ສປປ ເກົາຫຼີໄດ້ອອກມາຖະແຫຼງໃນວັນທີ 29 ພະຈິກນີ້ວ່າ: ປະເທດຕົນໄດ້ປະສົບຜົນສຳເລັດໃນການທົດລອງຍິງຂີປະນາວຸດຂ້າມທະວີບ "ດາວອັງຄານ 15" ທີ່ຄົ້ນຄວ້າພັດທະນາໃໝ່. ຈາກນີ້, ປະຊາຄົມໂລກຕ່າງກໍປະນາມການກະທຳຂອງສປປ ເກົາຫຼີວ່າເປັນການລະເມີດມະຕິກ່ຽວຂ້ອງຂອງອົງການສະຫະປະຊາຊາດແລະຂົ່ມຂູ່ສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກ.
ທ່ານແອນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາດໄດ້ອອກຖະແຫຼງການຜ່ານໂຄສົກຂອງຕົນວ່າ: ການກະທຳຂອງສປປ ເກົາຫຼີໄດ້ລະເມີດມະຕິກ່ຽວຂ້ອງຂອງອົງການສະຫະປະຊາຊາດຢ່າງເປີດແປນໂດຍບໍ່ຫົວຊາຕໍ່ຄວາມເປັນເອກະພາບຂອງປະຊາຄົມໂລກແຕ່ຢ່າງໃດ.
ຂະນະທີ່ຕອນເຊົ້າວັນທີ 29 ເດືອນດຽວກັນ, ທ່ານມູນເຈອິນ ປະທານາທິບໍດີສ ເກົາຫຼີໄດ້ເປັນປະທານໄຂກອງປະຊຸມຄວາມໝັ້ນຄົງແຫ່ງຊາດໂດຍກ່າວປະນາມຢ່າງຮຸນແຮງຕໍ່ ສປປ ເກົາຫຼີທີ່ທົດລອງຍິງຂີປະນາວຸດ ສົ່ງຜົນເຮັດໃຫ້ສະຖານະການຢູ່ແຫຼມເກົາຫຼີເຄັ່ງຕຶງຂຶ້ນ ທັງຢືນຢັນວ່າຈະຮ່ວມກັບປະຊາຄົມໂລກໃຊ້ມາດຕະການເດັດຂາດແລະເປັນຜົນເພື່ອເລັ່ງໃຫ້ສປປ ເກົາຫຼີປົດອາວຸດນິວເຄລຍ.
ຕໍ່ກໍລະນີທີ່ ສປປ ເກົາຫຼີທົດລອງຍິງຂີປະນາວຸດ, ທ່ານໂດນັນ ທຣຳ ປະທານາທິບໍດີອາເມລິກາໄດ້ລົມໂທລະສັບກັບທ່ານມູນເຈອິນ ປະທານາທິບໍດີສ ເກົາຫຼີແລະທ່ານຊິນໂຈ ອາເບະ ນາຍົກລັດຖະມົນຕີຍີ່ປຸ່ນໂດຍກ່າວປະນາມຢ່າງຮຸນແຮງຕໍ່ການກະທຳແບບທ້າທາຍເກາະຜິດຂອງ ສປປ ເກົາຫຼີ ແລະເຫັນວ່າ ອາວຸດນິວເຄລຍຂອງສປປເກົາຫຼີມີພຽງແຕ່ຈະທຳລາຍຄວາມໝັ້ນຄົງຂອງຕົນແລະເຮັດໃຫ້ປະເທດຕົນໂດດດ່ຽວດ້ານການຕ່າງປະເທດແລະເສດຖະກິດຫຼາຍກວ່າເກົ່າ.
ທ່ານດີມີຕຣີ ເປັສຄົຟ ເລຂາທິການຖະແຫຼງຂ່າວຂອງປະທານາທິບໍດີຣັດເຊຍກ່າວໃນວັນທີ 29 ພະຈິກນີ້ວ່າ: ຣັດເຊຍກ່າວປະນາມການກະທຳຂອງ ສປປ ເກົາຫຼີທັງຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງກັບການປະທະກັນຢູ່ແຫຼມເກົາຫຼີນັ້ນຈົ່ງຮັກສາຄວາມອົດກັ້ນ, ບໍ່ຄວນເຮັດໃຫ້ສະຖານະການຢູ່ແຫຼມເກົາຫຼີຮຸນແຮງຂຶ້ນຕື່ມ.
ທ່ານເກິງສວງ ໂຄສົກກະຊວງການຕ່າງປະເທດຈີນຢືນຢັນໃນໂອກາດຕອບຄຳຖາມນັກຂ່າວວ່າ: ຈີນເດັດຂາດເລັ່ງທວງໃຫ້ສປປ ເກົາຫຼີປະຕິບັດຕາມມະຕິກ່ຽວຂ້ອງຂອງສະພາຄວາມໝັ້ນຄົງອົງການສະຫະປະຊາຊາດ, ຢຸດການເຄື່ອນໄຫວທີ່ເຮັດໃຫ້ສະຖານະການຢູ່ແຫຼມເກົາຫຼີຮຸນແຮງຂຶ້ນ. ຂະນະດຽວກັນກໍຫວັງວ່າບັນດາຝ່າຍທີ່ກ່ຽວຂ້ອງຈະສຸຂຸມຮອບຄອບເພື່ອຮ່ວມກັນຮັກສາສັນຕິພາບແລະສະຖຽນລະພາບຂອງພາກພື້ນແຫ່ງນີ້.