ປະ​ທານ​ປະ​ເທດ​ຈີນ​ເຈ​ລະ​ຈາ​ກັບ​ປະ​ທາ​ນາ​ທິ​ບໍ​ດີຈີ​ບູ​ຕີ
2017-11-24 14:44:21  cri 

ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ຈີນ​ໄດ້​ເຈ​ລະ​ຈາ​ກັບ​ທ່ານອິ​ສ​ເມ ໂອ​ມາ ເກ​ເລ ປະ​ທາ​ນາ​ທິ​ບໍ​ດີ​ຈີ​ບູ​ຕີໃນ​ວັນ​ທີ 23 ພະ​ຈິກ​ນີ້ຢູ່​ຫໍ​ສະ​ພາ​ປະ​ຊາ​ຊົນ​ແຫ່ງ​ຊາດ​ໃນ​ໂອ​ກາດ​ເດີນ​ທາງ​ຢ້ຽມ​ຢາມ ສປ​ຈີນ ​ທາງ​ລັດ​ຖະ​ກິດ, ແລະປະ​ມຸກ​ລັດ​ສອງ​ປະ​ເທດ​​ໄດ້​ເຫ���ນ​ດີ​ຮ່ວມ​ກັນ​ສ້າງ​ສາຍ​ພົວ​ພັນ​ຄູ່​ຮ່ວມ​​ຍຸດ​ທະ​ສາດ, ລົງ​ເລິກ​ການ​ຮ່ວມ​ມື​ລະ​ຫວ່າງ​ສອງ​ປະ​ເທດ​ໃນ​ຂົງ​ເຂດ​ຕ່າງໆ.

ທ່ານ​ສີ​ຈິ້ນ​ຜິງ ​ກ່າວ​ວ່າ, ທ່ານ​ເກ​ເລ ແມ່ນ​ປະ​ມຸກ​ລັດ​ປະ​ເທດ​ອາ​ຟ​ຣິ​ກາ​ຜູ້​ທຳ​ອິດ​ທີ່​ມາ​ຢ້ຽມ​ຢາມ​ຈີນ​ຫຼັງ​ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ​ກອມ​ມູ​ນິດ​ຈີນ​ຄັ້ງ​ທີ 19, ​ເຊິ່ງ​ເປັນ​ການສະ​ແດງ​ໃຫ້​ເຫັນ​ມິດ​ຕະ​ພາບ​ລະ​ຫວ່າງ​ສອງ​ປະ​ເທດມີ​ຄວາມ​ໜັກ​ແໜ້ນ. ປະ​ເທດ​ຕົນ​ຍິນ​ດີ​ຮ່ວມ​ກັບ​ຈີ​ບູ​ຕີ, ເລັ່ງ​ລັດ​ປະ​ຕິ​ບັດ​ໝາກ​ຜົນ​ຂອງກອງ​ປະ​ຊຸມ​ສຸດຍອດໂຈ​ຮັນ​ເນັ​ສ​ເບີກ​ຂອງ​ເວ​ທີ​ປຶກ​ສາ​ຫາ​ລື​ການ​ຮ່ວມ​ມື​ຈີນ-ອາ​ຟ​ຣິ​ກາ, ຮ່ວມ​ກັນ​ຊຸກ​ຍູ້​ການ​ກໍ່​ສ້າງ "ໜຶ່ງ​ແລວ​ທາ​ງ​ໜຶ່ງ​ເສັ້ນ​ທາງ", ລົງ​ເລິກ​ການ​ຮ່ວມ​ມື​ລະ​ຫວ່າງ​ສອງ​ປະ​ເທດ​ໃນ​ຂົງ​ເຂດ​ຕ່າງໆ, ສ້າງ​ຄວາມ​ຜາ​ສຸກ​ໃຫ້​ແກ່​ປະ​ຊາ​ຊົນ​ສອງ​ປະ​ເທດ​ໃຫ້​ດີກວ່າ​ເກົ່າ.


ທ່ານ​ເກ​ເລ​ ກ່າວ​ວ່າ, ຈີ​ບູ​ຕີ​ແມ່ນ​ເພື່ອນ​ມິດ​ຂອງ​ຈີນ, ຖື​ຈີນ​ເປັນ​ຄູ່​ຮ່ວມ​ມື​ບູ​ລິ​ມະ​ສິດ​ແລະ​ຂາດ​ບໍ່​ໄດ້. ປະ​ເທດ​ຕົນ​ຍິນ​ດີ​ຕັ້ງ​ໜ້າເຂົ້າ​ຮ່ວມ​ການ​ກໍ່​ສ້າງ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ", ເພີ່ມ​ທະ​ວີ​ການ​ຮ່ວມ​ມື​ກັບ​ຈີນ​ໃນ​ຂົງ​ເຂດ​ພື້ນ​ຖານ​ໂຄ​ງ​ລ່າງ, ການ​ພັດ​ທະ​ນາ​ຊີ​ວິດ​ຂອງ​ປະ​ຊາ​ຊົນ​ແລະ​ອື່ນໆ. ປະ​ເທດ​ຕົນ​ຊົມ​ເຊີຍ​ຈີນ​​ທີ່​ໄດ້ຕັ້ງ​ໜ້າ​ເຂົ້າ​ຮ່ວມ​ຮັກ​ສາ​ສັນ​ຕິ​ພາບຂອງ​ອົງ​ການ​ສະ​ຫະ​ປະ​ຊາ​ຊາດ​ແລະ​ການ​ຮ່ວມ​ມື​ສາ​ກົນ​ຕໍ່​ຕ້ານ​ໂຈນ​ທະ​ເລ, ​ຂອບ​ໃຈ​ຈີນ​ທີ່ເສີ​ມ​ຂະ​ຫຍາຍ​ບົດ​ບາດ​ສຳ​ຄັນ​ເພື່ອ​ສັນ​ຕິ​ພາບ​ແລະ​ຄວາມ​ຈະ​ເລີນ​ຮຸ່ງ​ເຮືອງ​ຂອງ​ໂລກ.

ຫຼັງ​ພົບ​ປະ​ ​, ປະ​ມຸກ​ລັດ​ສອງ​ປະ​ເທດ​ໄດ້​ເປັນ​ສັກ​ຂີ​ພິ​ຍານ​ໃນ​ພິ​ທີ​ລົງ​ນາມ​ເອ​ກະ​ສານ​ຮ່ວມ​ມື​ດ້ານ​ເສດ​ຖະ​ກິດ​ເຕັກ​ນິກ, ກະ​ສິ​ກຳ​ແລະ​ອື່ນໆ.

ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ