ວັນທີ 21 ພະຈິກນີ້, ກະຊວງການເງິນອາເມລິກາປະກາດວ່າ,ຈະຂວ້ຳບາດຕໍ່ວິສາຫະກິດຫຼາຍແຫ່ງ, ກຳປັ່ນ ແລະ ເອກະຊົນຂອງສປປເກົາຫຼີ ເພື່ອຕັດການຄ້າກັບຕ່າງປະເທດ ແລະ ຈຳກັດລາຍຮັບຂອງສປປເກົາຫຼີຕື່ມອີກ.
ກະຊວງການເງິນອາເມລິກາອອກຖະແຫຼງການໃນວັນດັ່ງກ່າວວ່າ, ອາເມລິກາຈະສືບຕໍ່ສະກັດກັ້ນເງິນທຶນທີ່ສປປເກົາຫຼີຈະນຳໃຊ້ພັດທະນາອາວຸດນິວເຄຼຍ ແລະ ລູກສອນໄຟ.
ໃນຖະແຫຼງການ, ທ່ານສະຕິບເວັນ ມູນູຊິນ ລັດຖະມົນຕີກະຊວງການເງິນອາເມລິກາກ່າວວ່າ, ການຂວ້ຳບາດເທື່ອນີ້ຈະເພີ່ມກຳລັງໜີບດ້ານເສດຖະກິດສປປເກົາຫຼີຕື່ມອີກ. ອີງຕາມຂໍ້ກຳນົດການຂວ້ຳບາດ, ເງິນທຶນຂອງບຸກຄົນ ແລະ ອົງການທີ່ຖືກຂວ້ຳບາດຢູ່ອາເມລິກາຈະຖືກອາຍັດ, ຫ້າມປະຊາຊົນອາເມລິກາຊື້ຂາຍກັບພວກເຂົາ.
