ຕາມຂ່າວCRI: ວັນທີ 14 ພະຈິກນີ້, ທ່ານປະຍຸດຈັນໂອຊາ ນາຍົກລັດຖະມົນຕີໄທກ່າວຕໍ່ກອງປະຊຸມສຸດຍອດອາຊີຕາເວັນອອກຄັ້ງທີ 12 ທີ່ຈັດຂຶ້ນຢູ່ມະນີລາປະເທດຟິລິປິນວ່າ: ບັນດາປະເທດຄວນນຳໃຊ້ໂອກາດທີ່ສຳຄັນນີ້ ປຶກສາຫາລືບັນຫາຂອງພາກພື້ນ ແລະຮ່ວມກັນຮັບມືກັບສິ່ງທ້າທາຍດ້ານຄວາມໝັ້ນຄົງດັ້ງເດີມ ແລະແບບໃໝ່.
ທັງນີ້ຄຳສະເໜີ 3 ປະການຂອງນາຍົກໄທໄດ້ແກ່: ໜຶ່ງ, ເພີ່ມທະວີການຮ່ວມມືດ້ານເສດຖະກິດ ແລະການທະນາຄານພາຍໃຕ້ກົນໄກກອງປະຊຸມສຸດຍອດອາຊີຕາເວັນອອກ, ຮັກສາການພັດທະນາແບບຍືນຍົງໃນພາກພື້ນອາຊີ-ປາຊີຟິກ, ຊຸກຍູ້ບັນດາປະເທດທີ່ກ່ຽວຂ້ອງບັນລຸສັນຍາຄູ່ຮ່ວມມືເສດຖະກິດຮອບດ້ານ (RCEP); ສອງ, ເພີ່ມທະວີການເຊື່ອມໂຍງເຂົ້າກັນ, ສົ່ງເສີມຄວາມຈະເລີນຮຸ່ງເຮືອງ ແລະຫຼຸດຜ່ອນຄວາມແຕກໂຕນລະຫວ່າງຜູ້ທຸກຍາກ ແລະຜູ້ຮັ່ງມີໃນພາກພື້ນ ແລະສາມ, ຮ່ວມກັນຮັບມືກັບສິ່ງທ້າທາຍດ້ານຄວາມໝັ້ນຄົງ, ຕ້ານການກໍ່ການຮ້າຍ, ລັດທິຫົວຮຸນແຮງ ແລະກະທຳຜິດຂ້າມຊາດຢ່າງມີປະສິດທິຜົນ.