ເຈົ້າໜ້າທີ່ກະຊວງການຕ່າງປະເທດຊີຣີເປີດເຜີຍໃນວັນທີ 28 ພະຈິກນີ້ວ່າ, ຄະນະຜູ້ແທນລັດຖະບານປະເທດຕົນຈະເດີນທາງໄປເຊີແນວປະເທດສະວິສ໌ໃນວັນທີ 29 ພະຈິກນີ້ ເພື່ອເຂົ້າຮ່ວມການເຈລະຈາສັນຕິພາບເຊີແນວກ່ຽວກັບບັນຫາຊີຣີຮອບໃໝ່.
ສຳນັກຂ່າວສານຊີຣີລາຍງານໂດຍອ້າງຈາກກະຊວງການຕ່າງປະເທດວ່າ, ພາຍຫຼັງແລກປ່ຽນຄວາມເຫັນກັບຣັດເຊຍແລ້ວ, ລັດຖະບານຊີຣີກໍໄດ້ຕົກລົງເຂົ້າຮ່ວມການເຈລະຈາດັ່ງກ່າວ ແລະ ທ່ານບາຊາ ອານ ຈາຟາຣີ ຜູ້ຕາງໜ້າຖາວອນຊີຣີປະຈຳອົງການສະຫະປະຊາຊາດຈະເປັນຫົວໜ້າຄະນະ.
ທ່ານສຕາຟັນ ເດີ ມິສຕູຣາ ທູດພິເສດບັນຫາຊີຣີຂອງເລຂາທິການໃຫຍ່ອົງການສະຫະປະຊາຊາດເປີດເຜີຍໃນວັນທີ 28 ພະຈິກນີ້ວ່າ, ໄດ້ຮັບຂ່າວຢືນຢັນການເຂົ້າຮ່ວມປະຊຸມຂອງຄະນະຜູ້ແທນລັດຖະບານຊີຣີແລ້ວ. ພາຍຫຼັງພົບປະຄະນະຜູ້ແທນພັກຝ່າຍຄ້ານຊີຣີໃນມື້ດຽວກັນ, ທ່ານມິສຕູຣາກໍໄດ້ກ່າວວ່າ, ລັດຖະບານຊີຣີ ແລະ ພັກຝ່າຍຄ້ານຊີຣີອາດຈະເຈລະຈາໂດຍກົງເປັນຄັ້ງທຳອິດໃນການເຈລະຈາຮອບນີ້.