ກອງປະຊຸມລັດຖະມົນຕີຖະແຫຼງຂ່າວຈີນ-ອາຊຽນໄດ້ຈັດຂຶ້ນຢູ່ນະຄອນຊູ່ໂຈ່ວ ເທດສະບານແຂວງຈ່ຽງຊູ ສປ ຈີນ ໃນວັນທີ 22 ພະຈິກນີ້ ໂດຍຝ່າຍຕ່າງໆໄດ້ປຶກສາຫາລືກັນຢ່າງກວ້າງຂວາງໃນຫົວຂໍ້ "ເພີ່ມທະວີການຮ່ວມມືທີ່ແທ້ຈິງໃນຂົງເຂດການຂ່າວ ແລະ ສ້າງປະຊາຄົມຮ່ວມຊາຕາກຳຈີນ-ອາຊຽນໃຫ້ແໜ້ນແຟ້ນຍິ່ງຂຶ້ນ" ແລະໄດ້ຮັບຮອງ "ຂໍ້ລິເລີ່ມກອງປະຊຸມລັດຖະມົນຕີຖະແຫຼງຂ່າວຈີນ-ບັນດາປະເທດອາຊຽນ".
ທ່ານຈຽງຈ້ຽນໂກ໋ວ ຮອງຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ ທັງເປັນຫົວໜ້າຫ້ອງການຖະແຫຼງຂ່າວຄະນະລັດຖະບານຈີນ ພ້ອມດ້ວຍລັດຖະມົນຕີ ຫຼື ຜູ້ຕາງໜ້າລັດຖະມົນຕີຂອງອົງການຖະແຫຼງຂ່າວບັນດາປະເທດໃນອາຊຽນ ເຊັ່ນ ລາວ ແລະ ກຳປູເຈຍ ໄດ້ເຂົ້າຮ່ວມກອງປະຊຸມດັ່ງກ່າວ.
ທ່ານຈຽງຈ້ຽນໂກ໋ວ ໄດ້ກ່າວຄຳເຫັນໃນກອງປະຊຸມວ່າ: ກ່ອນໜ້ານີ້ບໍ່ດົນ, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມບໍ່ເປັນທາງການຂອງຜູ້ນຳອົງການອາເປັກທີ່ຈັດຂຶ້ນຢູ່ຫວຽດນາມ ແລະໃນການປະຊຸມ, ທ່ານກໍໄດ້ກ່າວຂະນະພົບປະກັບຜູ້ນຳຂອງປະເທດອາຊຽນວ່າ: "ຈີນຈະເດັດດ່ຽວພັດທະນາການຮ່ວມມືຢ່າງມີໄມຕີຈິດມິດຕະພາບກັບອາຊຽນ ແລະຮ່ວມກັບອາຊຽນກ້າວໄປສູ່ປະຊາຄົມຮ່ວມຊາຕາກຳທີ່ແໜ້ນແຟ້ນກວ່າເກົ່າ". ຄຳເຫັນຂອງທ່ານສີຈິ້ນຜິງ ບໍ່ພຽງແຕ່ໄດ້ວາດພາບການພັດທະນາສາຍພົວພັນຈີນ-ອາຊຽນໃນອະນາຄົດທີ່ດີງາມເທົ່ານັ້ນ, ຫາກຍັງເປັນການຊີ້ທິດທາງແຫ່ງການແລກປ່ຽນ ແລະ ຮ່ວມມືລະຫວ່າງສື່ມວນຊົນຂອງສອງຝ່າຍອີກດ້ວຍ. ຈາກນີ້, ຕົນຈຶ່ງສະເໜີ 4 ຂໍ້ສຳລັບການແລກປ່ຽນແລະຮ່ວມມືດັ່ງກ່າວ: ໜຶ່ງ, ຮ່ວມກັນສົ່ງສຽງຮັກສາສັນຕິພາບ ແລະ ສະຖຽນລະພາບຢູ່ອາຊີ; ສອງ, ຮ່ວມກັນສະແດງຄວາມໃຝ່ຝັນແຫ່ງການພັດທະນາ ແລະ ຈະເລີນຮຸ່ງເຮືອງ; ສາມ, ຮ່ວມກັນສ້າງຮູບແບບການຮ່ວມມືດ້ານການສະໜອງໃຫ້ດີ ແລະ ສີ່, ຮ່ວມກັນຊຸກຍູ້ການສົນທະນາລະຫວ່າງອາລະຍະທຳອາຊີ.
ຂະນະທີ່ທ່ານບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສປປ ລາວ ກໍກ່າວວ່າ: ກອງປະຊຸມເທື່ອນີ້ໄດ້ເນັ້ນຫົວຂໍ້ໃຫຍ່ສຳຄັນຄືແນວນີ້ ກໍໝາຍເຖິງການເຮັດແນວໃດເພື່ອເພີ່ມທະວີການຮ່ວມມືລະຫວ່າງສື່ມວນຊົນ ແລະສ້າງປະຊາຄົມຮ່ວມຊາຕາກຳຈີນ-ອາຊຽນໃຫ້ແໜ້ນແຟ້ນຍິ່ງຂຶ້ນ. ສະນັ້ນ, ພວກເຮົາກໍພ້ອມສະໜັບສະໜູນຫົວຂໍ້ນີ້ ແລະຂໍ້ລິເລີ່ມຕ່າງໆ ທີ່ບັນດາຝ່າຍຕົກລົງກັນ. ແນວໃດກໍດີ, ໃນຂອບອາຊຽນ, ສອງຝ່າຍຈີນ-ລາວ ແລະ ຫຼາຍຝ່າຍຈີນ-ອາຊຽນ ມີຫຼາຍໂຄງການຮ່ວມມື ຈຶ່ງສາມາດເຮັດໃຫ້ພວກເຮົາຮ່ວມມືກັນຢ່າງກວ້າງຂວາງໃນຂົງເຂດຕ່າງໆ ເຊັ່ນ ອຸປະກອນເຕັກນິກ, ການຊົມໃຊ້ຂໍ້ມູນຂ່າວສານຮ່ວມກັນ, ການອົບຮົມບຸກຄະລາກອນ, ການສ້າງຄວາມສາມາດ ແລະອື່ນໆ.
