ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານວິວຽນ ບາລັກຣິສນັນ ລັດຖະມົນຕີກະຊວງການຕ່າງປະເທດສິງກະໂປຢູ່ນະຄອນຫຼວງເນບີດໍ ປະເທດມຽນມາ ໃນໂອກາດເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊີ-ເອີລົບ.
ທ່ານວາງຢີ້ ກ່າວວ່າ, ຈາກຄວາມພະຍາຍາມຮ່ວມຂອງຈີນ-ສິງກະໂປ, ປີນີ້ສາຍພົວພັນລະຫວ່າງສອງປະເທດໄດ້ຂະຫຍາຍຕົວເປັນຢ່າງດີ, ປະເທດຕົນຍິນດີຮ່ວມກັບສິງກະໂປເລັ່ງລັດຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ຍົກລະດັບການຮ່ວມມືທີ່ຕິດແທດຕົວຈິງລະຫວ່າງສອງປະເທດໃນຂົງເຂດຕ່າງໆໃຫ້ສູງຂຶ້ນ. ໃນຖານເປັນປະເທດປະສານງານການພົວພັນລະຫວ່າງຈີນ-ອາຊຽນ, ສິງກະໂປໄດ້ເສີມຂະຫຍາຍບົດບາດສຳຄັນໃນການລົງເລິກການຮ່ວມມືລະຫວ່າງຈີນ-ອາຊຽນ, ແກ້ໄຂບັນຫາທະເລຈີນໃຕ້ຢ່າງເໝາະສົມແລະຊຸກຍູ້ໃຫ້ກອງປະຊຸມສຸດຍອດການຮ່ວມມືອາຊີຕາເວັນອອກປະສົບຜົນສຳເລັດ, ເຊິ່ງຈີນສະແດງຄວາມຊົມເຊີຍຢ່າງຈິງໃຈ.
ທ່ານວິວຽນ ກ່າວວ່າ, ປະເທດຕົນຍິນດີເສີມຂະຫຍາຍບົດບາດໃນການເປັນປະເທດປະທານໝູນວຽນອາຊຽນໃນປີໜ້າ, ຊຸກຍູ້ການຮ່ວມມືຕ່າງໆ, ລວມທັງຊຸກຍູ້ສາຍພົວພັນລະຫວ່າງສອງຝ່າຍໃຫ້ຂະຫຍາຍຕົວ. ປະເທດຕົນເຫັນວ່າ, ການທີ່ປຶກສາຫາລື "ກົດແຫ່ງການປະພຶດຢູ່ທະເລຈີນໃຕ້" ກໍຄືຂະບວນການເພີ່ມຄວາມໄວ້ເນື້ອເຊື່ອໃຈ, ບັນດາປະເທດໃນອາຊຽນຍິນດີສຸມທຸກຄວາມພະຍາຍາມຮ່ວມກັບຈີນ, ປັບປຸງທ່າອ່ຽງທີ່ດີຂອງສະຖານະການຢູ່ທະເລຈີນໃຕ້ໃນປັດຈຸບັນ.