ຕອນບ່າຍວັນທີ 21 ພະຈິກນີ້, ທ່ານຫຼີເຄິ້ສຽງ ນາຍົກລັດຖະມົນຕີຈີນໄດ້ພົບປະກັບຄະນະຜູ້ແທນວົງການເສດຖະກິດຍີ່ປຸ່ນຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ.
ທ່ານຫຼີເຄິ້ສຽງກ່າວວ່າ: ການພັດທະນາສາຍພົວພັນຈີນ-ຍີ່ປຸ່ນຢ່າງໝັ້ນຄົງລ້ວນແຕ່ສອດຄ່ອງກັບຜົນປະໂຫຍດຮ່ວມຂອງສອງຝ່າຍ. ຂະນະທີ່ຂໍກະແຈຂອງການປັບປຸງສາຍພົວພັນຈີນ-ຍີ່ປຸ່ນໃຫ້ດີຂຶ້ນກໍຄືຄວາມໄວ້ເນື້ອເຊື່ອໃຈກັນ ໂດຍສະເພາະແມ່ນຄວາມເຂົ້າໃຈຂອງປະຊາຊົນສອງຊາດ. ຫວັງວ່າສອງຝ່າຍຈະຖະແນທະໜອມ ແລະປັບປຸງທ່າອ່ຽງທີ່ດີ ແລະຊຸກຍູ້ໃຫ້ພັດທະນາຕາມທິດທາງຖືກຕ້ອງ, ຫຼີກເວັ້ນບໍ່ໃຫ້ເກີດຜົນສະທ້ອນໃດໆ ແລະບັນລຸການພັດທະນາຢ່າງໝັ້ນທ່ຽງ.
ທ່ານກ່າວຕື່ມວ່າ: ການພັດທະນາສາຍພົວພັນຈີນ-ຍີ່ປຸ່ນແຍກອອກຈາກການຊຸກຍູ້ຂອງການຮ່ວມມືເສດຖະກິດ-ການຄ້າບໍ່ໄດ້ ເຊິ່ງຫວັງວ່າວົງການເສດຖະກິດຍີ່ປຸ່ນຈະສືບຕໍ່ຮັກສາມູນເຊື້ອທີ່ດີ, ເອົາໃຈໃສ່ປັບປຸງ ແລະພັດທະນາສາຍພົວພັນຈີນ-ຍີ່ປຸ່ນ, ຂະນະດຽວກັນກໍໃຫ້ເສີມຂະຫຍາຍບົດບາດອິດທິພົນຂອງຕົນ ສົ່ງເສີມການແລກປ່ຽນດ້ານວັດທະນະທຳ, ຊາວໜຸ່ມ, ທ້ອງຖິ່ນ ແລະອື່ນໆ ເພື່ອໃຫ້ວົງການຕ່າງໆຍີ່ປຸ່ນເຫັນເປັນເອກະພາບກັນ ຄື ຖືເອົາສັນຕິພາບ, ມິດຕະພາບ ແລະການຮ່ວມມືເປັນທິດທາງຫຼັກຂອງການພັດທະນາສາຍພົວພັນ, ຖອດຖອນບົດຮຽນຈາກປະຫວັດສາດ ແລະຫັນໜ້າສູ່ອະນາຄົດ ເພື່ອຊຸກຍູ້ສາຍພົວພັນສອງປະເທດໃຫ້ພັດທະນາຢ່າງໝັ້ນຄົງ ແລະຍືນຍົງ ບົນພື້ນຖານປະຕິບັດຕາມສີ່ເອກະສານທາງການເມືອງຈີນ-ຍີ່ປຸ່ນ.