫ້າ, ສ້າງທັດສະນະໃໝ່ກ່ຽວກັບຄວາມໝັ້ນຄົງ ແລະ ຫົກ, ປັບປຸງໂຄງສ້າງຄວາມໝັ້ນຄົງໃນພາກພື້ນໃຫ້ສົມບູນຂຶ້ນ.
ຜູ້ນຳທີ່ເຂົ້າຮ່ວມກອງປະຊຸມຕ່າງກໍເຫັນວ່າ: ກອງປະຊຸມສຸດຍອດ ແມ່ນເວທີຍຸດທະສາດທີ່ສຳຄັນໃນພາກພື້ນທີ່ມີຜູ້ນຳນຳພາ. ປະເທດສະມາຊິກຄວນຖືເປັນເວທີທີ່ເພີ່ມທະວີຄວາມໄວ້ເນື້ອເຊື່ອໃຈກັນ, ຊຸກຍູ້ການເປີດປະຕູຕໍ່ກັນ ແລະ ຫັນການຄ້າການລົງທຶນເປັນແບບເສລີແລະສະດວກ, ເພີ່ມທະວີການເຊື່ອມຈອດ, ຮັກສາຄວາມຄຶກຄັກຂອງການພັດທະນາເສດຖະກິດພາກພື້ນ, ປັບປຸງຊີວິດການເປັນຢູ່ ແລະສ້າງຄວາມຜາສຸກຂອງປະຊາຊົນໃຫ້ດີຂຶ້ນແລະຫຼາຍກວ່າເກົ່າ. ປັດຈຸບັນ, ສະຖານະການຢູ່ທະເລຈີນໃຕ້ໄດ້ຜ່ອນຄາຍລົງ, ການປັບປຸງການພົວພັນລະຫວ່າງປະເທດທີ່ກ່ຽວຂ້ອງກໍມີຄວາມຄືບໜ້າ, ການຮ່ວມມືທາງທະເລພວມຄືບໜ້າ, ຂະນະທີ່ຈີນກໍໄດ້ຕັ້ງໜ້າພະຍາຍາມເພື່ອແກ້ໄຂບັນຫາດັ່ງກ່າວ. ແນວໃດກໍດີ, ຊົມເຊີຍຈີນແລະອາຊຽນທີ່ໄດ້ເລີ່ມຕົ້ນການປຶກສາຫາລືເນື້ອໃນລະອຽດຂອງ "ກົດແຫ່ງການປະພຶດໃນທະເລຈີນໃຕ້" ຫຼື COC ແລະຫວັງວ່າຝ່າຍຕ່າງໆຈະຮ່ວມກັນປົກປັກຮັກສາສັນຕິພາບແລະສະຖຽນລະພາບໃນພາກພື້ນ.
ກອງປະຊຸມດັ່ງກ່າວໄດ້ຮັບຮອງເອົາ "ຖະແຫຼງການຜູ້ນຳກອງປະຊຸມສຸດຍອດອາຊີຕາເວັນອອກວ່າດ້ວຍການຮ່ວມມືໃນການຫຼຸດຜ່ອນຄວາມທຸກຍາກ", "ຖະແຫຼງການຜູ້ນຳກອງປະຊຸມສຸດຍອດອາຊີຕາເວັນອອກກ່ຽວກັບອາວຸດເຄມີ", "ຖະແຫຼງການຜູ້ນຳກອງປະຊຸມສຸດຍອດອາຊີຕາເວັນອອກກ່ຽວກັບການປ້ອງກັນແລະຮັບມືກັບການແຜ່ຂະຫຍາຍຮູບຖານຈິດສຳນຶກລັດທິກໍ່ການຮ້າຍ" ແລະ "ຖະແຫຼງການຜູ້ນຳກອງປະຊຸມສຸດຍອດອາຊີຕາເວັນອອກກ່ຽວກັບການຕ້ານການຟອກເງິນ ແລະ ການລົມດົມທຶນເພື່ອກໍ່ການຮ້າຍ" ແລະເອກະສານອື່ນໆ.
