ກອງປະຊຸມສຳມະນາອົງການຫົວກະທິສາກົນພາຍໃຕ້ຫົວຂໍ້ "ກອງປະຊຸມໃຫຍ່ພັກກອມມູນິດຈີນຄັ້ງທີ 19: ການພັດທະນາຂອງຈີນແລະຄວາມໝາຍຕໍ່ໂລກ" ທີ່ສະຖາບັນວິທະຍາສາດສັງຄົມແຫ່ງຊາດຈີນແລະສູນແລກປ່ຽນເສດຖະກິດສາກົນຈີນ ເປັນເຈົ້າພາບຮ່ວມໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 16 ພະຈິກນີ້ ໂດຍອະດີດບຸກຄົນສຳຄັນໃນວົງການການເມືອງແລະຜູ້ຊ່ຽວຊານຂອງບັນດາປະເທດທີ່ເຂົ້າຮ່ວມຕ່າງກໍມີຄວາມຫວັງຕໍ່ການພັດທະນາຂອງຈີນຫຼັງກອງປະຊຸມທີ່ຈະນຳເອົາໂອກາດໃໝ່ມາໃຫ້ແກ່ໂລກ.
ທ່ານ ໂດມີນິກ ເດີ ວິນເລີແປງ ອະດີດນາຍົກລັດຖະມົນຕີຝຣັ່ງເຫັນວ່າ: ຄຽງຄູ່ກັບຄວາມຈະເລີນສີວິໄລຢ່າງບໍ່ຢຸດຢັ້ງໃນຫຼາຍ 10 ປີຜ່ານມາຂອງຈີນແລະກໍເປັນການພັດທະນາທີ່ສົ່ງຜົນສະທ້ອນນັບມື້ນັບສຳຄັນຕໍ່ໂລກ.ກອງປະຊຸມໃຫຍ່ພັກກອມມູນິດຈີນຄັ້ງທີ 19 ທີ່ຫາກໍສຳເລັດໃນເດືອນຜ່ານມາບໍ່ພຽງແຕ່ມີຄວາມໝາຍທີ່ເປັນປະຫວັດສາດຕໍ່ຈີນເທົ່ານັ້ນ ຫາກຍັງມີຄວາມໝາຍຕໍ່ໂລກຕື່ມອີກ.
ທ່ານ ຊາວຄັດ ອາຊິດ ອະດີດນາຍົກລັດຖະມົນຕີປາກິສະຖານໄດ້ກ່າວໂດຍເນັ້ນຜົນສະທ້ອນຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຕໍ່ເສດຖະກິດໂລກ ພ້ອມທັງໄດ້ຮຽກຮ້ອງໃຫ້ບັນດາປະເທດໃນໂລກເຂົ້າຮ່ວມຂໍ້ລິເລີ່ມດັ່ງກ່າວ. ທັງໄດ້ຍົກໃຫ້ເຫັນການປ່ຽນແປງຂອງປາກິສະຖານຈາກຂໍ້ລິເລີ່ມດັ່ງກ່າວ ແລະເຫັນວ່າຂໍ້ລິເລີ່ມນີ້ຈະປ່ຽນໂລກໂດຍພື້ນຖານ,ສະໜອງຮູບແບບການເຊື່ອມຈອດກັນແບບໃໝ່ຢ່າງໜຶ່ງໃຫ້ແກ່ບັນດາປະເທດ.
ທ່ານ ປີເຕີ ຄັກວານຈາ ຫົວໜ້າສະຖາບັນຄົ້ນຄວ້ານະໂຍບາຍອາຟຣິກາຂອງເຄນຢາມີຄວາມມຸ່ງຫວັງທີ່ສຸດຕໍ່ການຮ່ວມມືລະຫວ່າງອາຟຣິກາ-ຈີນຫຼັງກອງປະຊຸມໃຫຍ່ພັກກອມມູນິດຈີນຄັ້ງທີ 19 ແລະຫວັງວ່າຄວາມຈະເລີນອັນຍິ່ງໃຫຍ່ຂອງຊົນຊາດຈີນທີ່ໄດ້ລະບຸໃນກອງປະຊຸມຈະສາມາດນຳເອົາຜົນປະໂຫຍດມາໃຫ້ແກ່ປະຊາຊົນອາຟຣິກາໄດ້ໃນອະນາຄົດ.
 |
