ການສົນທະນາລະຫວ່າງການນຳຂັ້ນສູງຂອງພັກກອມມູນິດຈີນກັບພັກການເມືອງຕ່າງໆໃນໂລກຈະຈັດຂຶ້ນແຕ່ວັນທີ 30 ພະຈິກຫາວັນທີ 3 ທັນວາໜ້ານີ້ຢູ່ນະຄອນຫຼວງປັກກິ່ງ ສປ ຈີນ ເຊິ່ງເປັນການເຄື່ອນໄຫວທາງການຕ່າງປະເທດຫຼາຍຝ່າຍຄັ້ງທຳອິດທີ່ຈີນເປັນເຈົ້າພາບຈັດຂຶ້ນຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ,ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນຈະກ່າວປາໄສໃນພິທີໄຂກອງປະຊຸມດັ່ງກ່າວ.
ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 24 ພະຈິກນີ້, ທ່ານໂກວ່ເຢ້ໂຈ່ວ ຮອງຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນຢືນຢັນວ່າ ນັບແຕ່ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນສິ້ນສຸດລົງເປັນຕົ້ນມາ, ປະຊາຄົມໂລກໂດຍສະເພາະພັກການເມືອງຂອງບັນດາປະເທດຕ່າງກໍຫວັງຢາກລົງເລິກເຂົ້າໃຈເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໂດຍສະເພາະແມ່ນເນື້ອໃນທີ່ອຸດົມສົມບູນຂອງແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແລະຮັບຮູ້ຈຸດຢືນຂອງພັກກອມມູນິດຈີນວ່າດ້ວຍການສ້າງປະຊາຄົມຮ່ວມຊາຕາກຳມວນມະນຸດ,ຮ່ວມກັນສ້າງໂລກທີ່ສວຍງາມ. ການທີ່ຈັດກອງປະຊຸມຄັ້ງນີ້,ຂະນະແນະນຳເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ ເພື່ອຕອບສະໜອງຕາມຄວາມສົນໃຈຂອງປະຊາຄົມໂລກນັ້ນກໍເປັນການສ້າງເວທີການສົນທະນາລະດັບສາກົນສຳລັບການນຳຂັ້ນສູງຂອງພັກການເມືອງຕ່າງໆໃນທົ່ວໂລກ.
ຂ່າວແຈ້ງວ່າ: ກອງປະຊຸມດັ່ງກ່າວແມ່ນເທື່ອທຳອິດທີ່ພັກກອມມູນິດຈີນຈັດກອງປະຊຸມສົນທະນາກັບການນຳຂັ້ນສູງຂອງພັກການເມືອງຕ່າງໆໃນທົ່ວໂລກໂດຍຜູ້ນຳຂອງ 200 ກວ່າພັກແລະອົງການການເມືອງຈາກ 120 ກວ່າປະເທດຈະຫາລືຫົວຂໍ້ "ການສ້າງປະຊາຄົມຮ່ວມຊາຕາກຳມວນມະນຸດ, ຮ່ວມກັນສ້າງໂລກທີ່ສວຍງາມ: ໜ້າທີ່ຮັບຜິດຊອບຂອງພັກການເມືອງ".
 |
