ຕາມຂ່າວ CRI: ວັນທີ 16 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ລົມໂທລະສັບກັບສົມເດັດ ຊາມັນ ປິນ ອັບດູລະຊິສ ອາຊະດູ ເຈົ້າຊີວິດອາຣັບບີຊາອຸດິດ.
ໃນໂອກາດດັ່ງກ່າວ, ສົມເດັດຊາມັນ ໄດ້ອວຍພອນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນແລະທ່ານສີຈິ້ນຜິງໄດ້ຮັບເລືອກຕັ້ງເປັນເລຂາທິການໃຫຍ່ສູນກາງພັກກອມມູນິດຈີນອີກສະໄໝໜຶ່ງ. ທັງໄດ້ເນັ້ນວ່າ, ປະເທດຕົນຍິນດີຊຸກຍູ້ລົງເລິກການຮ່ວມມືລະຫວ່າງສອງປະເທດໂດຍຜ່ານຄະນະກຳມະການປະສົມລະດັບສູງອາຣັບບີຊາອຸດິດກັບຈີນ, ພ້ອມເຊື່ອມ"ວິໄສທັດ 2030" ຂອງປະເທດຕົນເຂົ້າກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ, ລົງເລິກການຮ່ວມມືໃນຂົງເຂດພະລັງງານ, ການເງິນແລະອື່ນໆ. ຂະນະດຽວກັນກໍຍິນດີເປັນຄູ່ຮ່ວມມືສຳຄັນຂອງຈີນຢູ່ເຂດອ່າວເປີເຊຍ, ທັງສຸມກຳລັງເພື່ອເພີ່ມທະວີແລະລົງເລິກສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ.
ທ່ານສີຈິ້ນຜິງ ໄດ້ສະແດງຄວາມຂອບໃຈຕໍ່ຄຳອວຍພອນຂອງສົມເດັດຊາມັນແລະເນັ້ນວ່າ, ປະມຸກລັກສອງປະເທດຮັກສາການຕິດຕໍ່ພົວພັນຢ່າງໃກ້ຊິດແມ່ນເລື່ອງສຳຄັນທີ່ສຸດ. ຈີນແລະອາຣັບບີຊາອຸດິດແມ່ນຄູ່ຮ່ວມຍຸດທະສາດຮອບດ້ານ, ຄວາມໄວ້ເນື້ອເຊື່ອໃຈທາງຍຸດທະສາດແລະການຮ່ວມມືຕ່າງຝ່າຍຕ່າງມີຜົນໄດ້ຂະຫຍາຍຕົວຢ່າງບໍ່ຢຸດຢັ້ງ. ບໍ່ວ່າສະຖານະການພາກພື້ນແລະສາກົນປ່ຽນແປງແນວໃດ, ຄວາມຕັດສິນໃຈຂອງຈີນທີ່ລົງເລິກການຮ່ວມມືຍຸດທະວາດກັບອາຣັບບີຊາອຸດິດຈະບໍ່ມີການປ່ຽນແປງ. ຈີນສະໜັບສະໜູນອາຣັບບີຊາອຸດິດປົກປ້ອງສິດອະທິປະໄຕຂອງຊາດແລະຄວາມພະຍາຍາມໃນການບັນລຸການພັດທະນາໃຫຍ່ກວ່າເກົ່າ, ທັງຍິນດີຮ່ວມລົງເລິກການຮ່ວມມືຍຸດທະສາດ, ຊຸກຍູ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ເຊື່ອມຈອດກັບ "ວິໄສທັດ 2030" ໃຫ້ເປັນຈິງ, ສຸມໃສ່ການຮ່ວມມືໃນຂົງເຂດຕ່າງໆໃຫ້ມີປະສິດທິພາບໂດຍຜ່ານກົນໄກຄະນະກຳມະການປະສົມລະດັບສູງສອງປະເທດ, ເພື່ອເຮັດໃຫ້ສາຍພົວພັນລະຫວ່າງສອງປະເທດສາມາດສ້າງຄວາມສຸກໃຫ້ແກ່ປະຊາຊົນສອງປະເທດກໍຄືປະຊາຊົນຂອງພາກພື້ນດີກວ່າເກົ່າແລະຫຼາຍກວ່າເກົ່າ.
ປະມຸກລັດສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາພາກພື້ນແລະສາກົນທີ່ສອງຝ່າຍສົນໃຈຮ່ວມ.
 |
