ວັນທີ 17 ພະຈິກນີ້ຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານຈູອັນ ຄາໂລສ ວາເຣລາ ປະທານາທິບໍດີປານາມາທີ່ເດີນທາງຢ້ຽມຢາມຈີນທາງລັດຖະກິດ.
ທ່ານສີຈິ້ນຜິງຢືນຢັນວ່າ: ທ່ານປະທານາທິບໍດີວາເຣລາເປັນປະທານາທິບໍດີປານາມາຜູ້ທຳອິດທີ່ໄດ້ເດີນທາງຢ້ຽມຢາມຈີນ ທັງເປັນປະມຸກລັດປະເທດອາເມລິກາລາຕິນຜູ້ທຳອິດທີ່ມາຢ້ຽມຢາມຈີນຫຼັງກອງປະຊຸມໃຫຍ່ຜູ້ແທນທົ່ວປະເທດພັກກອມມູນິດຈີນຄັ້ງທີ 19. ນັບແຕ່ຈີນ-ປານາມາສ້າງຕັ້ງສາຍພົວພັນທາງການທູດ 5 ເດືອນມານີ້, ການໄປມາຫາສູ່ກັນແລະການຮ່ວມມືໃນຂົງເຂດຕ່າງໆລະຫວ່າງສອງປະເທດກຳລັງດຳເນີນໄປຢ່າງວ່ອງໄວ, ຈີນຍິນດີຮ່ວມກັບປານາມາວາງແຜນແລະສົ່ງເສີມການຮ່ວມມືລະຫວ່າງສອງປະເທດດ້ວຍຄວາມໄວສູງ,ມີຈຸດເລີ່ມຕົ້ນສູງແລະມີມາດຕະຖານສູງ.
ທ່ານສີຈິ້ນຜິງກ່າວເນັ້ນວ່າ: ຈີນ-ປານາມາຕ້ອງເປັນໝູ່ເພື່ອນທີ່ສະເໝີພາບຕໍ່ກັນແລະໄວ້ເນື້ອເຊື່ອໃຈກັນຢ່າງເດັດດ່ຽວ. ຈີນຖືອາເມລິກາລາຕິນເປັນຝ່າຍສຳຄັນທີ່ຂາດບໍ່ໄດ້ໃນການມີສ່ວນຮ່ວມໃນການສ້າງ "ໜຶ່ງແລວທາງໜຶ່ງເສັ້ນທາງ", ປານາມາສາມາດກາຍເປັນເຂດແດນສຳຄັນໃນການເຊື່ອມຕໍ່ເສັ້ນທາງສາຍໄໝທາງທະເລໃນສະຕະວັດທີ 21 ໄປເຖິງອາເມລິກາລາຕິນ. ສອງຝ່າຍຄວນຖືການຮ່ວມກັນສ້າງ"ໜຶ່ງແລວທາງໜຶ່ງເສັ້ນທາງ"ເປັນສິ່ງນຳໜ້າ, ເພີ່ມທະວີການເຊື່ອມຕໍ່ຍຸດທະສາດການພັດທະນາ,ເພື່ອຫັນທ່າແຮງຊ່ວຍຊູຍູ້ໜູນກັນລະຫວ່າງສອງປະເທດໃຫ້ເປັນທ່າແຮງຮ່ວມມືຮອບດ້ານ.
ທ່ານວາເຣລາຢືນຢັນວ່າ: ມິດຕະພາບປານາມາ-ຈີນມີປະຫວັດສາດອັນຍາວນານ. ປານາມາເດັດດ່ຽວຍຶດໝັ້ນຫຼັກການປະເທດຈີນດຽວແລະເດັດດ່ຽວສະໜັບສະໜູນຈີນທ້ອນໂຮມປະເທດຊາດເຂົ້າເປັນເອກະພາບໂດຍສັນຕິ. ປະຊາຊົນປານາມາເຫັນດີຂໍ້ຕົກລົງວ່າດ້ວຍການສ້າງຕັ້ງສາຍພົວພັນທາງການທູດລະຫວ່າງປານາມາກັບຈີນຢ່າງສິ້ນເຊິ່ງ ເພາະວ່າເປັນຂໍ້ຕົກລົງທີ່ສອດຄ່ອງກັບຜົນປະໂຫຍດຂອງປະຊາຊົນສອງຊາດ ທັງຈະຊຸກຍູ້ການພັດທະນາຂອງປານາມາແລະປັບປຸງຊີວິດການເປັນຢູ່ຂອງປະຊາຊົນປານາມາໃຫ້ດີຂຶ້ນ. ປານາມາຍິນດີເປັນໝູ່ເພື່ອນສຳຄັນຂອງຈີນຢູ່ອາເມລິກາລາຕິນແລະຕັ້ງໜ້າຊຸກຍູ້ການພັດທະນາສາຍພົວພັນອາເມລິກາລາຕິນ-ຈີນ. ປານາມາຕັ້ງໜ້າສະໜັບສະໜູນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ຍິ່ງໃຫຍ່ ທີ່ສະເໜີໂດຍທ່ານປະທານສີຈິ້ນຜິງ ແລະຍິນດີໝູນໃຊ້ທ່າແຮງທີ່ຕັ້ງພິເສດຂອງຕົນເພື່ອເຂົ້າຮ່ວມການສ້າງເສັ້ນທາງສາຍໄໝທາງທະເລແລະຮ່ວມກັນປະກອບສ່ວນເຂົ້າໃນການເປີດກວ້າງການຮ່ວມມື"ໜຶ່ງແລວທາງໜຶ່ງເສັ້ນທາງ"ໃຫ້ຂະຫຍາຍໄປສູ່ເຂດອາເມລິກາລາຕິນແລະສົ່ງເສີມການເຊື່ອມຈອດກັນຂອງໂລກ.