ວັນທີ 21 ພະຈິກນີ້, ທີ່ສະຖານີໄຟຟ້ານາໄຫ ນະຄອນຫຼວງວຽງຈັນ, ໄດ້ມີພິທີວາງສີລາລຶກໂຄງການກໍ່ສ້າງສາຍສົ່ງ ແລະ ສະຖານີໄຟຟ້າ 115/22 ກິໂລໂວນ ນາໄຫ-ດົງໂພສີ, ໂດຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ Wang Wentien ເອກອັກຄະລັດຖະທູດ ຜູ້ມີອຳນາດເຕັມ ສປ ຈີນ ປະຈຳລາວ, ທ່ານ ໂຈງຢຽນໜິງ ຜູ້ອຳນວຍການໃຫຍ່ບໍລິສັດ TBEA, ລວມທັງທູດເສດຖະກິດ ແລະ ການຄ້າ ສປ ຈີນ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ດວງສີ ພາຣາຍົກ ຮອງຜູ້ອຳນວຍການໃຫຍ່ ບໍລິສັດໄຟຟ້າລາວ ກ່າວວ່າ: ໂຄງການກໍ່ສ້າງສາຍສົ່ງ ແລະ ສະຖານີໄຟຟ້າ 115/22 ກິໂລໂວນ ນາໄຫ-ດົງໂພສີ ແມ່ນແຜນງານໜຶ່ງທີ່ສຳຄັນ ແລະ ນອນຢູ່ໃນແຜນແມ່ບົດ ພັດທະນາລະບົບໄຟຟ້າຢູ່ປະເທດລາວ ແຕ່ນີ້ຮອດປີ 2030 ແນໃສ່ສ້າງເງື່ອນໄຂ ແລະ ຂຸດຄົ້ນທຸກຄວາມສາມາດບົ່ມຊ້ອນ ເພື່ອເຮັດໃຫ້ຂະແໜ'ພະລັງງານໄຟຟ້າໄດ້ຮັບການຈັດຕັ້ງປະຕິບັດດ້ວຍຈັງຫວະຕໍ່ເນື່ອງ ແລະ ໝັ້ນທ່ຽງ ກາຍເປັນກຳລັງແຮງເພື່ອຍູ້ການຂັບເຄື່ອນເສດຖະກິດແຫ່ງຊາດທັງໃນສະເພາະໜ້າ ແລະ ໄລຍະຍາວ, ປະກອບສ່ວນສ້າງພື້ນຖານທີ່ໜັກແໜ້ນໃຫ້ແກ່ການພັດທະນາປະເທດຊາດກ້າວຂຶ້ນຕາມທິດສັງຄົມນິຍົມ, ພ້ອມນັ້ນ ໂຄງການດັ່ງກ່າວຍັງເປັນໂຄງການໜຶ່ງທີ່ສະໜອງພະລັງງານໄຟຟ້າໃຫ້ຂົງເຂດນະຄອນຫຼວງວຽງຈັນດ້ານໃຕ້, ພ້ອມທັງເຂດເສດຖະກິດໃໝ່ ແລະ ເຂດອຸດສາຫະກຳບໍລິເວນໃກ້ຄຽງ ທີ່ກວມເອົາສອງເມືອງຄື: ຫາດຊາຍຟອງ ແລະເມືອງໄຊເສດຖາ, ໂດຍການກໍ່ສ້າງສາຍສົ່ງ 115 ກິໂລໂວນ ຈາກສະຖານີດົງໂພສີ ຫາ ສະຖານີນາໄຫ ມີໄລຍະ 10 ກິໂລແມັດ, ໃນນີ້ ສະເພາະສະຖານີນາໄຫ ຊຶ່ງເປັນສະຖານີໃໝ່ທີ່ມີກຳລັງຕິດຕັ້ງ ລວມທັງໝົດ 100 ເມກາວັດອຳເປ (MVA) ແລະ ສະຖານີດົງໂພສີ ແມ່ນສ້າງ Bays 115 ກິໂລໂວນ 4 Bays ພ້ອມອຸປະກອນ ແລະ ອື່ນໆຄົບຊຸດ ໂດຍມີມູນຄ່າທັງໝົດ 76 ລ້ານໂດລາ ຊຶ່ງເປັນເງິນກູ້ນະໂຍບາຍພິເສດຈາກ Exim Bank of China.
ໂອກາດດັ່ງກ່າວ ທ່ານ ຄຳມະນີ ອິນທິລາດ ໄດ້ກ່າວ ວ່າ: ໃນຊຸມປີຜ່ານມາ, ກະຊວງພະລັງງານ ແລະ ບໍ່ແຮ່ໃນຖານະທີ່ເປັນເສນາທິການໃຫ້ແກ່ລັດຖະບານ ກໍໄດ້ວາງວິໄສທັດ, ຍຸດທະສາດ ແລະ ແຜນພັດທະນາອຸດສາຫະກຳພະລັງງານໄຟຟ້າ ໂດຍສະເພາະການຂຸດຄົ້ນທ່າແຮງບົ່ມຊ້ອນຂອງແຫຼ່ງນ້ຳທຳມະຊາດເພື່ອຜະລິດ ແລະ ສະໜອງກະແສໄຟຟ້າ ໃຫ້ພຽງພໍກັບຄວາມຕ້ອງການໃນການຊົມໃຊ້ຢູ່ພາຍໃນປະເທດ ແລະ ເພີ່ມທະວີການສົ່ງອອກໃຫ້ນັບມື້ຫຼາຍຂຶ້ນ, ບົນພື້ນຖານຮັບປະກັນໃຫ້ການພັດທະນາພະລັງງານໄຟຟ້າ ທີ່ເປັນມິດກັບສິ່ງແວດລ້ອມ, ຜະລິດພະລັງງານທີ່ສະອາດ, ມີລັກສະນະຍືນຍົງ ແລະ ສູ້ຊົນເພື່ອເຮັດໃຫ້ ສປປ ລາວ ກາຍເປັນໃຈກາງດ້ານພະລັງງານຂອງອາຊຽນເທື່ອລະກ້າວ, ມາຮອດປະຈຸບັນລາວ ມີເຂື່ອນຜະລິດພະລັງງານໄຟຟ້າ ທັງໝົດ 47 ແຫ່ງ, ດ້ວຍກຳລັງຕິດຕັ້ງ 6.465 ເມກາວັດ ແລະ ສາມາດຜະລິດພະລັງງານໄຟຟ້າໄດ້ເຖິງ 35.120 ກິກະວັດໂມງຕໍ່ປີ, ພ້ອມນັ້ນກໍ່ສ້າງ 53 ແຫ່ງ ທີ່, ຊຶ່ງຄາດວ່າຮອດປີ 2020-2021 ທີ່ຈະມາເຖິງ ລາວຈະມີແຫຼ່ງຜະລິດພະລັງງານໄຟຟ້າທັງໝົດ 100 ແຫ່ງ ດ້ວຍກໍາລັງຕິດຕັ້ງ 13.120 ເມກາວັດ ແລະ ມີກຳລັງການຜະລິດ 66.944 ກິໂລວັດໂມງຕໍ່ປີ, ໃນນັ້ນ 85% ສົ່ງອອກໄປຢູ່ຕ່າງປະເທດ, ສະນັ້ນ ຖ້າໂຄງການນີ້ສຳເລັດກໍ່ຈະກາຍເປັນປະກອບສ່ວນທີ່ສຳຄັນ ແລະ ເປັນພື້ນຖານເຂົ້າໃນການພັດທະນາເສດຖະກິດ-ສັງຄົມ ຢູ່ໃນຂອບເຂດນະຄອນຫຼວງວຽງຈັນ ຊຶ່ງເປັນເຂດຍຸດທະສາດທີ່ສໍາຄັນໃນການຜະລິດກະສິກໍາ, ອຸດສາຫະກຳ, ການຜະລິດເປັນສິນຄ້າ, ເຂດໃຫ້ບໍລິການ ແລະ ອື່ນໆ ໃຫ້ມີຄວາມສະດວກ, ເພາະໂຄງການດັ່ງກ່າວ ຈະເນັ້ນຜ່ານເຂດຊຸມຊົນທີ່ເປັນເຂດພວມພັດທະນາໃນທຸກດ້ານຂອງເຂດເມືອງຫາດຊາຍຟອງ ເພື່ອຮັບປະກັນທາງດ້ານກະສິກຳແບບຄົບວົງຈອນ, ດ້ານອຸດສາຫະກຳ, ການຂົນສົ່ງ, ການປຸງແຕ່ງ, ການບໍລິການ ແລະ ອື່ນໆ ທີ່ພວມຂະຫຍາຍຕົວຢ່າງວ່ອງໄວຢູ່ໃນປັດຈຸບັນ.
