ໂອກາດເຂົ້າຮ່ວມກອງປະຊຸມສຳມະນາອົງການຫົວກະທິສາກົນໃນຫົວຂໍ້ "ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ: ການພັດທະນາຂອງຈີນກໍຄືຄວາມໝາຍຕໍ່ໂລກ"ຢູ່ນະຄອນຫຼວງປັກກິ່ງໃນວັນທີ 16 ພະຈິກນີ້, ທ່ານຫງວຽນຊຸນຊົງ ຫົວໜ້າສະຖາບັນຄົ້ນຄວ້າຈີນສະຖາບັນວິທະຍາສາດສັງຄົມຫວຽດນາມໄດ້ໃຫ້ສຳພາດຕໍ່ນັກຂ່າວCRIໂດຍຢືນຢັນວ່າ ການທີ່ທ່ານປະທານສີຈິ້ນຜິງເຂົ້າຮ່ວມກອງປະຊຸມອາເປັກຢູ່ຫວຽດນາມທັງປະສົບຜົນສຳເລັດໃນການຢ້ຽມຢາມຫວຽດນາມແລະລາວທາງລັດຖະກິດນັ້ນເປັນເຫດສຳຄັນທີ່ສ່ອງແສງໃຫ້ເຫັນນະໂຍບາຍການຕ່າງປະເທດແບບຫຼາຍຝ່າຍຂອງປະເທດໃຫຍ່ຕໍ່ປະເທດອ້ອມຂ້າງຂອງຈີນໃນຍຸກໃໝ່ ເຊິ່ງມີບົດບາດສຳຄັນທີ່ສຸດຕໍ່ການສົ່ງເສີມການພັດທະນາສາຍພົວພັນຫວຽດນາມ-ຈີນ ແລະໄດ້ຮັບໝາກຜົນທີ່ສຳຄັນ.
ທ່ານຫງວຽນຊຸນຊົງກ່າວວ່າ: ພັກ-ລັດແລະບຸກຄົນວົງການຕ່າງໆຂອງຫວຽດນາມຕ່າງກໍໃຫ້ຄວາມສຳຄັນສູງຕໍ່ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນຢ້ຽມຢາມຫວຽດນາມເທື່ອນີ້, ພວກຂ້າພະເຈົ້າເຫັນວ່າ: ນີ້ເປັນຂີດໝາຍໃໝ່ໃນປະຫວັດສາດຂອງສອງປະເທດ ເຊິ່ງໄດ້ຍົກສູງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຂຶ້ນສູ່ລະດັບໃໝ່. ສອງຝ່າຍໄດ້ເຊັນສັນຍາຮ່ວມມືໃນຫຼາຍດ້ານເປັນຕົ້ນ ການເຊື່ອມຕໍ່ຍຸດທະສາດການພັດທະນາຂອງສອງປະເທດ, ການຮ່ວມມືເພື່ອເພີ່ມຂີດຄວາມສາມາດການຜະລິດ, ເຂດຮ່ວມມືເສດຖະກິດຂ້າມຊາດແລະອື່ນໆ. ຂ້າພະເຈົ້າຫວັງວ່າ ຜ່ານຈາກສັນຍາແລະບົດບັນທຶກການຮ່ວມມືເຫຼົ່ານີ້ຈະສາມາດຜັນຂະຫຍາຍຄວາມເປັນເອກະພາບທີ່ການນຳຂັ້ນສູງສອງປະເທດຕົກລົງຮ່ວມກັນນັ້ນເຂົ້າສູ່ການປະຕິບັດຕົວຈິງເພື່ອຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວກ້າວສູ່ລວງເລິກ, ເປີດກວ້າງຂົງເຂດການຮ່ວມມືຕື່ມອີກ,ເພີ່ມທະວີຄວາມໄວ້ເນື້ອເຊື່ອໃຈກັນລະຫວ່າງສອງປະເທດ ແລະເຊື່ອໝັ້ນວ່າ ສາຍພົວພັນຫວຽດນາມ-ຈີນຈະສືບຕໍ່ຂະຫຍາຍໄປໜ້າຕາມທິດທາງທີ່ຕັ້ງໜ້າ, ໝັ້ນທ່ຽງແລະປອດໃສ.
 |
